ހަމްދާގެ ފުރަތަމަ ސިޔާސީ އިންތިޚާބުން %74 އާއެކު ބޮޑު ކާމިޔާބީއެއް!

ކުރީގެ ރައީސް، އަދި މަޖިލީހުގެ ކުރީގެ ރައީސް މުހައްމަދު ނަޝީދަށް ތާއީދު ކުރާ ފަރާތްތަކުން އަލަށް އުފެއްދި ޕާޓީ، ޑިމޮކްރެޓްސް ގެ ތެރެއިން ފާހަގަ ކޮށްލެވުނު ހަމްދާ މުހައްމަދު ވާދަކުރެއްވި ފުރަތަމަ ސިޔާސީ އިންތިޚާބުގައި އޭނާއަށް ބޮޑު ކާމިޔާބީއެއް ލިބިވަޑައިގެންފިއެވެ.

ނިމިދިޔަ ހޮނިހިރު ދުވަހު ބޭއްވުނު ޑިމޮކްރެޓްސް ގެ އެތެރޭގެ އިންތިޚާބުގައި ހަމްދާ ވާދަކޮށްފައިވަނީ އެ ޕާޓީގެ އަންހެން ލީޑަރ ގެ މަގާމަށެވެ. އެ މަގާމަށް ހަމްދާ އިންތިޚާބުވެލައްވާފައި ވަނީ، %74.54 ވޯޓާއެކެއެވެ. އިންތިޚާބުގައި ހަމްދާއާއި ވާދަކުރެއްވި ޝިޔާމާއަށް ލިބިލެއްވީ %25.46 އެވެ.

މި ލިބުނު ކާމިޔާބީ އާއި ގުޅިގެން ހަމްދާ ކުރެއްވި ޓްވީޓެއްގައި ވިދާޅުވީ، އޭނާގެ އުމުރުން 21 އަހަރު މިހާރު ވެފައިވާއިރު، އެ އިންތިޚާބަކީ ވާދަކުރެއްވި އެންމެ ފުރަތަމަ ސިޔާސީ އިންތިޙާބު ކަމަށެވެ.

އަދި އެ އިންތިޙާބުގައި ވާދަކުރި ހުރިހާ ކެންޑިޑޭޓުންގެ ތެރެއިން %74.54 އިންސައްތައިގެ ގެ ބޮޑު އަޤުލަބިއްޔަތަކާއިއެކު އިންތިޙާބު ކާމިޔާބު ކުރެވުމަކީ ހަމްދާގެ ސިޔާސީ ޙަޔާތުގެ މިހާ ތަނަށް ލިބިލެއްވި އެންމެ ބޮޑު ކާމިޔާބީ ކަމަށްވެސް އޭނާ ވިދާޅުވި އެވެ.

"މިއީ ރައްޔިތުންގެ ލޯބި. ހަމްދާ ޒުވާނަކަށްވެ ހުރެ ސިޔާސީ މައިދާނަށް ނިކުތް ނިކުތުމުގައި ލީޑަރޝިޕް އަދި ޤްރާސްރޫޓް ލެވެލްގައި ހަމްދާ ބަލައިގަތް އެންމެހާ ބޭފުޅުންނަށް ހިތުގެ އެންމެ އަޑިން ޝުކުރު ދަންނަވަން. ވަރަށް އުފާ ވެއްޖެ. ވަރަށް ބޮޑަށް ޝުކުރިއްޔާ! ތިޔަ ކުރެއްވި އިތުބާރާއި އެއްވަރަށް މަސައްކަތް ކުރުމުގައި ކޮންމެ ދުވަަހަކުމެ ދެމި ހުންނާނަން!" ހަމްދާ ވިދާޅުވި އެވެ.

ޑިމޮކްރެޓްސް ގެ އިއްޔެ ބޭއްވުނު އެތެރޭގެ އިންތިޚާބުގައި، ޕާޓީގެ ރައީސް ކަމަށް އިންތިޚާބު ވެވަޑައިގެންފައިވަނީ ހެންވޭރު ހުޅަނގު ދާއިރާގެ މެންބަރު ހަސަން ލަތީފެވެ. އަދި އަންހެން ނާއިބު ނައީސާ ކަމަށް އަލައިކާ އިންތިޚާބުވެވަޑައިގެންނެވި އިރު، ޒުވާން ނައިބު ރައީސަކަށް އިންތިޚާބުވެވަޑައިގެންނެވީ މަޑަވެލި ދާއިރާގެ މެންބަރު ހުސައިން ފިރުޝާނެވެ. އެ ޕާޓީގެ ޒުވާން ލީޑަރ އަކަށް އިންތިހާބު ވެވަޑައިގެންނެވީ މާސިހެވެ.