ސައުތު އެފްރިކާ އަތުން ބަލިވެ އިޓަލީ މުބާރަތުން ކަޓައިފި!

އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް ޖީގައި މިއަދު މެންދުރު އިޓަލީ އާއި ސައުތު އެފްރިކާ ވާދަކުރި މެޗު 3-2 ގެ ނަތީޖާއަކުން ސައުތު އެފްރިކާ އިން ކާމިޔާބުކޮށްފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ އިޓަލީ އިންނެވެ. މި ލަނޑު ފުރަތަމަ ހާފުގެ 11 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ ޔުވެންޓަސްގެ މިޑްފީލްޑަރު އަރިއާނާ ކަރޫސޯ އެވެ.

ނަމަވެސް ފުރަތަމަ ހާފު ނިމުމުގެ ކުރިން ސައުތު އެފްރިކާ އިން ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކުރި އެވެ. މިއީ އިޓަލީގެ ޑިފެންޑަރު ބެނެޑެޓާ އޮރިސް އަތުން ބައިކޮޅަށް ވަން ލަނޑެކެވެ. މި ލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފު ވަރުގަދަކޮށް ފެށީ ސައުތު އެފްރިކާ އިންނެވެ. އެގޮތުން ދެވަނަ ހާފުގެ 67 ވަނަ މިނެޓުގައި އެޓީމުން ލަނޑެއް ކާމިޔާބުކޮށް ފުރަތަމަ ފަހަރަށް މިމެޗުގައި ލީޑު ހޯދިއެވެ. މި ލަނޑު އެޓީމަށް ކާމިޔާބުކޮށްދިނީ މިޑްފީލްޑަރު ހިލްދާ މެގިއާ އެވެ. މިއީ އެޓީމުގެ ފޯވާޑް ތެމްބައި ކެގަޓްލާނާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

އިޓަލީ އިން މެޗުގެ ނަތީޖާ އެއްވަރުކުރި ލަނޑު ފަހުހާފުގެ 74 ވަނަ މިނެޓުގައި ކާމިޔާބުކޮށްދިނީ ޔުވެންޓަސްގެ މިޑްފީލްޑަރު އަރިއާނާ ކަރޫސޯ އެވެ. މިއީ އެޓީމަށް ލިބުނު ކޯނަރެއްގައި ޔުވެންޓަސްގެ ފޯވާޑް ކްރިސްޓިއާނާ ޖިރެލީ ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މި މެޗުން ސައުތު އެފްރިކާ މޮޅުވި ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ ފޯވާޑް ތެމްބައި ކެގަޓްލާނާ އެވެ. މިއީ އެޓީމުގެ މިޑްފީލްޑަރު ހިލްދާ މެގިއާ ހުރަސްކޮށްދިން ބޯޅައެއް އިޓަލީގެ ގޯލު އޭރިޔާ ތެރޭގައި މުޅިން ހުސްކޮށް ހުރެ ފޮނުވާލި ބޯޅަ ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މި ލަނޑާއެކު މެޗުގެ ކުޅުން ނިމިގެންދިޔައީ 3-2 ގެ ނަތީޖާއަކުން ސައުތު އެފްރިކާ ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ކުޅުނު ތިން މެޗުން ސައުތު އެފްރިކާއަށް ހަތަރު ޕޮއިންޓް ލިބިފައިވާއިރު، އެޓީމު މުބާރާތުގެ ދެވަނަ ބުރުގެ ޖާގައެއް ކަށަވަރުކުރި ގުރޫޕް ޖީގެ ދެވަނަ ޓިމުގެ ގޮތުގައެވެ. މި މެޗުން ބަލިވި އިޓަލީ މުބާރާތް ނިންމާލި ކުލުނު ތިން މެޗުން ލިބުނު ތިން ޕޮއިންޓާއެކު ގުރޫޕްގެ ތިންވަނައިގައެވެ.

މި ގުރޫޕްގެ އެއްވަނަ ސްވިޑެން ހޯދިއިރު، ފުލަށް ދިޔައީ އާޖެންޓީނާ އެވެ.