ކޮންމެ ފިޔަވަޅެއް، ނިންމާ ކޮންމެ ނިންމުމެއް ނިންމާނީ ރައްކާތެރިކަން ކަށަވަރުކޮށް ދިނުމަށް: ރައީސް

އަޅުއްވާ ކޮންމެ ފިޔަވަޅެއް، އަދި ނިންމަވާ ކޮންމެ ނިންމެވުމެއް ނިންމަވާނީ ދިވެހި ޤައުމީ އެންމެހާ ބަހާތަކަށް ފުރިހަމަ ދިރުމާއި އާރޯކަމާއި ޙިމާޔަތާއި ރައްކާތެރިކަން ކަށަވަރުކޮށް ދިނުމަށްޓަކާ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ 38 ވަނަ ނަސްރުގެ ދުވަސް ފާހަގަކުރުމުގެ ޖަލްސާގައި ވާހަކަފުޅު ދައްކަވަމުންނެވެ. ރައީސުލްޖުމްހޫރިއްޔާގެ ވާހަކަފުޅުގައި ރާއްޖެއަށް ކުރިމަތިވީ އެކިއެކި އުދުވާނީ ކަންކަމުގައި ކާބަފައިންވެފައިވާ މަތިވެރި ގުރުބާނީގެ ހަނދާން އައު ކުރައްވާ ތައުރީފު ކުރެއްވި އެވެ. 

ރައީސް ވިދާޅުވީ ނޮވެންބަރު ތިނެއް 88 ގެ އުދުވާން ނުދެކޭ ދެ ޖީލެއް މިއަދު އެބަތިބި ކަމަށާ އެ ޒުވާނުންނާއި ކުޑަކުދީންނަށްޓަކައި ރައްކާތެރި ޤައުމެއް ބިނާކޮށްދޭން ޖެހޭ ކަމަށެވެ. އަދި ކާބަފައިންގެ ޤުރުބާނީން ފެންނަން އޮތީ ޤައުމަށް ވަފާތެރިވުމުގެ ބާއްޖަވެރިކަން ކަމުގައި ވިދާޅުވި އެވެ.

"ޤައުމަށް ވަފާތެރިވުމުގެ ނަތީޖާއަކީ އަބަދުވެސް ބާއްޖަވެރިކަން. ޤައުމަށް ޣައްދާރުވުމުގެ ނަތީޖާއަކީ އަބަދުވެސް އަބާޖައްވެރިކަން" ރައީސް ވިދާޅުވި އެވެ.

ރައީސް ވިދާޅުވީ އަޅުއްވާ ކޮންމެ ފިޔަވަޅެއް، އަދި ނިންމަވާ ކޮންމެ ނިންމެވުމެއް ނިންމަވާނީ ދިވެހި ޤައުމީ އެންމެހާ ބަހާތަކަށް ފުރިހަމަ ދިރުމާއި އާރޯކަމާއި ޙިމާޔަތާއި ރައްކާތެރިކަން ކަށަވަރުކޮށް ދިނުމަށްޓަކާ ކަމަށެވެ.

"އަޅުގަނޑު ތިޔަ ބޭފުޅުންނަށް އަރުވާ ފުރިހަމަ ޔަޤީން ކަމަކީ ދިވެހިރާއްޖޭގެ ސައްތައިން ސައްތަ އިސްލާންވަންތަކަން، ދިވެހީންގެ ފުރިހަމަ މިނިވަންކަން، ދިވެހީންގެ އަމިއްލަވަންތަކަން ފަދަ ޤައުމީ އެއްވެސް ރުކުނަކަށް ކުޑަވެސް އުނިކަމެއް އަންނާނެ ގޮތަކަށް އަޅުގަނޑު އެއްވެސް ކަމެއް ނުކުރާނަން" ރައީސް ވިދާޅުވި އެވެ.

އެމަނިކުފާނު ވިދާޅުވީ ތަރައްޤީއަކީ ދިވެހި ކޮންމެ ފަރުދެއްގެ ޙައްޤެއް ކަމަށާ ކުރިއަރައި ދިޔުމަކީ ދިވެހި ޤައުމުގެ ޢިއްޒަތާއި ކަރާމާތް އުފުލިގެންދާނެ ކަމެއް ކަމަށެވެ. އަދި އެއީ ޤައުމަށް ހެޔޮ އެދޭ ކޮންމެ ދިވެއްސެއްގެ އުންމީދު ކަމަށާ އެއީ އެފަދަ ކޮންމެ ދިވެއްސެއްގެ ހިތުގެ ދުޢާ ކަމަށެވެ.

މީގެ އިތުރުން އެމަނިކުފާނު ވަނީ ‏ހަތިޔާރުގެ އަޅުވެތިކަމުން އެ ދުވަހު އަޅުގަނޑުމެން ދިވެހީން މި ޤައުމު މިނިވަންކުރި ފަދައިން، ދަރަނީގެ އަޅުވެތިކަމުން ވެސް ދިވެހި ޤައުމު މިނިވަންކުރަން ޖެހޭ ކަމުގައި ވިދާޅުވެފަ އެވެ. ‏ޤައުމެއްގެ އަމިއްލަ ބަސް ބުނެވެނީ، އަދި އަމިއްލަ ދީނާއި އަމިއްލަ ގޮތްތައް ރައްކާތެރި ކުރެވެނީ، އެ ޤައުމެއްގައި ސަލާންޖަހަން ނުޖެހޭ އިޤުތިޞާދަކަށް ފުރާނައެޅުވިފައި އޮވެގެން ކަމުގައިވެސް ރައީސްގެ ވާހަކަފުޅުގައި ވިދާޅުވި އެވެ.