އިންޑިއާ ސަރުކާރުގެ އެހީގައި ރާއްޖޭގައި އިތުރު 10 މަޝްރޫޢުއެއް

އިންޑިއާ ސަރުކާރުގެ އެހީގައި ރާއްޖޭގައި އިތުރު 10 މަޝްރޫޢެއް ހިންގުމުގެ އެއްބަސްވުމުގައި ދިވެހިރާއްޖެއާއި އިންޑިއާ ސަރުކާރާއި ދެމެދު ސޮއިކުރައްވައިފިއެވެ.

އިންޑިއާ ސަރުކާރުން ހިންގާ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސްގެ ތެރެއިން ހިންގުމަށް ހަމަޖެހިފައިވާ މި 10 މަޝްރޫޢާއި ގުޅޭ އެއްބަސްވުމުގައި އިންޑިއާ ސަރުކާރާއި ދިވެހި ސަރުކާރާއި ދެމެދު ސޮއިކޮށްފައިވަނީ އެކަމަށްޓަކާ ފޮރިން މިނިސްޓްރީގައި ބޭއްވި ޚާއްސަ ރަސްމިއްޔާތެއްގައެވެ.

މި ރަސްމިއްޔާތުގައި އިންޑިއާގެ މިނިސްޓަރ އޮފް ސްޓޭޓް ފޮރ އެކްސްޓަރނަލް އެފެއަރޒް ވީ.މުރަވީދަރަންއާއި ރާއްޖޭގެ ފޮރިން މިނިސްޓަރ ޢަބްދުالله ޝާހިދު ވަނީ ބައިވެރިވެވަޑައިގެންފައެވެ.

މިއަދު ސޮއި ކުރެވުނު އެއްބަސްވުންތަކާއި ގުޅޭ ގޮތުން މައުލޫމާތު ދެއްވަމުން ޝާހިދު ވިދާޅުވީ، އެތަނުން ގިނަ ޕްރޮޖެކްޓުތަކަކީ ކުޅިވަރާއި ދުޅަހެޔޮ މުޖުތަމަޢެއް ބިނާކުރުމާ ގުޅުން ހުރި ދާއިރާތަކުގެ ޕްރޮޖެކްޓުތައް ކަމަށެވެ.

އެގޮތުން އައްޑޫ ސިޓީ ހިތަދޫ ބޭރުމަތި ދާއިރާއާއި ހިތަދޫ ރަސްގެދަރަ ދާއިރާގައާއި ގދ. ވާދޫ އަދި ހއ. ދިއްދޫގައި އައުޓްޑޯ ޖިމް ޤާއިމް ކުރުމަށް ވެވުނު އެއްބަސްވުމާއި، ށ.މިލަންދޫ ގައި ދުވުމަށް ޚާއްސަކޮށްގެން ޓްރެކެއް ޤާއިމްކުރުމަށް ވެވުނު އެއްބަސްވުން ހިމެނެއެވެ. ޝާހިދު ވިދާޅުވީ މި އެމް.އޯ.ޔޫ.ތަކުގެ ސަބަބުން، ކުޅިވަރު ތަރައްޤީކުރުމަށާއި ދުޅަހެޔޮކަން އިތުރުކުރުމަށާއި އިޖްތިމާޢީ ރޫޙު އާލާކުރުމަށް އިތުރު ފުރުޞަތުތަކެއް ހުޅުވިގެންދާނެ ކަމަށެވެ.

މި ދެ އެއްބަސްވުމުގެ އިތުރުން ތަޢުލީމީ ދާއިރާއާ ގުޅޭ 2 ޕްރޮޖެކްޓެއް އިންޑިއާގެ ހިލޭ އެހީގެ ދަށުން ހިންގުމަށް މިއަދު ވަނީ ސޮއިކޮށްފަ އެވެ. އެއީ:

1- ފުވައްމުލައް ސިޓީ، ކުޅުދުއްފުށި ސިޓީ، ނ. ކެނދިކުޅުދޫ އަދި ލ.ގަމުގެ ޖުމްލަ 4 ސްކޫލަކަށް ބަސް ހޯދުމަށް

2- ލ. އަތޮޅު ތަޢުލީމީ މަރުކަޒުގައި ސްކޫލް ޑިޖިޓަލައިޒޭޝަން ޕްރޮގްރާމް ހިންގުމަށް

ޝާހިދު ވިދާޅުވީ މި ޕްރޮޖެކްޓްތަކުގެ ސަބަބުން ސްކޫލަށް ދިއުމުގައި ހުރި ދަތިތަކަށް ހައްލެއް ލިބި، ޒަމާނީ ތަޢުލީމީ ވަޞީލަތްތަކާއި އުކުޅުތަކަށް ވާޞިލްވުމަށް މަގުފަހިވެގެންދާނެ ކަމަށެވެ.

އިންޑިއާގެ ހިލޭ އެހީގައި މާލޭގައި އާޓްސް ސެންޓަރެއް ގާއިމް ކުރުމަށްވެސް މިއަދު އެއްބަސްވުމަކަށް އައިސްފައިވާއިރު އޭގެ ސަބަބުން ދިވެހި ސަޤާފަތާއި ފައިން އާޓްސް ދިރުވައި އާލާކުރުމަށް މަގުފަހިވެގެންދާނެ ކަމަށާ މި އެއްބަސްވުމަކީ ދެޤައުމުގެ ދެމެދުގައި ޘަޤާފީ ރޮނގުން އޮތް އެއްބާރުލުން ރަމްޒުކޮށްދޭ ހެއްކެއް ކަމަށް ޝާހިދު ވިދާޅުވި އެވެ.

މީހެ އިތުރުން، އިންޑިއާގެ ހިލޭ އެހީގެ ދަށުން ޢަބްދުއްޞަމަދު މެމޯރިއަލް ހޮސްޕިޓަލުގައި މެންޓަލް ހެލްތު ޔުނިޓެއް ގާއިމް ކުރުމަށްވެސް މިއަދު ވަނީ އެއްބަސްވެފައެވެ. މީގެ ސަބަބުން މުޖުތަމަޢުގެ ނަފްސާނީ ދުޅަހެޔޮކަން އިތުރުކުރުމަށް ސަރުކާރުން ކުރާ މަސައްކަތްތަކައް އިތުރު ކުރިއެރުމެއް ލިބިގެންދާނެ ކަމަށް ޝާހިދު ވިދާޅުވި އެވެ.

‏މި ޕްރޮޖެކްޓް ތަކާއިއެކު ޅ. ހިންނަވަރުގެ ކައުންސިލް އިދާރާ ހިންގުމަށް އައު އިމާރާތެެއް އިންޑިއާގެ ހިލޭ އެހީގެ ދަށުން އިމާރާތްކުރުމަށްވެސް މިއަދުވަނީ ސޮއިކުރެވިފައެވެ.

މި ރަސްމިއްޔާތުގައި މި 10 މަޝްރޫޢުގެ އެއްބަސްވުމުގައި ސޮއިކުރެއްވުމުގެ އިތުރުން އިންޑިއާ ސަރުކާރުގެ ފަރާތުން ރާއްޖޭގެ ހެލްތު މިނިސްޓްރީއަށް އެންޓި ޓީބީ މެޑިސިންވެސް ވަނީ ހަދިޔާކުރައްވާފައެވެ. އެ އެންޓި ޓީ.ބީ. ބޭހަކީ އިންޑިއާ އިން ރާއްޖޭގެ ސިއްޙީ ދާއިރާއަށް ވެދެމުން އަންނަ ގިނަގުނަ އެހީތަކަށް އިތުރު ވެގެންދިޔަ ބޮޅެއް ކަމަށް ޝާހިދު ވަނީ ވިދާޅުވެފަ އެވެ.