ޑިޖިޓަލް ވަސީލަތްތައް ބޭނުންކޮށް ޓްރެފިކް ޤާނޫނު ތަންފީޒުކުރަން ފަށަނީ

އެއްގަމު ދަތުރުފަތުރުގެ ޤާނޫނާ ޚިލާފުވާ އުޅަނދުތަކާއި ފަރާތްތަކާމެދު ޒަމާނީ ޑިޖިޓަލް އަދި އިލެކްޓްރޯނިކް ވަސީލަތްތައް ބޭނުންކޮށްގެން ފިޔަވަޅު އެޅުމުގެ މަސައްކަތް، ކުރިއަށް އޮތް ހަތް ދުވަހުގެ ތެރޭގައި ފެށުމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑުން މިއަދު ނިންމައިފިއެވެ.

އެއްގަމު ދަތުރުފަތުރުގެ ޤާނޫނުގެ 93 ވަނަ މާއްދާއިން ބާރުލިބިގެން، ޤާނޫނު ތަންފީޒުކުރާ މައި އިދާރާގެ ހައިސިއްޔަތުން ދިވެހި ފުލުހުންގެ ޚިދުމަތުން މި ނިޒާމު ހިންގާނީ ޚާއްޞަ އެޕްލިކޭޝަންތަކާއި ޒަމާނީ ޓެކްނޮލޮޖީގެ އެހީގައެވެ. މިގޮތުން، ޤަވާއިދާ ޚިލާފުވެގެން ފިޔަވަޅު އެޅޭ ފަރާތްތަކަށް އެ މަޢުލޫމާތު، އެސްއެމްއެސް (SMS) އަދި އީމެއިލް މެދުވެރިކޮށް ވަގުތުން ފޮނުވަމުންދާނެ ކަމަށް އެ މިނިސްޓްރީން ހާމަކުރެއެވެ.

އެހެންކަމުން، ފިޔަވަޅުތަކާ ގުޅޭ މަޢުލޫމާތު ފަސޭހަކަމާއެކު ލިބޭނެ އިންތިޒާމު ހަމަޖެއްސުމުގެ ގޮތުން، އެންމެހައި ފަރާތްތަކުން ވެސް 'ސިމްސް' (SIMS) ޕޯޓަލް މެދުވެރިކޮށް ފޯނު ނަންބަރާއި އީމެއިލް އެޑްރެސް އަދާހަމަކުރުމަށް މިނިސްޓްރީން ވަނީ އިލްތިމާސްކޮށްފައެވެ.

މާލެއާއި ހުޅުމާލޭގައި ޤަވާއިދާ ޚިލާފަށް ޕާކުކުރާ އުޅަނދުތައް ބަލައި ފިޔަވަޅު އެޅުމުގައި، ފުރަތަމަ މަރުޙަލާގައި ޚާއްޞަ އިސްކަމެއް ދިނުމަށް ކަނޑައަޅާފައިވާ ސަރަޙައްދުތަކަކީ:

• ހޮސްޕިޓަލްތަކާއި ސްކޫލްތައް ހިމެނޭ ސަރަޙައްދުތައް

• ކަފިހިހުރަސްތަކާއި، ޚާއްޞަ އެހީއަށް ބޭނުންވާ ފަރާތްތަކުގެ އުޅަނދުތަކަށް ޚާއްޞަ ސްލޮޓްތައް

• މާލެ: މަޖީދީމަގު، އަމީނީމަގު، ސޯސަންމަގު އަދި ބޮޑުތަކުރުފާނުމަގު

• ހުޅުމާލެ ފޭސް 1: ބޯށިމާ ހިނގުން، ސައިމާ ހިނގުން، ނިރޮޅުމަގު، ހަނދުވަރީ ހިނގުން، ހިތިގަސްމަގު، ބަގީޗާ ހިނގުން އަދި ރީތިގަސްމަގު

• ހުޅުމާލެ ފޭސް 2: ގުލްއަލާމާ ހިނގުން، ނިރޮޅުމަގު، ބެރެބެދިމާ ހިނގުން އަދި ހިތިގަސްމަގު

އެއްގަމު ދަތުރުފަތުރުގެ ނިޒާމު ހަރުދަނާކޮށް މަގުތަކަކީ އެންމެންނަށް އަމާން ރައްކާތެރި ތަނަކަށް ހެދުމަށްޓަކައި، ކަނޑައެޅިފައިވާ ޤާނޫނުތަކާއި ޤަވާއިދުތަކާ އެއްގޮތަށް އުޅަނދުފަހަރު ދުއްވުމަށާއި ބޭނުންކުރުމަށް އެންމެހައި ރައްޔިތުންނަށް އިޤްތިޞާދީ ވުޒާރާއިން ވަނީ އިލްތިމާސްކުރައްވާފައެވެ.