ރައީސް ނަޝީދު އުފެއްދެވި ދަ ޑިމޮކްރެޓްސްއާ އެމްއެލްއެސްޑީޕީ އުވާލައިފި
ދަ ޑިމޮކްރެޓްސްއާ މޯލްޑިވްސް ލޭބަރ އެންޑް ސޯޝަލް ޑިމޮކްރަޓިކް ޕާޓީ (އެމްއެލްއެސްޑީޕީ) އުވާލައިފި އެވެ.
އެކަން އިލެކްޝަންސް ކޮމިޝަނުން ދެންމެ ވަނީ އިއުލާނު ކޮށްފަ އެވެ. އެ ކޮމިޝަނުން ބުނީ ސިޔާސީ ޕާޓީގެ ގާނޫނުގެ 30 ވަނަ މާއްދާގައިވާ ގޮތުގެމަތިން ސިޔާސީ ޕާޓީއެއް ދެމިއޮތުމަށް ގާނޫނު ލާޒިމުކުރާ 3000 މެންބަރުން ހަމަކުރުމަށް ދިން މުއްދަތުގައި 3000 މެންބަރުން ހަމަވެފައިނުވާތީ، މިއަދުން ފެށިގެން މޯލްޑިވްސް ލޭބާ އެންޑް ސޯޝަލް ޑިމޮކްރަޓިކް ޕާޓީ އާއި ދަ ޑިމޮކްރެޓްސް އުވާލައި އެ ޕާޓީތައް ސިޔާސީ ޕާޓީގެ ދަފްތަރުން އުނިކުރުމަށް ކޮމިޝަނުން ނިންމާފައިވާ ކަމަށެވެ.
ދަ ޑިމޮކްރެސް އުފެއްދީ ކުރީގެ ރައީސް މުހައްމަދު ނަޝީދާއި ރައީސް އިބްރާހިމް މުހައްމަދު ސޯލިހްގެ ގުޅުން ގޯސްވެ ނަޝީދުގެ ފެކްޝަންގެ މެންބަރުން އެ ޕާޓީން ވަކިވުމަށް ފަހު އެވެ. އޭރު ނަޝީދު ވިދާޅުވީ އެމްޑީޕީ "ރޫޅާލާނަން" ކަމަށެވެ.
ނަމަވެސް ފަހުން ވަނީ އެމްޑީޕީއާ ގުޅިވަޑައިގެންފަ އެވެ. އެމަނިކުފާނު މިހާރު ގެންދަަވަނީ އެމްޑީޕީގެ ޗެއާޕާސަން ކަމަށް ވާދަ ކުރައްވަމުންނެވެ.
އެމްއެލްއެސްޑީޕީ އަކީ ގާނޫނީ ވަކީލް އަބްދުﷲ ހަސީން އިސްވެ އުފެއްދެވި ޕާޓީ އެކެވެ. އޭރު އެ ޕާޓިގައި އިސްކޮށް ތިއްބެވި ބޭފުޅުންގެ ތެރޭގައި މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވެސް ހިމެނެ އެވެ.
އޭނާ ފަހުން ވަނީ އެ ޕާޓީން ވަކިވެ އެމްޑީޕީއާ ގުޅިފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
