ބްރެއިން ފޮގް؛ ހަނދާން ނެތުމާއި، ސަމާލުކަން ނުދެވުމުގެ މައްސަލައިން އަރައިގަނެ ވިސްނުން ތޫނުކުރާނީ ކިހިނެއް؟

ދިރިއުޅުމުގެ ކަންކަމުގައި އުޅޭއިރު ބުރަބޮޑުވެ، މަސައްކަތުގެ މާހައުލާއި އަމިއްލަ ދިރިއުޅުމުގެ ޒިންމާތައް އިތުރުވާ ވަގުތުތަކުގައި، ބައެއް ފަހަރު ވިސްނުން ފުސްވެ، ކަންކަމަށް ސަމާލުކަން ދޭން އުނދަގޫވާ ހާލަތަކަށް ދެވޭގޮތްވެއެވެ. މިއީ "ބްރެއިން ފޮގް“ އެވެ. މިއީ ވަކި ބައްޔެއް ނޫން ނަމަވެސް، ސަމާލުކަން ދިނުމާއި، ހަނދާން ބެހެއްޓުމާއި، ވިސްނުމުގެ ބާރު ދަށްވުން ފަދަ ކަންކަން ހިމެނޭ ޞިއްޙީ ހާލަތެކެވެ.

ބްރެއިން ފޮގްވުމަށް މެދުވެރިވާ ސަބަބުތައް

ބްރެއިން ފޮގްވުމަށް ތަފާތު ސަބަބުތައް މެދުވެރިވެއެވެ. އޭގެ ތެރޭގައި މެނޮޕޯޒާއި، ޕެރިމެނޮޕޯޒް، ލޯންގް ކޮވިޑް، އަދި ލޫޕަސް ފަދަ އޮޓޯއިމިއުން ބަލިތައް ހިމެނެއެވެ. މީގެ އިތުރުން، އެއް ފަހަރާ މާ ގިނަ ކަންކަމާ ވިސްނަންޖެހުމާއި، ހަފުތާ ބަންދަށްފަހު މަސައްކަތަށް ނުކުންނަ އިރު ސިކުނޑިއަށް ކުރާ ބާރުގެ ސަބަބުންވެސް މިކަން ތަޖުރިބާކުރަން ޖެހެއެވެ.

ތަޖުރިބާކާރުންގެ އިރުޝާދު

އަމިއްލަ ނަފުސަށް ލުއިދިނުމާއި ހާލަތު ބަލައިގަތުން: ބްރެއިން ފޮގް އަކީ ކޮންމެ މީހަކަށްވެސް ދިމާވެދާނެ ކަމެއްކަން ގަބޫލުކުރަންޖެހެއެވެ. މިއީ ތިބާގެ ނުކުޅެދުންތެރިކަމެއް ނޫނެވެ. އެހެނެއްކަމަކު މިއީ ސިކުނޑި ވަރުބަލިވެ ބާރުބޮޑުވުމުން އެކަން އަންގައިދޭ ނިޝާނެކެވެ. އެހެންކަމުން، މަސައްކަތުގެ ދުވެލި މަޑުކޮށް، ބައެއް ޒިންމާތައް އެހެން މީހުންނާ ހަވާލުކޮށް އެހީތެރިކަން ހޯދުމަކީ މުހިންމު ކަމެކެވެ.

ދުވަހުގެ ތާވަލެއް އެކުލަވަައިލުން: ކޮންމެ ދުވަހަކު ކުރަންޖެހޭ ކަންކަން ކުރީބައިގައި ތަރުތީބުކޮށްލުމުން، ސިކުނޑިން އިތުރަށް ވިސްނަންޖެހޭ މިންވަރު މަދުވެއެވެ. ހެނދުނާއި ރޭގަނޑުގެ ރޫޓީނެއް ކަނޑައެޅުމާއި، އަދި އަނެއް ދުވަހަށް ބޭނުންވާ ހެދުމާއި ނާސްތާ ކުރީބައިގައި ރޭވުމަކީ ސިކުނޑީގެ ބުރަ ލުއިކޮށްދޭނެ ކަންކަމެވެ.

ހަރަކާތްތަކުގެ ދެމެދުގައި ކުރު މެދުކެނޑުމެއް ބޭއްވުން: ޖެހިޖެހިގެން މާ ގިނަ މަސައްކަތްތައް ނުވަތަ ބައްދަލުވުންތައް ތާވަލުކުރުމުގެ ބަދަލުގައި، ކޮންމެ ކަމެއްގެ ދެމެދުގައި 5 އާއި 10 މިނެޓާ ދެމެދުގެ ހުސް ވަގުތުކޮޅެއް ބާއްވަންވާނެއެވެ. މި ވަގުތުކޮޅުގެ ތެރޭގައި ހިނގާލުމާއި، ފެންފޮދެއް ބޯލުން ފަދަ ކަމެއް ކުރުމުން ސިކުނޑި ހަމައަކަށް އެޅި، ދެން ކުރަން އޮތް ކަމަކަށް ތައްޔާރުވެވެއެވެ.

ޓެކްނޮލޮޖީގެ އެހީ ހޯދުން: ހުރިހާ ކަމެއް ހަނދާނުގައި ބެހެއްޓުމަށް މަސައްކަތް ކުރުމުގެ ބަދަލުގައި ފޯނުގެ ކަލަންޑަރާއި ރިމައިންޑާތައް ބޭނުންކުރާށެވެ. ބިލް ދެއްކުމާއި ބައްދަލުވުންތައް ފަދަ ތަކުރާރުވާ ކަންކަން އޮޓޮމެޓިކުން ހަނދާންކޮށްދޭ ގޮތަށް ހެދުމުން، ހަނދާން ނެތިދާނެތީ ކުރަންޖެހޭ ފިކުރު ކުޑަވެގެންދެއެވެ.

ސިކުނޑީގެ ދުޅަހެޔޮކަމަށް "SWANS" އުކުޅު

އެމެރިކާގެ ތަޖުރިބާކާރު ޑޮކްޓަރު ތާރަކާ ތައާރަފުކުރެއްވި އެސް.ޑަބްލިޔު.އޭ.އެން.އެސް "SWANS" އެކްރޮނިމަކީ ސިކުނޑީގެ ފުސްކަން ކަނޑުވައިދޭ މުހިންމު އާދަތަކެކެވެ. މީގެ ތެރޭގައި ހިމެނެނީ:

S (ނިދި): ފުރިހަމަ ނިދި ހޯދުން.

W (ފެން): ހަށިގަނޑަށް ބޭނުންވާ ވަރަށް ފެން ބުއިން.

A (ހަރަކާތްތެރިވުން): ގަވާއިދުން ކަސްރަތު ނުވަތަ ހަރަކާތްތެރިވެ އުޅުން.

N (ކާނާ): ފައިދާހުރި ކާނާ ބޭނުންކުރުން.

S (ސްޓްރެސް މެނޭޖްކުރުން): ސިކުނޑި ނުތަނަވަސްކޮށް، މީހާ ސްޓެރެސްވާ ކަންކަމުން ދުރުހެލިވުން.

ދީނީ ނަޒަރަކުން ބްރެއިން ފޮގަށް އޮތް ހައްލު

އިސްލާމްދީނަކީ އިންސާނާގެ ނަފްސާނީ އަދި ރޫޙާނީ ދުޅަހެޔޮކަމަށް ވަރަށް ބޮޑަށް އަހައްމިއްޔަތުކަންދޭ ދީނެކެވެ. ބްރެއިން ފޮގް ފަދަ ކަންކަމުން ސަލާމަތްވުމަށް ދީނީ ގޮތުން ކުރެވިދާނެ ކަންކަމުގެ ތެރޭގައި:

ނަމާދު ގާއިމުކުރުން: ނަމާދަކީ ސިކުނޑިއަށް ލިބޭ އެންމެ ބޮޑު ހަމަޖެހުމެވެ. ނަމާދުގެ ތެރޭގައި ލިބޭ ހިތްހަމަޖެހުމާއި ޚުޝޫޢަތްތެރިކަމަކީ ސިކުނޑީގެ ނުތަނަވަސްކަން ފިލުވައިދޭ ކަމެކެވެ.

ޤުރުއާން ކިޔަވައި ޛިކުރުކުރުން: الله ހަނދުމަކުރުމުން ހިތްތަކަށް ހަމަޖެހުން ލިބޭނެކަން ޤުރުއާނުގައި ބަޔާންވެގެންވެއެވެ. "أَلَا بِذِكْرِ اللَّهِ تَطْمَئِنُّ الْقُلُوبُ" (ހިތްތައް ހަމަޖެހެނީ الله ހަނދުމަކުރުމުންނެވެ).

ދުޢާކުރުން: ހާސްކަމާއި ފިކުރުތަކުން ސަލާމަތްވުމަށް ކީރިތި ރަސޫލާ ﷺ ދަސްކޮށްދެއްވާފައިވާ ދުޢާތައް ކިޔުމަކީ ނަފްސާނީ ބަލިތަކުންނާއި ސިކުނޑީގެ ވަރުބަލިކަމުން ސަލާމަތްވުމަށް އޮތް ބާރެކެވެ.

ތަވައްކަލުކުރުން: ކަންކަމުގައި الله އަށް ވަކީލުކުރުމަކީ އިންސާނާގެ ބޮލުގައި އެޅިފައިވާ ބޮޑެތި ފިކުރުތަކުން ލުއިކަން ހޯދައިދޭނެ ސިފައެކެވެ.

ބްރެއިން ފޮގް އަކީ ދިރިއުޅުމުގެ އާދަތަކަށް ގެނެވޭ ކުދިކުދި ބަދަލުތަކުން އަރައިގަނެވޭނެ ކަމެކެވެ. ޞިއްޙީ ތަޖުރިބާކާރުންގެ އިރުޝާދުތަކާ އެއްގޮތަށް އަމަލުކުރުމުގެ އިތުރުން، ދީނީ ކަންކަމަށް ސަމާލުކަންދީގެން ރޫޙާނީ ހަމަޖެހުން ހޯދުމަކީ ސިކުނޑީގެ ދުޅަހެޔޮކަން ދެމެހެއްޓުމަށްޓަކައި އެންމެ ރަނގަޅު ގޮތެވެ.