ނަޞްރުގެ ދުވަހުގެ ތަހުނިޔާ ރައީސުލްޖުމްހޫރިއްޔާގެ އަނބިކަނބަލުން ފޮނުއްވައިފި

ދިވެހިރާއްޖޭގައި މިއަދު ފާހަގަކުރަމުންދާ ނަޞްރުގެ ދުވަހުގެ މުނާސަބަތުގައި، ދިވެހި ސިފައިންނަށާއި އެންމެހައި ލޮބުވެތި ރައްޔިތުންނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަނބިކަނބަލުން، މެޑަމް ސާޖިދާ މުޙައްމަދު ތަހުނިޔާއާއި ހެޔޮއެދުންތައް ފޮނުއްވައިފިއެވެ.

ފަސްޓް ލޭޑީ ނަޞްރުގެ ދުވަހުގެ ތަހުނިޔާ ފޮނުއްވާފައިވަނީ މިއަދު އެކަމަނާގެ ސޯޝަލް މީޑިއާ އެކައުންޓްތައް މެދުވެރިކުރައްވައި ހިއްސާކުރެއްވި ޕޯސްޓެއްގައެވެ.

އެކަމަނާގެ މެސެޖުގައި، ދިވެހި ޤައުމުގެ ޙައްޤުގައި މަތިވެރި ޖިހާދުކުރެއްވި ހިތްވަރުގަދަ ބަޠަލުންނާއި، ޤައުމަށްޓަކައި ފުރާނައިން ޤުރުބާންވި މާތް ޝަހީދުންގެ ޒިކުރާ އައުކުރައްވައި، އެ ބޭފުޅުންނަށް ހެޔޮ ރަޙްމަތް ލެއްވުން އެދި ދުޢާ ދަންނަވާފައިވެއެވެ. މީގެއިތުރުން، ދިވެހިރާއްޖެ މިނިވަންކަމާއި ސިޔާދަތުގެ މަތިވެރި ނިޢުމަތުގެ މަތީގައި އަބަދުމެ ލެހެއްޓެވުން އެދިވަޑައިގެން ވެސް އެކަމަނާ ވަނީ ދުޢާ ކުރައްވާފައެވެ.

ދިވެހިރާއްޖޭގައި ނަޞްރުގެ ދުވަސް ކުލަގަދަކޮށް ފާހަގަކުރަނީ 1988 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހު، ދިވެހިންގެ މަދު ޚާއިނުންތަކަކާ ގުޅިގެން ސްރީލަންކާގެ ޓެރަރިސްޓް ޖަމާޢަތެއް ކަމަށްވާ "ޕްލޮޓް"ގެ ހަނގުރާމަވެރިން މާލެއަށް ދިން ނުރައްކާތެރި ޢުދުވާނީ ޙަމަލާއިން ދިވެހި ޤައުމު ސަލާމަތްވި ދުވަހުގެ ޒިކުރާ އައުކުރުމުގެ ގޮތުންނެވެ.

އެ ދުވަހު ދިވެހި އަސްކަރިއްޔާގެ މައި މަރުކަޒަށް ވަނުމަށް ބާޣީން ކުރި އެންމެހައި މަސައްކަތްތައް ދިވެހި ސިފައިން ވަނީ ވަރުގަދަ ޢަޒުމަކާއެކު ނާކާމިޔާބުކޮށްލާފައެވެ. ނޮވެމްބަރު ތިނެއްގެ މި ހިތާމަވެރި ޙާދިސާގައި ޤައުމުގެ ދިފާޢުގައި ހަނގުރާމަކުރި ސިފައިންގެ 8 ބޭކަލުންނާއި، ކުށެއްނެތް ޢާންމު ރައްޔިތުންގެ 11 ބޭފުޅުން ހިމެނޭހެން ޖުމްލަ 19 ދިވެހިން ވަނީ ޝަހީދުވެފައެވެ.