މިމަހު 12 އިން ފެށިގެން ދިވެހި ޙައްޖާޖީން ފުރަންފަށާނެ: އިސްލާމިކް މިނިސްޓްރީ

މި ހިނގާ ޖޫން މަހުގެ 12 ވަނަ ދުވަހުން ފެށިގެން ދިވެހި ޙައްޖާޖީން ޙައްޖު ދަތުރަށް ފުރަންފަށާނެ ކަމަށް އިސްލާމިކް މިނިސްޓްރީ އިން ބުނެފިއެވެ. އިސްލާމިކް މިނިސްޓްރީ އިން ބުނީ 1444ވަނަ އަހަރު ޙައްޖުގެ މަތިވެރި އަޅުކަން އަދާކުރުމަށް ރާއްޖެއިން ޙައްޖަށްދާ ޙައްޖާޖީން މި މަހުގެ 12 ވަނަ ދުވަހުން ފެށިގެން ފުރަން ފަށާނެ ކަމަށެވެ.

އަދި މިފަހަރު ޙައްޖާޖީން ފުރަން ހަމަޖެހިފައިވަނީ 6 ފްލައިޓެއްގައި ކަމަށް އެމިނިސްޓްރީ އިން ބުނެއެވެ. އަދި އެއީ  ޖޫންމަހުގެ 12، 13، 15، 16 އަދި 19 ވަނަ ދުވަހު އޮންނަ ފްލައިޓްތަކުން ކަމަށް ވެސް އެމިނިސްޓްރީ އިން ހާމަކޮށްފައިވެއެވެ.

މިގޮތުން 12 ޖޫން 2023  ވަނަ ދުވަހުގެ 15:10 ގައި މޯލްޑިވްސް ޙައްޖު ކޯޕަރޭޝަން ލިމިޓެޑް 290 ޙައްޖާޖީން ފުރާނެއެވެ. އަދި  13 ޖޫން 2023 ވާދުވަހުގެ 12:50 ގައި ސިސިލްފަރު ޙައްޖު އެންޑް ޢުމްރާ ގްރޫޕް ޕްރައިވެޓް ލިމިޓެޑްގެ 90 ޙައްޖާޖީން ފުރުމަށް ވަނީ ހަމަޖެހިފައި ކަމަށް އެމިނިސްޓްރީ އިން ވަނީ ބުނެފައެވެ.

15 ޖޫން 2023 ގެ 19:00 ގައި  އަލްމަނާސިކް ޕްރައިވެޓް ލިމިޓެޑް 90 ޙައްޖާޖީން ފުރުމަށް ހަމަޖެހިފައިވާއިރު، 16 ޖޫން 2023ގެ 15:10 ގައު މޯލްޑިވްސް ޙައްޖު ކޯޕަރޭޝަން 290 ޙައްޖާޖީން ފުރުމަށް ހަމަޖެހިފައިވާކަމަށް އިސްލާމިކް މިނިސްޓްރީ އިން ބުނެފައިވެއެވެ.

16 ޖޫން 2023ގެ 19:00 ގައި އަލްޙަރަމައިން ޙައްޖު އެންޑް ޢުމްރާ ކޮމްޕެނީ މޯލްޑިވްސް ޕްރައިވެޓް ލިމިޓެޑްގެ 90 ޙައްޖާޖީން އަދި 19 ޖޫން 2023ގެ 15:10ގައި މޯލްޑިވްސް ޙައްޖު ކޯޕަރޭޝަން ލިމިޓެޑް  290 ޙައްޖާޖީން ފުރުމަށް ހަމަޖެހިފައި ވާކަމަށް ވެސް އިސްލާމިކް މިނިސްޓްރީ އިން ހާމަކޮށްފައިވެއެވެ.

އިސްލާމިކް މިނިސްޓްރީ އިން ބުނީ އެހެން އަހަރުތަކެކޭ އެއްގޮތަށް މި އަހަރުވެސް ޙައްޖުވެރިންނަށް ފަސޭހައިން ފުރުމުގެ އިންތިޒާމްތައް ހަމަޖެއްސުމުގެ މަސައްކަތްދަނީ ކުރަމުން ކަމަށެވެ. އެގޮތުން ޙައްޖުވެރިން އެއާޕޯޓަށް ގެންދިއުމާއި، ފޮށްޓާއި ދަބަސް ބަލައިގަތުމުގެ މަސައްކަތް ސަރުކާރުގެ މުއައްސަސާތަކާ ގުޅިގެން ކުރިއަށް ގެންދިޔުމަށް ހަމަޖެހިފައި ކަަމަށްވެސް އެމިނިސްޓްރީ އިން ބުނެއެެވެ.

އުމުރުން ދުވަސްވީ އަދި ބަލި މީހުންކުދި ވެހިކަލްތަކުގައި، ބަހާހަމައަށް ގެންގޮސްދިނުމާއި، ޙައްޖުވެރިއާއާއި ޢާއިލާގެ ބޭފުޅުންނަށް ބަހުގައި ނުވަތަ އޭސީ ފެރީގައި އެއާޕޯޓަށް ދެވޭގޮތް ހަމަޖެއްސުމާއި، ފުރުމުގެ އެއްދުވަސް ކުރިން ފޮށިތައް އެއަރޕޯޓަށް ގެންގޮސްދިނުމުގެ އިންތިޒާމްތައް ހަމަޖެހިފައިވާކަމަށް ވެސް އެމިނިސްޓްރީއިން ބުނެއެވެ.

ޙައްޖަށް ވަޑައިގަންނަވާ ފަރާތްތަކަށް ޚާއްސަކޮށް ދަތުރުތައް ހަމަޖެހިފައިވާއިރު، މާލެއާއި ހުޅުމާލެ އަދި ވިލިމާލެއިން ފަސޭހަކަމާއެކު ދަތުރުކުރެވޭނެ އިންތިޒާމްވެސް ވަނީ ހަމަޖައްސާފައި ކަމަށް އެމިނިސްޓްރީ އިން ބުނެއެވެ. ޙައްޖާޖީންގެ ފުރުމުގެ ކަންކަން ފަސޭހަ ކޮށް ދިނުމަށް ކޮންމެ އަހަރަކުވެސް ސަރުކާރުން މަސައްކަތް ތަކެއް ކުރެއެވެ.