ފެނަކައިގެ މެނޭޖިން ޑިރެކްޓަރުގެ މަގާމުން އަފީފް ވަކިކޮށްފި
ފެނަކަ ކޯޕަރޭޝަންގެ މެނޭޖިން ޑިރެކްޓަރުގެ މަގާމުގައި ހުންނެވި މުޙައްމަދު އަފީފް އެ މަގާމުން މިއަދު ވަކިކުރައްވައިފި އެވެ.
އެކަން ކުންފުނިތަކުގެ ބެލެނިވެރިފަރާތްކަމުގައިވާ ޕީސީބީން ވަނީ އިއުލާނުކޮށްފަ އެވެ.
ޑިސެންބަރު 23, 2024 ފެނަކައިގެ އެމްޑީގެ މަގާމަށް އައްޔަނު ކުރެއްވި މުހައްމަދު ނަޖާހް އެ މަގާމުން ވަކިކުރެއްވުމަށް ފަހު އެމްޑީގެ މަގާމަށް އަފީފް އައްޔަނުކުރެއްވީ މި އަހަރުގެ އޭޕްރީލް މަހުގެ 27 ވަނަ ދުވަހު އެވެ.
ނަޖާހް ވަކިކުރެއްވީ ސަރުކާރުގެ ހަރަދުތައް ކުޑަކޮށް ސަރުކާރާއި ސަރުކާރު ހިއްސާވާ ކުންފުނިތަކުގެ ހިންގުން ހަރުދަނާ ކުރުމަށް ސަރުކާރުން މުހިންމު ފިޔަވަޅުތަކެއް އަޅުއްވަން ފައްޓަވާފައިވާކަން އިއުލާނު ކުރައްވާފައި ވަނިކޮށެވެ. އެއާއެކު ފެނަކަ ހިމެނޭހެން މުހިންމު ދެތީން ހަތަރު ކުންފުންޏެއްގެ ވެރީން މަގާމުން ވަކިކުރެއްވި އެވެ.
އަފީފަކީ ފެނަކަ ހިންގެވުމަށް މި ސަރުކާރުން އައްޔަނު ކުރެއްވި ތިންވަނަ މެނޭޖިން ޑިރެކްޓަރެވެ. އެންމެ ފުރަތަމަ އެެ މަގާމު ދެއްވީ ކުރީގެ މެންބަރު މުހައްމަދު މުއާޒް ރަޝީދަށެވެ. ނަމަވެސް ޕްރެޝަރު ކުރިމަތިވެ ޑިސެންބަރު 23, 2024 ގައި އޭނާ ވަނީ އެ މަގާމުން އިސްތިއުފާ ދެއްވާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
