ދިއްފުށީފަޅުގެ އެއްބަސްވުން ބާތިލްކުރީ ޤާނޫނާ ޚިލާފަށް، އަނބުރާ ހަވާލުކުރަން ހައިކޯޓުން ޙުކުމްކޮށްފި

ފަތުރުވެރިކަމުގެ ބޭނުމަށް 50 އަހަރުގެ މުއްދަތަށް ކ. ދިއްފުށީފަޅު ކުއްޔަށް ދިނުމަށް ސަރުކާރާއެކު ވެފައިވާ އެއްބަސްވުން ބާތިލްކުރީ ޤާނޫނާ ޚިލާފަށް ކަމަށް ކަނޑައަޅައި، އެ ފަޅު އަނބުރާ އޭގެ ޙައްޤުވެރި ފަރާތާ ޙަވާލުކުރުމަށް ހައިކޯޓުން ޙުކުމްކޮށްފިއެވެ.

ވިޔަފާރިވެރިޔާ ޙާމިދު އިސްމާޢީލަށް 2015 ވަނަ އަހަރު، 50 އަހަރުގެ މުއްދަތަކަށް ދިއްފުށިފަޅު ކުއްޔަށް ދޫކުރީ، އޭގެ ކުރިން 'ޑީޑް އޮފް އެސައިންމެންޓް' އެއްގެ ދަށުން އޭނާއަށް ލިބިފައިވާ ކ. ކާށިދުއްފަރު ފަޅުގެ ބަދަލުގައެވެ. ނަމަވެސް، 2017 ވަނަ އަހަރު ސަރުކާރުން ވަނީ އެ އެއްބަސްވުން ބާތިލްކޮށްފައެވެ. ސަރުކާރުގެ އެ ނިންމުމާ ގުޅިގެން ޙާމިދުގެ ފަރާތުން ސިވިލް ކޯޓަށް މައްސަލަ ހުށަހެޅުމުން، އެ ކޯޓުން އޭރު ނިންމީ ސަރުކާރުން އެއްބަސްވުން ބާތިލްކޮށްފައިވަނީ ޤާނޫނާ އެއްގޮތްވާ ގޮތުގެ މަތިން ކަމަށެވެ.

ސިވިލް ކޯޓުގެ އެ ޙުކުމް ޙާމިދުގެ ފަރާތުން ހައިކޯޓުގައި އިސްތިއުނާފު ކުރުމުން، އެ ކޯޓުން މިދިޔަ ބުރާސްފަތި ދުވަހު އިއްވި ޙުކުމުގައި ބަޔާންކޮށްފައިވަނީ، 2015 ވަނަ އަހަރު ވެވުނު އެއްބަސްވުމުގެ ސަބަބުން އޭގެ ކުރީގެ ހުރިހާ އެއްބަސްވުންތަކެއް ބާތިލްވެފައިވާ ކަމަށެވެ. އެހެންކަމުން، ކުރީގެ އެއްބަސްވުންތަކަށް ރިޢާޔަތްކޮށް މިހާރުގެ އެއްބަސްވުން ބާތިލްކުރި ކަމުގެ ނޯޓިސް ސަރުކާރަށް ނުފޮނުވޭނެ ކަމަށާއި، އަދިވެސް ޤާނޫނީ ގޮތުން ދެމިއޮތީ 2015 ގެ އެއްބަސްވުން ކަމަށް ހައިކޯޓުގެ ޙުކުމުގައިވެއެވެ.

މީގެއިތުރުން، އެއްބަސްވުން ބާތިލްކުރި ކަމަށް ބުނެ ނޯޓިސް ފޮނުވުމަށްފަހު، 2018 ވަނަ އަހަރު ސަރުކާރުން އެ ފަޅު އެހެން ބަޔަކަށް ކުއްޔަށް ދީފައިވީ ނަމަވެސް، ޙާމިދާއެކު ވެފައިވާ އަސްލު އެއްބަސްވުން އަދިވެސް ދެމިއޮތްކަން ހައިކޯޓުން ވަނީ ފާހަގަކޮށްފައެވެ. އަދި އެ މަޝްރޫޢަށް އޭނާ ބޮޑެތި ޚަރަދުތަކެއް ކޮށްފައިވާތީ، އެތަން އޭނާއަށް އަނބުރާ ނުދީފިނަމަ، ދައުލަތުން ދައްކަންޖެހޭ ބަދަލުގެ މިންވަރު އިންތިހާއަށް އިތުރުވެގެން ހިނގައިދާނެ ކަމަށްވެސް އެ ޙުކުމުގައި ބަޔާންކޮށްފައިވެއެވެ.

އެހެންކަމުން، ސަރުކާރުން އެއްބަސްވުން ބާތިލްކުރުމަށް ފޮނުވި ނޯޓިހަކީ ޞައްޙަ ނޫން ބާތިލް ނޯޓިހެއް ކަމަށާއި، ޙާމިދާއެކު ވެފައިވާ އެއްބަސްވުން އަދިވެސް ޤާނޫނީ ގޮތުން ސައްޙަކަމާއެކު ދެމިއޮތް ކަމަށް ހައިކޯޓުން ވަނީ ކަނޑައަޅައިފައެވެ.

މި މައްސަލަ ހައިކޯޓުގައި ބެއްލެވީ ފަނޑިޔާރު ޙަސަން ޝަފީޢު، އިސްފަނޑިޔާރު ޢަބްދުﷲ ޖަމީލް މޫސާ އަދި ފަނޑިޔާރު މުޙައްމަދު ޝަނީޒް ޢަބްދުﷲ އެވެ. ބެންޗުގެ ރިޔާސަތު ބެލެހެއްޓެވި ފަނޑިޔާރު ޙަސަން ޝަފީޢުގެ ރައުޔަކީ ސިވިލް ކޯޓުގެ ޙުކުމް ދެމެހެއްޓުން ކަމަށް ވީނަމަވެސް، މި މައްސަލަ ނިމިގެން ދިޔައީ އަނެއް ދެ ފަނޑިޔާރުންގެ އަޣުލަބިއްޔަތުންނެވެ.