ސަލްޓަން ޕާކުން ކޮނުނު ރިހި ފައިސާފޮތި ފެނުނު ވެލިފުނި ފަހުން ގެއްލުނު: ޔުމްނާ

ސަލްޓަން ޕާކު މަރާމާތުކުރުމަށް ކޮނުނުއިރު ފެނުނު ރިހި ފައިސާފޮތި ހުރި ވެލިފުނި ފަހުން ގެއްލިފައިވާކަމަށް ކުރީގެ ހެރިޓޭޖު މިނިސްޓަރު ޔުމްނާ މައުމޫނު ވިދާޅުވެއްޖެ އެވެ.

ރައީސް ޔާމީން އަބްދުލްގައްޔޫމުގެ ޒައާމަތުގައި މާލޭގެ ސަލްޓަން ޕާކު ތަރައްގީކުރުމުގެ މަޝްރޫއުގެ ތެރެއިން ކޮނުމުގެ މަސައްކަތް ކުރަމުން ދަނިކޮށް ފެނުނު އެކި ގައުމުތަކުގެ ގިނަ އަދަދެއްގެ ފައިސާ ފޮތިތަކެއް ހެރިޓޭޖް ޑިޕާޓުމަންޓުގެ ބެލުމުގެ ދަށަށް ދިރާސާކުރުމަށް ގެންދެވުނު ކަމުގެ މައުލޫމާތު ލިބިފައިވާކަން ފާހަގަކުރައްވާ ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު ވަނީ އެ ފައިސާ ފޮތިތަކުގެ ޖުމްލަ އަދަދާއި، ފައިސާފޮތިތަކުގެ އުމުރުން ވެފައިވާ ދުވަހާއި، އަދި އެ ކޮނުމުގެ ތެރެއިން ފައިސާފޮތިތައް ނޫން އެހެން އެއްވެސް އެއްޗެއްގެ މައުދަނީ ބާވަތެއް ނުވަތަ އާސާރެއް ފެނިފައިވާ ނަމަ ފައިސާފޮތިތައް ހިމެނޭގޮތަށް ވަކިވަކިން އެ ތަކެތީގެ ފޮޓޯއާއި އެކު ހޯދާ ތަފްސީލުކޮށްދެއްވުމަށް ކުރީގެ މިނިސްޓާ އޮތް އާޓްސް ކަލްޗާ އެންޑް ހެރިޓޭޖް ޔުމްނާ މައުމޫނުގެ އަރިހުން އެދިވަޑައިގެންފަ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާއަށް އެ ތަފްސީލުތައް ލިޔުމުން ކުރީގެ ހެރިޓޭޖް މިނިސްޓަރު ޔުމްނާ ފޮނުއްވަވާފައިވާއިރު، ޔުމްނާ ފޮނުއްވި ޖަވާބުގައި ވިދާޅުވެފައި ވަނީ މެމްބަރު އިބްރާހިމް ރަޝީދު އެދިވަޑައިގެންފައިވާ މައުލޫމާތު ހޯދުމަށް ކުރެވުނު މަސައްކަތުން ކުރީގެ ޑިޕާޓުމަންޓު އޮފް ހެރިޓޭޖުން މައުލޫމާތު ދިން ގޮތުގައި މާލޭގެ ސަލްޓަން ޕާކު ތަރައްގީކުރުމުގެ މަޝްރޫއުގެ ތެރެއިން ޕާކުކުގެ ލިލީމަގަށްވާ ފަޅިން ރިހި ފައިސާ ފޮތިތަކަކާއި، މުށި ސީނު ތަށިތަކަކާއި، ގުޅިއެއްގެ ބައިތަކެއް ފެނިފައިވާކަން މޯލްޑިވްސް ނެޝަނަލް ޑިފެންސް ފޯސްގެ ފަރާތުން މިނިސްޓްރީ އޮފް އެޑިއުކޭޝަންގެ ދަށުން އޭރު ހިނގަމުން ދިޔަ ޑިޕާޓްމަންޓް އޮފް ހެރިޓޭޖަށް 15 ޖޫން 2017 ގައި އަންގާފައިވާކަމަށެވެ.

އެ މައުލޫމާތު ލިބުމާއި ގުޅިގެން އެ ޑިޕާޓުމަންޓުގެ ޓީމެއް ސަލްޓަންޕާކަށް ގޮސް ބަލައި، ކޮނެފައިވާ ވަޅުގަނޑުން ނަގާފައިވާ ފަސްފުނި ފުރާނައިގެން އެދުވަހުގެ އިރުއޮއްސުމާއި ހަމަޔަށް 96 ފައިސާ ފޮތި ހޯދާފައިވާކަމަށް ޔުމްނާގެ ޖަވާބުގައި ހާމަކޮށްފައި ވެއެވެ.

އެހެން ނަމަވެސް ޖެހިގެން އައި ދުވަހު އެ ޓީމުން ސަލްޓަން ޕާކަށް ދިޔައިރު، ފައިސާފޮތި ފެނުނު ވެލިފުނިވެސް އެތަނުގައި ނެތްކަމަށް ޔުމްނާ ވަނީ ވިދާޅުވެފަ އެވެ.

"އެ ފަސްފުނި ފުރާނައިގެން އިތުރު ފައިސާފޮތިތަކެއް ފެނިދާނެކަމަށް ބަލައި، ޖެހިގެން އައި ދުވަހު އެ މަސައްކަތަށް ދިޔައިރު، ފަސްފުނި އެއްގޮށް ގެއްލިފައިވާކަމަށް އެ މަސައްކަތުގައި އުޅުނު މުވައްޒަފުން މައުލޫމާތު ދެއްވާފައިވާ ކަމަށެވެ"

ޔުމްނާ ލިޔުމުން ފޮނުވި ޖަވާބު

ކުރީގެ މިނިސްޓަރު ޔުމްނާ އިތުރަށް ވިދާޅުވީ ސަލްޓަން ޕާކުގައި ކުރި މަސައްކަތުގެ ތެރެއިން ފެނިފައިވާ 43 ފައިސާ ފޮތްޗެއް 18 އޮކްޓޫބަރު 2017 ގައި އެމްއެންޑީއެފްގެ ފަރާތުން ޑިޕާޓުމަންޓު އޮފް ހެރިޓޭޖާއި ހަވާލުކުރެވިފައިވާކަން ރިކޯޑުތަކުން ފެންނަން އޮތް ކަމަށެވެ.

އެހެންކަމުން ޖުމްލަ 139 ފައިސާފޮތި ޤައުމީ ދާރުލްއާސާރުގައި މިހާރު އެބައޮތްކަމަށް ޘަގާފީ ތަރިކަ ރައްކާކުރާ ގައުމީ މަރުކަޒުން މައުލޫމާތު ދެއްވާފައިވާ ކަމަށާއި، އެކި ސައިޒުގެ 713 ސީނުތައްޓާއި، ތެޅިފައިވާ ސީނުތަށިތަކެއްގެ ބއިތަކާއި ގުޅިއެއްގެ ބައިތަކާއި ލޯ ތާހެއް 19 ޖުލައި 2017 ގައި ޤައުމީ ދާރުލްއާސާރަށް ލިބިފައިވާކަމަށް ޔުމްނާ ވަނީ ވިދާޅުވެފަ އެވެ.

އޭގެ އިތުރުން ޔުމްނާ ހާމަކުރެއްވި ގޮތުގައި އެތަނެތި މިހާރު ބެހެއްޓިފައި ވަނީ އާސާރީ ތަކެތި ބެހެއްޓުމަށް ޚާއްސަ ކުރެވިފައިވާ ސްޓޯ ރޫމުގައެވެ. އަދި އެ ތަކެތި މިހާރު ވަނީ އާސާރީ ތަކެތީގެ ރަޖިސްޓްރީގައި ވެސް ހިމަނާފައިކަމަށް ޔުމްނާ ވަނީ ވިދާޅުވެފަ އެވެ.