ނޮވެމްބަރު ތިނަކީ މިނިވަންކަމާއި އަމިއްލަވަންތަކަމާއި ސިޔާދަތަށް ދިވެހިން ލޯބިކުރާ މިންވަރު ސާބިތުވެގެންދިޔަ ދުވަހެއް: ރައީސް މައުމޫން

ދިވެހިން މިއަދު ފާހަގަކުރަމުންދާ ނޮވެމްބަރު ތިނެއް ހާދިސާ ކުރިމަތިވި ދުވަހަކީ ދިވެހިރާއްޖޭގެ މިނިވަންކަމާއި، އަމިއްލަވަންތަކަމާއި، ސިޔާދަތަށް ދިވެހި ރައްޔިތުން ލޯބިކުރާ މިންވަރު މުޅި ދުނިޔެއަށް ސާބިތުވެގެންދިޔަ ދުވަހެއް ކަމަށް ކުރީގެ ރައީސް އަލްއުސްތާޛް މައުމޫން ޢަބްދުލްޤައްޔޫމް ވިދާޅުވެއްޖެއެވެ.

މިއަދު ފާހަގަކުރަމުންދާ ނޮވެމްބަރު ތިނެއްގެ ނަޞްރުގެ ދުވަހުގެ މުނާސަބަތުގައި ރައީސް މައުމޫން ދެއްވި ޚާއްޞަ މެސެޖެއްގައި ވިދާޅުވީ، މިއަދަކީ ދިވެހި ރައްޔިތުންގެ ހިތްތަކުގައި ޤައުމީ ލޯތްބާއި ޤައުމީ ޝުޢޫރުތައް އުތުރިއަރައިގެންދާ ފަދަ ތާރީޚީ މުހިންމު ދުވަހެއް ކަމަށެވެ. އަދި މިއީ ދިވެހިންގެ ކެރުމާއި، ހިތްވަރާއި، ފަންވަރު އެންމެ ފުރިހަމަ ގޮތުގައި މުޅި ދުނިޔެއަށް ވިދާ ބަބުޅައިގެން ދިޔަ ދުވަހެއް ކަމުގައިވެސް އެމަނިކުފާނު ފާހަގަކުރެއްވިއެވެ.

ރައީސް މައުމޫން އިތުރަށް ފާހަގަކުރެއްވި ގޮތުގައި، ދިވެހިންގެ މިނިވަންކަމާއި ސިޔާދަތުގެ ދިފާޢުގައި ދިވެހި ލޮބުވެތި ރައްޔިތުން ދެއްކެވި ސާބިތުކަމަކީ މީގެ 38 އަހަރު ކުރިން، 1988 ވަނަ އަހަރުގެ ނޮވެމްބަރު ތިންވަނަ ދުވަހު ދިވެހިން އަމަލީ ގޮތުން ދުނިޔެއަށް ސާބިތުކޮށްދެއްވާފައިވާ ފަނޑުވުމެއްނެތް ޙަޤީޤަތްތަކެކެވެ.

ނަޞްރުގެ ދުވަހުގެ މި އުފާވެރި މުނާސަބަތުގައި ރައީސް މައުމޫން ވަނީ ލޮބުވެތި އެންމެހާ ދިވެހި ރައްޔިތުންނަށް ދުވަހުގެ އިޚްލާޞްތެރި ހެޔޮއެދުންތައް އަރިސްކުރައްވާފައެވެ.

އެމަނިކުފާނުގެ މެސެޖު ނިންމަވާލައްވަމުން ވަނީ، ފުރިހަމަ މިނިވަން މުސްލިމް ޤައުމެއްގެ ގޮތުގައި ދިވެހިރާއްޖެ އަބަދަށްޓަކައި ލެހެއްޓެވުން އެދި މާތް ﷲ ގެ ޙަޟްރަތުގައި ދުޢާ ދަންނަވާފައެވެ.

ނޮވެމްބަރު ތިނެއްގެ ހާދިސާ ހިނގިއިރު ރައީސް މައުމޫނަކީ އޭރުގެ ރައީސުލްޖުމްހޫރިއްޔާއެވެ. ލަންކާގެ ތަމަޅައިންގެ ބަޔަކު ރާއްޖެ ހިފުމަށްކުރި މަސައްކަތް ނާކާމިޔާބުވުމުގައި އޭރުގެ ހާރިޖީ ގުޅުމުގެ ތެރެއިން ކުރެވިގެންދިޔަ އަވަސް މަސައްކަތްތަކަކީ ރާއްޖޭގެ ތާރީހުގައި ފާހަގަކޮށްލެވޭ މުއާމަލާތްތަކެކެވެ.