ނަތީޖާ އާއި މެދު ހިތްހަމަ ނުޖެހުނަސް އިތުރަށް އެއްޗެއް ދަންނަވާކަށް ނޭދެން: އަމްރު
އިއްޔެ ބޭއްވުނު ޑިމޮކްރެޓްސް ގެ އެތެރޭގެ އިންތިހާބުގެ ނަތީޖާއާއި މެދު ހިތްހަމަނުޖެހުނު ނަމަވެސް އެ ކަމާއި މެދު އިތުރަށް އެއްޗެއް ދަންނަވަން ބޭނުންފުޅު ނުވާ ކަމަށް ޑިމޮކްރެޓްސްގެ ރައީސްގެ މަގާމަށް ވާދަކުރެއްވި ހަސަން އަމްރު ވިދާޅުވެއްޖެއެވެ.
މިހެން ވިދާޅުވެ އަމްރު ވަނީ އެކްސްގައި ޕޯސްޓެއްގައެވެ.
އޭނާ ވިދާޅުވި ގޮތުގައި، އިންތިހާބަކާއި ކުރިމަތިލަނީ އިންތިހާބުގައި މޮޅުވާ ފަރާތަކާއި ބަލިވާ ފަރާތެއް ވާނެކަން އެނގި ހުރެ ކަމަށެވެ. މިގޮތުން ވަރަށް ގިނަ އިންތިހާބުތަކެއްގައި ކުރިމަތި ލެވިއްޖެ ކަމަށާއި، އޭގެތެރެއިން އެއްބައި އިންތިހާބުތައް ކާމިޔާބު ކުރެވުނު އިރު ނާކަމިޔާބީ އާއި ވެސް ކުރިމަތިލާން ޖެހުނު ނަަމަވެސް، އެކަމާއިމެދު ޝަކުވާނުކުރައްވާ ކަމަށްވެސް އަމްރު ފާހަގަ ކުރެއްވިއެވެ.
އޭނާ އަކީ ދޫ ދޭން ޖެހޭތާ ބޮޑުކޮށް ދޫދީ، އަސާސް ތަކުގައި ހިފަހައްޓާ މީހެއްކަން ފާއިތުވި 15 އަހަރަށް ވުރެ ގިނަ ދުވަހު އަމްރާއި އެކު ސިޔާސީ މަސައްކަތް ކުރެއްވި ބޭފުޅުންނަށް އެނގިވަޑައިގަންނަވާނެ ކަމަށްވެސް އަމްރު ކުރެއްވި ޓްވީޓްގައި ވެއެވެ.
"މަސްލަހަތަށް ޓަކައި ފަސް ޖެހުމަކީ އަޅުގަނޑު ނުކުރާ ކަމެއްނޫން. އެއީ މި މަސައްކަތަކީ އަޅުގަނޑުވެސް ލޯތްބާއި ގުރުބާނީ އާއި އެކު ކުރި މަސައްކަތެއް ވީމަ. ނަމަވެސް ކަމެއް ގޯހުން ދާ ކަަމަށް ފާހަގަ ވުމުން އެވާހަކަ ވެސް ސީދަލަށް ބުނަން. އެއީ އެންމެންގެ ވެސް ރަނގަޅަކަށް. "
އަމްރު ވިދާޅުވިއެވެ.
މި ޓްވީޓް ގައި އަމްރު ވަނީ އެބޭފުޅާ އާއި އެކު މި އިންތިހާބުގައި ބުރަ މަސައްކަތް ކުރެއްވި ފަރާތްތަކަށާއި ކެމްޕޭން ކުރުމުގައި ހަރަކާތްތެރިވި ސޯޝަލް މީޑިއާގެ ޓީމުގެ އިތުރުން އެބޭފުޅާ އަށް ވޯޓުދެއްވި ހުރިހާ އެންމެނަށް ޝުކުރު އަދާކުރައްވާފައެވެ.
އިއްޔެ ކުރިއަށް ގެންދިޔަ އެ ޕާޓީގެ އިންތިހާބުގެ ނަތީޖާ ލަސްވުމާ ގުޅިގެން، އެ ޕާޓީގެ އާންމު މެމްބަރުން ކަންބޮޑުވުން ފާޅުކުރަމުން ދަނިކޮށް އިންތިހާބު ކާމިޔާބުވެއްޖެ ކަމަށް ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ރޭ އިއުލާން ކުރައްވާފައި ވާ ކަންވެސް ފާހަގަ ކޮށްލަން ޖެހެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
