1995 ވަނަ އަހަރުގެ ފަހުން ފުރަތަމަ ފަހަރަށް ބްރެޒިލް ގުރޫޕް ސްޓޭޖުން ކަޓައިފި

އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް އެފްގައި ޖެމެއިކާ އާއި ވާދަކުރި މެޗު 0-0 ގެ ނަތީޖާއަކުން އެއްވަރުވެ، 1995 ވަނަ އަހަރުގެ ފަހުން ފުރަތަމަ ފަހަރަށް ބްރެޒިލް ވޯލްޑްކަޕްގެ ގުރޫޕް ސްޓޭޖުން ކަޓައިފި އެވެ.

މިއީ 1991 ވަނަ އަހަރަށް ފަހު ވޯލްޑްކަޕް ގްރޫޕް ސްޓޭޖު މެޗެއްގައި ބުރެޒިލް އަށް ލަނޑެއް ކާމިޔާބު ނުކުރެވި ނިމުނު ފުރަތަމަ މެޗެވެ. އަދި މިއީ ފާއިތުވެދިޔަ 28 އަހަރުގެ ތެރޭގައި ވޯލްޑްކަޕް ފުޓުބޯޅަ މުބާރާތުގެ ގުރޫޕް ސްޓޭޖުން ބުރެޒިލް ކެޓި ފުރަތަަމަ ފަހަރެވެ.

މި މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅުނީ ބުރެޒިލް އިންނެވެ. އެގޮތުން މި ހާފުގައި އެޓީމުން ލަނޑުޖަހާނެ ރަގަޅު ފުރުސަތުތަކެއް ތަނަވަސްކުރި ނަމަވެސް ފުރަތަަމަ ހާފު ކުޅުން ނިމިގެންދިޔައީ 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ވެސް ބުރެޒިލް މެޗު ޑޮމިނޭޓުކުރި ނަމަވެސް މިހާފުގައި ވެސް ޖެމެއިކާގެ ޑިފެންސް ފޫއަޅުވާލުމަށް ފަހު ބްރެޒިއަށް ލަނޑެއް ކާމިޔާބު ނުކުރެވުނު އިރު މި މެޗުގައި މޮޅު ކުޅުމެއް ދެއްކި ޖެމެއިކާގެ ގޯލްކީޕަރު ރެބެކާ ސްޕެންސާ ވަނީ ބްރެޒިލް އިން ފޮނުވާލި ނުވަ ހަމަލާއެއް ދިފާއުކޮށްފައެވެ.

މިއާއެކު މެޗުގެ ކުޅުން ނިމިގެންދިޔައީ 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ. މިއާއެކު ޖެމެއިކާގެ ތާރީޚްގައި ފުރަތަމަފަހަރަށް ވޯލްޑްކަޕް ފުޓުބޯޅަ މުބާރާތުގެ ދެވަނަ ބުރުން އެޓީމަށް ވަނީ ޖާގައެއް ކަށަވަރުވެފައެވެ.

މި މެޗުން ލިބުނު އެއް ޕޮއިންޓާއެކު ކުޅުނު ތިން މެޗުން ޖެމެއިކާއަށް ފަސް ޕޮއިންޓް ލިބިފައިވާއިރު، އެޓީމު ދެވަނަ ބުރުގެ ޖާގައެއް ހޯދީ ގުރޫޕްގެ ދެވަނަ ޓީމުގެ ގޮތުގައެވެ. މި މެޗުން ލިބުނު އެއް ޕޮއިންޓާއެކު ބްރެޒިލް މުބާރާތް ނިންމާލީ ކުޅުނު ތިން މެޗުން ލިބުނު ހަތަރު ޕޮއިންޓާއެކު ގްރޫޕްގެ ތިންވަނައިގައެވެ.

މި ގުރޫޕްގެ އެއްވަނަ ލިބުނީ ކުޅުނު ތިން މެޗުން ވެސް މޮޅުވެ 9 ޕޮއިންޓް ހޯދާފައިވާ ފުރާންސް އަށެވެ. އެޓީމު ވަނީ މިއަދު ޕެނަމާ އާއި ވަދަކުރި ގްރޫޕްގެ ފަހު މެޗު 6-3 ގެ ނަތީޖާއަކުން ކާމިޔާބުކޮށްފައެވެ.