އެޕާޓްމެންޓް ކުއްޔަށްދޭން އަސްލުނޫން އެއްބަސްވުމެއް ހެދި މީހާއަށް ދެވަނަ ޙުކުމެއް

އެޕާޓްމެންޓެއް ކުއްޔަށް ދޭނެ ކަމަށް ބުނެ އަސްލުނޫން އެއްބަސްވުމެއް ހެދި މީހާއަށް ދެވަނަ ޙުކުމެއް އިއްވައިފިއެވެ.

ކްރިމިނަލް ކޯޓުން މިދިޔަ ބުރާސްފަތި ދުވަހު މި ހުކުމް އިއްވީ ޅ. ހިންނަވަރު އަންބަރީގޭ އިބްރާހިމް ނަޒީދުގެ މައްޗަށެވެ. އެނާގެ މައްޗަށް ކްރިމިނަލް ކޯޓުން ޙުކުމް ކޮށްފައިވަނީ ނުވަ މަހުގެ ޖަލު އަދަބާ އެކު ބަދަލުގެ ގޮތުގައި ހަތް ލައްކަ ރުފިޔާ ނަގައިދިނުމަށެވެ.

ކްރިމިނަލް ކޯޓުގައި މިދިޔަ ބުރާސްފަތި ދުވަހު ބޭއްވި މި ޝަރީޢަތުގެ މަޖިލީހުގައި އިއްވި ޙުކުމް ގައިވަނީ, ނަޒީދު, އެހެން މީހެއްގެ ގެއެއްގެ ދެ ފަންގިފިލާ އަކީ އޭނާއަށް ދިގު މުއްދަތަކަށް އެގޭގެ ވެރިފަރާތުން ކުއްޔަށް ދީފައިވާ ދެ ފަންގިފިލާއެއްކަން ދެއްކުމަށް ސައްހަ ނޫން އެއްބަސްވުމެއް ހަދައިފައިވާ ކަމަށެވެ.

އަދި އެ އެއްބަސްވުން ދައްކައިގެން އެހެން ދެ މީހަކަށް އެ ދެ ތަން ވަނީ ކުއްޔަށް ދޫކޮށްފައި ކަމަށްވެސް އެ ޙުކުމްގައި ބުނެފައިވެއެވެ.

ނަޒީދުގެ އަތުން އެތަން ކުއްޔަށް ނެގި އެކަކު ވަނީ އެޕާޓްމެންޓުގެ އަށްއަހަރު ދުވަހަށް ކުއްޔަށް ނެގުމަށް އިބްރާހިމް ނަޒީދު އަށް 624،000ރ. ދީފަ އެވެ. ދެވަނަ މީހާ ވަނީ އެއް އަހަރުގެ މުއްދަތަށް އެޕާޓްމެންޓް ކުއްޔަށް ނަގަން 150،000ރ. ނަޒީދު އަށް ދީފަ އެވެ.

މި މައްސަލާގައި ދައުލަތުން އުފުލީ ޓެކުމުގެ ދަޢުވާ އެވެ. އެ ދަޢުވާ އަށް ނަޒީދު ވަނީ އިޢްތިރާފުވެފައެވެ.

އަދި، ނުވަ މަހާއި 18 ދުވަހުގެ ޖަލު ޙުކުމަކަށް އެއްބަސްވެ، ދައުލަތާ އެކު އިޢްތިރާފު އެއްބަސްވުމެއްގައި ވެސް އޭނާ ވަނީ ސޮއިކޮށްފަ އެވެ.

ނަޒީދުގެ އޮޅުވާލުމުގެ ސަބަބުން އެޕާޓްމެންޓް ކުއްޔަށް ނެގި ދެ މީހުންނަށް ލިބުނު ގެއްލުމުގެ ބަދަލު ނަގައިދީ، އެއީ ނަޒީދުގެ މައްޗަށް އޮތް ސާބިތު ދަރަންޏެއް ކަމަށް ވަނީ ކަނޑައަޅައިފަ އެވެ.

ބަދަލުގެ ގޮތުގައި އެކަކަށް ނަގައިދީފައި ވަނީ 624،000ރ. އެވެ. އަދި ދެވަނަ މީހާ އަށް ނަގައިދީފައި ވަނީ 87،500ރ. އެވެ.

ނަޒީދުގެ މައްޗަށް މީގެކުރިން ވެސް ކްރިމިނަލް ކޯޓުން މިފަދަ މައްސަލަައެއްގައި ޙުކުމްކޮށްފައިވެ އެވެ. އެފަހަރުވެސް ޖަލު ޙުކުމަކާއި އެކު ގެއްލުމަށް ބަދަލު ދިނުމަށް އޭނާގެ މައްޗަށް ވަނީ ޙުކުމެއް އިއްވައިފައެވެ.