ރާއްޖެއަށް ކާމިޔާބީއެއް ހޯދައިގެން އައިސް ފިލި ބަޔަކު މި ނޫނީ ނެތް: ވަހީދު

ދިވެހިރާއްޖެއަށް ކާމިޔާބީއެއް ހޯދައިގެން އެނބުރި ވަޑައިގެން ރައްޔިތުންނަށް ފިލި ބައެއް މި ސަރުކާރު ނޫނީ ނެތްކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ވަހީދު (ވައްޑެ) ވިދާޅުވެއްޖެ އެވެ.

ކަނޑު ވިއްކާލުމާއި ދެކޮޅު އިއްތިހާދުން ރޭ ކާނިވާ ސަރަހައްދުގައި ބޭއްވި ބޮޑު ޖަލްސާގައި ވާހަކަދައްކަވަމުން ވަހީދު ވިދާޅުވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު އެ ހުންނެވީ ދިވެހި ތާރީހުގައި ވެސް ވެރިއަކު ހައްދަވާފައިވާ އެންމެ ބޮޑު ގޯސް ހައްދަވައިގެން ކަމަށެވެ.

ރާއްޖޭގެ މަސްވެރިން މަސް ބާނަމުންދާ ކަނޑުން ބޮޑު ބައެއް، އެފްރިކާ ބައްރުގެ ގައުމަކަށް ވިއްކާލާފައިވާކަމަށާއި، އެކަން ދިފާއުކުރުމަށް މުޅި ކެބިނެޓު ލައްވާ އެމަނިކުފާނު މަސައްކަތްޕުޅު ކުރައްވަމުންދާކަމަށް ވަހީދު ވިދާޅުވި އެވެ.

އެއާއެކު ވަހީދު ވިދާޅުވީ، ފޯޅަވަހި މައްސަލައިގައި ހަގީގަތުގައިވެސް ދިވެހިންނަށް ލިބުނީ ކާމިޔާބީއެއްކަމަށް ވާނަމަ، އެކަމާއި ގުޅޭ މައުލޫމާތު ރައްޔިތުންގެ މަޖިލީހާއި ހިއްސާކުރެއްވުމަށް ބަންޑާރަނައިބަށް ލިބިލެއްވި ފުރުސަތުގެ ބޭނުން ނުހިއްޕަވަންވީ ސަބަބެއް ނެތްކަމަށެވެ.

އަދި ރާއްޖެއަށް ބޮޑު ކާމިޔާބީއެއް ހޯއްދަވައިގެން ވަޑައިގެން ރައްޔިތުންނާއި ކުރިމަތިލައްވަން ކެރިވަޑައިނުގެން ފިއްލަވަން ޖެހޭ ސަބަބެއް ވެސް ނެތްކަމަށެވެ.

"ކޮވިޑާއި ގުޅިގެން ވެސް ރައީސް ޞާލިހު އަރުއްވައިގެން މުޅި ކެބިނެޓު ފަހަތުލައްވައިގެން އެ ވާހަކަ އިއުލާނެއް ނުކުރައްވާ. ބޮޑު ކާމިޔާބީއެކޭ ކިޔާފަ، ދެންމެ ބައެއް ބޭފުޅުން ވިދާޅުވިހެން މީޑިއާތަކުގެ ހެޑްލައިނުތައް ދައްލަތުގެ ރައްޔިތުންގެ ލާރިން ބައްލަވައިގަނެގެން، އަދި ކޮންމެ ގޮތަކަށް ލިޔުއްވިޔަސް، ޤަބޫލުކުރައްވާ އަޅުގަނޑުމެން ހަޔާތުގައި ނުދެކެން ބޭރުގައި މެޗަކުން މޮޅުވެގެން ކާމިޔާބުވެގެން ޓްރޮފީ ހިފައިގެން އައިސް ފިލި ބައެއް މި ނޫނީ އަކާއި. އެހާބޮޑު ކާމިޔާބީއެއް ވެއްޖެއްޔާ މަޖިލީހަށް ވަޑައިގަންނަވަން ވީ ނޫންތޯ؟ އަޅުގަނޑުމެން ހަމަ ރަތް ދޫލައިގައި މަރުހަބާ ކިޔާލާނަމޭ"

އުނގޫފާރު ދާއިރާގެ މެމްބަރު ވަހީދު

ވަހީދު ވިދާޅުވީ 2018 ވަނަ އަހަރު އެމްޑީޕީން ވެރިކަމަށް އައީ ނޫ ކަނޑަށް ނިސްބަތްވާ ނޫ އިޤްތިޞާގެ ފައިދާ ރައްޔިތުންނަށް ހޯދައިދޭނެކަމުގެ ވައުދާއި އެކުގައި ކަމަށެވެ.

އެހެން ނަމަވެސް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ތަންދޮރު އެނގިވަޑައިނުގަންނަވާތީ ނޫ އިޤްތިޞާދުގެ ސިޔާސަތު ތަންފީޒު ނުކުރެއްވުނު ތާގައި، އެމަނިކުފާނު ވަނީ ރާއްޖޭގެ މަސްކަނޑުން ބޮޑު ސަރަހައްދެއް ވިއްކާލާފައި ކަމަށެވެ.

އެއީ ރައްޔިތުން ދުވަހަކުވެސް މާފުކުރާނެ ކަމެއް ނޫން ކަމަށާއި، މި އަހަރުގެ ސެޕްޓެމްބަރު މަހު ނަގާ ވޯޓުން ރައްޔިތުން މި ވެރިކަން ނިންމާނެކަމަށް ވަހީދު ވިދާޅުވި އެވެ.