ގުރޫޕްގެ އެއްވަނަ ޓީމުގެ ގޮތުގައި ފުރާންސް ދެވަނަ ބުރަށް!

އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް އެފްގައި މިއަދު ހަވީރު ކުޅެވުނު މެޗުގައި ޕެނަމާ ބަލިކޮށް މުބާރާތުގެ ދެވަނަ ބުރުގެ ޖާގައެއް ފުރާންސް އިން ހޯދައިފިއެވެ.

މެޗު ފެށިގެން ދެވަނަ މިނެޓުގައި ޕެނަމާ އިން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ. މި ލަނޑު އެޓީމަށް ކާމިޔާބުކޮށްދިނީ މިޑްފީލްޑަރު މާޓާ ކޮކްސް އެވެ. މިއީ މި މުބާރާތުގައި އަލަށް ވާދަކުރަމުން އަންނަ ޕެނަމާއި މުބާރާތުގައި ކާމިޔާބުކުރި ފުރަތަމަ ލަނޑެވެ.

ފުރަތަަމަ ހާފުގެ 21 ވަނަ މިނެޓާއި ހަމައަށް ޕެނަމާ ކުރީގައި އޮތް ނަމަވެސް، ހާފު ނިމުމުގެ ކުރިން ފްރާންސް އިން ވަނީ ހަތަރު ލަނޑު ކާމިޔާބުކޮށްފައެވެ. އެގޮތުން އެޓީމުގެ ފުރަތަަމަ 21 ވަނަ މިނެޓުގައި ޑިފެންޑަރު މޭއެލް ލަކްރާރް ކާމިޔާބުކޮށްދިންއިރު، އެޓީމުގެ ދެވަނަ ލަނޑު 28 ވަނަ މިނެޓުގައި ކާމިޔާބުކޮށްދިނީ ޕީއެސްޖީގެ ފޯވާޑް ކަޑިޑިއަޓޫ ޑިއާނީ އެވެ.

މި މެޗުގައި ފުރާންސް އިން ކާމިޔާބުކުރި ތިންވަނަ ލަނޑު ފުރަތަމަ ހާފުގެ 37 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ ވެސް ޕީއެސްޖީގެ ފޯވާޑް ކަޑިޑިއަޓޫ ޑިއާނީ އެވެ. އަދި އެޓީމުގެ ހަތަރުވަނަ ލަނޑު ފުރަތަމަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ މިޑްފީލްޑަރު ލީ ލެ ގްރެކް އެވެ. މި ލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 4-1 ގެ ނަތީޖާއަކުން ފްރާންސް ކުރީގައި އޮވެގެންނެވެ.

މެޗުގެ ދެވަަނަ ހާފު ފެށިގެން 52 ވަނަ މިނެޓުގައި ފްރާންސް އަށް ލިބުނު ޕެނަލްޓީއެއްގައި އެޓީމުގެ ޕީއެސްޖީގެ ފޯވާޑް ކަޑިޑިއަޓޫ ޑިއާނީ މި މެޗުގައި އޭނާގެ ހެޓްރިކް ފުރިހަމަކުރި، މެޗުގެ 64 ވަނަ މިނެޓުގައި ޕެނަމާ އިން ވަނީ އެޓީމަށް ލިބުނު ޕެނަލްޓީއެއްގައި ލަނޑެއް ކާމިޔާބުކޮށް ނަތީޖާގެ ފަރަގު ކުޑަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ޑިފެންޑަރު  ޔޮމިރާ ޕިންޒޮން އެވެ. އަދި މެޗު ނިމެން ތިން މިނިޓަށްވެފައި ވަނިކޮށް އެޓީމުން ވަނީ އިތުރު ލަނޑެއް ކާމިޔާބުކޮށް މެޗުގެ ނަތީޖާ 5-3 އަށް ބަދަލުކޮށްފައެވެ.

މި ލަނޑު އެޓީމަށް ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް ފޯވާޑް ލިނެތު ސެޑީނޯ އެވެ.

މި މެޗުގައި ފްރާންސް އިން ކާމިޔާބުކުރި ހަވަނަ ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ ލިއޯންގެ ފޯވަޑް ވިކީ ބެޗޯ އެވެ. މި ލަނޑާއެކު މެޗުގެ ކުޅުން ނިމިގެންދިޔައީ 6-3 ގެ ނަތީޖާއަކުން ފުރާންސް ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ކުޅުނު ތިން 7 ޕޮއިންޓް ހަމަކޮށް ގުރޫޕްގެ އެއްވަނަ ޓީމުގެ ގޮތުގައި ފްރާންސް ދެވަނަ ބުރަށް ޖާގަހޯދުއިރު، މި މެޗުން ބަލިވި ޕެނަމާ މުބާރާތް ނިންމާލީ ކުޅުނު ތިން މެޗުން ވެސް ބަލިވެ ގްރޫޕްގެ ފުލުގައި އޮވެއެވެ.