މުޒާހަރާ އާ ގުޅިގެން ބަންގްލަދޭޝްގެ ގިނަ ފެކްޓްރީތަކެއް ބަންދު

މުސާރަ ބޮޑުކުރުމަށް ގޮވާލައި ބަންގްލަދޭޝްގެ ގާމެންޓް ފެކްޓްރީތަކުގެ މަސައްކަތްތެރިން ކުރަމުންދާ ސިލްސިލާ މުޒާހަރާތަކާ ގުޅިގެން، އެ ގައުމުގެ އެތައް ސަތޭކަ ފެކްޓްރީއެއް ބަންދުކޮށްފިއެވެ.

މިދިޔަ އާދިއްތަ ދުވަހު ވެރިރަށް ޑާކާގައި ފެށި މި މުޒާހަރާތައް ވަނީ ބޮޑެތި ހަމަނުޖެހުންތަކަކަށް ބަދަލުވެފައެވެ. އެގޮތުން މުޒާހަރާގެ ބައިވެރިން މަގުތައް ބަންދުކޮށް، ބައެއް ފެކްޓްރީތަކަށް ގެއްލުންދީ، އުޅަނދުފަހަރުގައި ހުޅުޖަހާފައިވެއެވެ. މި ހަމަނުޖެހުންތައް ކޮންޓްރޯލްކޮށް، މުޒާހަރާގެ ބައިވެރިން ރޫޅާލުމަށް ފުލުހުން ވަނީ ކަރުނަގޭސް ބޭނުންކޮށްފައެވެ. ޑާކާ ފުލުހުންގެ ޑެޕިއުޓީ ކޮމިޝަނަރު މުހިދުލް އިސްލާމް ވިދާޅުވި ގޮތުގައި، ހޯމަ ދުވަހާ ހަމައަށް މަދުވެގެން 29 މީހަކު ވަނީ ހައްޔަރުކޮށްފައެވެ. އަދި ގާމެންޓް ސިނާއަތުގައި ގަސްދުގައި ނުތަނަވަސްކަން އުފައްދަން އުޅޭ ފަރާތްތަކާ މެދު ގާނޫނީ ހަރުކަށި ފިޔަވަޅު އަޅާނެ ކަމަށް ވެސް އޭނާ ވިދާޅުވިއެވެ.

މަސައްކަތްތެރިން މުޒާހަރާއަށް ނުކުތީ ދިރިއުޅުމުގެ ހަރަދުތައް އިންތިހާއަށް ބޮޑުވަމުންދާތީއެވެ. އެމީހުން ޑިމާންޑް ކުރަމުންދަނީ މަހެއްގެ މައްޗަށް އެންމެ ކުޑަ އުޖޫރައިގެ ގޮތުގައި 30،000 ޓާކާ (242 ޑޮލަރު) ކަނޑައަޅައިދިނުމަށެވެ. މިއީ މިހާރު އެމީހުންނަށް ލިބޭ 13,000 ޓާކާ (105 ޑޮލަރު) އާ އަޅާބަލާއިރު ދެގުނައަށްވުރެ ބޮޑު އަދަދެކެވެ.

އުމުރުން 28 އަހަރުގެ ފެކްޓްރީ މަސައްކަތްތެރިއަކު އޭ.އެފް.ޕީ އަށް މައުލޫމާތު ދެމުން ބުނީ، ކާބޯތަކެއްޗާއި، ކައްކާ ގޭހާއި ކަރަންޓު ބިލްތައް އިންތިހާއަށް އުފުލިފައިވާ ކަމަށެވެ. އަދި ސަރުކާރުން ޖެހޭނީ ތަކެތީގެ އަގު ތިރިކުރަން ނުވަތަ މުސާރަ ބޮޑުކޮށްދޭން ކަމަށް އޭނާ ބުންޏެވެ. ބީ.ބީ.ސީ ބަންގްލާ އާ ވާހަކަދެއްކި އަންހެން މަސައްކަތްތެރިއަކު ވެސް ވަނީ މުސާރަ ބޮޑުކޮށްދިނުމުގެ އިތުރުން، ގޭގެ ކުލި ބޮޑުނުކުރުމަށް ގޭގެ ވެރިންނަށް އެންގުމަށާއި އަސާސީ މުދަލުގެ އަގުތައް ކޮންޓްރޯލް ކުރުމަށް ސަރުކާރަށް ގޮވާލާފައެވެ.

މި މައްސަލައަށް ހައްލެއް ހޯދުމުގެ ގޮތުން، މަސައްކަތްތެރިންގެ މުސާރަ މުރާޖައާކުރާނެ ހާއްސަ ބޯޑެއް އެކުލަވާލާފައިވާ ކަމަށް ސަރުކާރުން އާދިއްތަ ދުވަހު ވަނީ އިއުލާނުކޮށްފައެވެ. އަދި ބޮޑުވަޒީރު ތާރިގު ރަހުމާން ވަނީ މި ހަމަނުޖެހުންތަކާ ގުޅިގެން ކެބިނެޓް ވަޒީރުންނާއެކު ކުއްލި ބައްދަލުވުމެއް ބާއްވަވާފައެވެ. ނަމަވެސް، ހޯމަ ދުވަހު ވެސް ޑާކާގެ އިތުރުން މައި އިންޑަސްޓްރިއަލް ސަރަހައްދުތައް ކަމަށްވާ އަޝޫލިއާ، ގާޒީޕޫރު އަދި ނަރަޔަންގަންޖްގައި މުޒާހަރާތައް ކުރިއަށްދިޔައެވެ. ރޮއިޓާސް އަދި އޭ.އެފް.ޕީގެ ރިޕޯޓްތައް ބުނާގޮތުން، ހޯމަ ދުވަހު އެކަނިވެސް ގާތްގަނޑަކަށް 670 ފެކްޓްރީއެއްގެ މަސައްކަތް ހުއްޓުމަކަށް އައިއިރު، އަންގާރަ ދުވަހު ވެސް އެތައް ސަތޭކަ ފެކްޓްރީއެއް އޮތީ ބަންދުކޮށްފައެވެ.

މި ހަމަނުޖެހުންތަކުގެ ފަހަތުގައި ސިޔާސީ ނުފޫޒު އޮތް ކަމަށް ސަރުކާރުގެ ކަމާބެހޭ ފަރާތްތަކުން ތުހުމަތު ކުރެއެވެ. އެގޮތުން، ކުރީގެ ލީޑަރު ޝައިޚް ހަސީނާގެ މަނާކުރެވިފައިވާ ޕާޓީ، އަވާމީ ލީގުން މި މުޒާހަރާތަކުގެ ނާޖާއިޒު ފައިދާ ނަގައި ހަމަނުޖެހުން އުފައްދަން މަސައްކަތް ކުރާ ކަމަށް ތުހުމަތު ކުރެވުނު ނަމަވެސް، މިކަމުގެ އެއްވެސް ހެއްކެއް އަދި ދައްކާފައެއް ނުވެއެވެ. ހޯމް މިނިސްޓަރު ސަލާހުއްދީން އަހުމަދު ވަނީ "މަސައްކަތްތެރިންގެ މުޒާހަރާގެ ނަމުގައި" ގައުމުގެ ހަމަޖެހުން ނަގާލަން އުޅޭ ފަރާތްތަކަށް ހަރުކަށި ފިޔަވަޅު އަޅާނެ ކަމުގެ އިންޒާރު ދެއްވާފައެވެ.

އަނެއްކޮޅުން، މުސާރަ ކަނޑައަޅާ ބޯޑުގައި ހިމެނޭ މަސައްކަތްތެރިންގެ މަންދޫބު ބާބުލް އަޚްތަރު ވަނީ، މަސައްކަތްތެރިންނަށް އިންސާފުވެރި މުސާރައެއް ހޯދައިދިނުމަށް ސަރުކާރާއެކު މަސައްކަތް ކުރާނެ ކަމުގެ ޔަގީންކަން ދެއްވައި، އެއްވެސް ބައެއްގެ ސިޔާސީ މަޅީގައި ނުޖެހި އަލުން ވަޒީފާއަށް ނުކުތުމަށް މަސައްކަތްތެރިންނަށް ގޮވާލައްވާފައެވެ.

ގާތްގަނޑަކަށް ހަތަރު މިލިއަން މަސައްކަތްތެރިން ހަރަކާތްތެރިވާ ބަންގްލަދޭޝްގެ ފޭރާމުގެ ސިނާއަތަކީ އެ ގައުމުގެ އިގްތިސާދުގެ މައިބަދައެވެ. އަހަރަކު ގާތްގަނޑަކަށް 40 ބިލިއަން ޑޮލަރުގެ އާމްދަނީއެއް ހޯދައިދޭ މި ދާއިރާއަކީ ގައުމުގެ ޖީ.ޑީ.ޕީގެ 10 އިންސައްތައެވެ. ޗައިނާއަށް ފަހު ދުނިޔޭގައި ދެވަނައަށް އެންމެ ގިނައިން އަންނައުނު އެކްސްޕޯޓްކުރާ ބަންގްލަދޭޝްއިން ދަނީ އެޗް އެންޑް އެމް، ޕްރައިމާކް އަދި ޔުނިކްލޯ ފަދަ ދުނިޔޭގެ މަޝްހޫރު ބްރޭންޑްތަކަށް އަންނައުނު އުފައްދައިދެމުންނެވެ. ނަމަވެސް، މި މުޒާހަރާތަކުގެ ސަބަބުން އުފެއްދުންތެރިކަމަށް ބުރޫއަރައި، ބައިނަލްއަގުވާމީ ގަންނަ ފަރާތްތަކުގެ އިތުބާރު ގެއްލިދާނެ ކަމުގެ ބިރު ބޮޑުވެފައިވާ ކަމަށް އެ ގައުމުގެ ދައުލަތުގެ މީޑިއާ ބީ.އެސް.އެސް އިން ވަނީ ރިޕޯޓްކޮށްފައެވެ.