ފުލެޓް ލިބޭ މީހުންގެ ލިސްޓް އެއްކޮށް ބަދަލު ކުރަން ނުނިންމަން: ޑރ. ހައިދަރު

ކުރީ ސަރުކާރުގެ ގެދޮރުވެރިޔާ ސްކީމްގެ ދަށުން ދޫކުރަން ނިންމި 4000 ފުލެޓް ލިބޭ މީހުންގެ ލިސްޓް އެއްކޮށް ބަދަލު ކުރަން މި ސަރުކާރުން ނިންމާފައި ނުވާ ކަމަށް ގެދޮރުވެރިކަމާއި ބިމާއި ޢުމްރާނީ ތަރައްޤީއާއި ބެހޭ ވުޒާރާގެ ވަޒީރު ޑރ އަޙްމަދު ހައިދަރު ޢަލީ ވިދާޅުވެއްޖެއެވެ.

ގެދޮރުވެރިޔާ ސްކީމްގެ ދަށުން ފްލެޓް ލިބޭނެކަމަށް ގެޒެޓް ކުރެވިފައިވާ އެންމެހާ ފަރާތްތަކާއި އަދި ކަމުގެ މަސްލަޙަތު އޮތް އެންމެހާ ފަރާތްތަކުގެ ފްލެޓްތައް ބާތިލް ނުކުރުމަށްއެދި ހުށަހަޅުއްވާފައިވާ ޕެޓިޝަނާ ގުޅިގެން ގެދޮރުވެރިކަމާއި ބިމާއި ޢުމްރާނީ ތަރައްޤީއާއި ބެހޭ ވުޒާރާގެ ބޭފުޅުންނާއެކު މިއަދު ޕެޓިޝަން ކޮމިޓީގެ މެންބަރުން ބޭއްވި ބައްދަލުކުރުމުގައި އެ ކޮމިޓީގެ މެންބަރުން ވަނީ، ފުލެޓް ލިސްޓް ރީއިވަލުއޭޓް ކުރާއިރު، ކުރިންގެ ލިސްޓް އެއްކޮށް އުވާލައި އައު ލިސްޓެއް އެކުލަވާލާނެތޯ މިނިސްޓަރާއި ސުވާލުކުރައްވާފައެވެ.

އަދި އޭސީސީން ކުރަމުންދާ ތަހުގީގު ނިމުމާއިއެކު ފުލެޓް ދިނުމުގެ މަސައްކަތް އަލުން ފަށާނެ ކަމަށް ހައުސިން މިނިސްޓްރީން ބުނެފައިވާއިރު، އެ އިޝާރާތް ކުރައްވަނީ އެ ލިސްޓް އަލުން އެކުލަވާލައި އެއްކޮށް ބަދަލުކުރުމަށްތޯވެސް މެންބަރުން ސުވާލު ކުރެއްވި އެވެ.

އެ ސުވާލުތަކަށް ޖަވާބު ދެއްވަމުން މިނިސްޓަރ ވިދާޅުވީ، މި ސަރުކާރުން އެ ލިސްޓަށް ބަދަލު ގެންނަން ބޭނުން ނުވާ ކަމަށެވެ.

އަލުން ފެށުމޭ އަޅުގަނޑު ދަންނަވާފައި ވާނީ، ހުއްޓިފައި އޮތް މަސައްކަތް އަލުން ފެށުން. ލިސްޓް އެއްކޮށް އުވާލާފައި އަލުން ފެށުމަކަށް ނޫން... އަޅުގަނޑުމެން އެ ލިސްޓަށް އެއްކޮށް ބަދަލު ގެންނަން ބޭނުންވަނީއެއް ނޫން. އަޅުގަނޑުމެން ބޭނުން ވަނީ، އޭސީސީން ދެއްވާ ލަފައެއްގެ މަތިން އަޅުގަނޑުމެން އެ ލިސްޓް ރީ އިވެލުއޭޓް ކުރަންޖެހެންޏާ އެކަން ކުރުން. އޭގެ މާނަ އަކީ އެ ލިސްޓްގައި މައްސަލައެއް އޮތްތޯ ބަލައި އެކަން ފާހަގަކުރުން އެނގޭތޯ. އަލުން ފެށުމެއް ނޫން.

ގެދޮރުވެރިކަމާއި ބިމާއި ޢުމްރާނީ ތަރައްޤީއާއި ބެހޭ ވުޒާރާގެ ވަޒީރު ޑރ އަޙްމަދު ހައިދަރު ޢަލީ

ގެދޮރުވެރިޔާ ސްކީމްގެ ދަށުން ދޫކުރާ 4000 ފުލެޓް ދޫކުރުމުގެ މަސައްކަތް އޭސީސީން ހުއްޓުވާފައި ވުމުން، އެކަމާއި ގުޅިގެން އެ މުވައްސަސާގެ އިސްވެރިން މަޖިލީހުގެ މިނިވަން މުވައްސަސާތަކާއި ބެހޭ ކޮމިޓީގައި ވާހަކަ ދައްކަވަމުން އޭސީސީގެ ނާއިބު ރައީސް ވަނީ، ގެދޮރުވެރިޔާ ޕޯޓަލް މެދުވެރިކޮށް ފުލެޓަށް އެދުނު ފަރާތްތަކަށް ލިބޭ މާކްސް، އެ ޕޯޓަލް އިން "އޮޓޯ އިން ޖެނެރޭޓްކުރާ" ނަމަވެސް، އެއަށްފަހު، އެ މާކްސް ބަދަލުކޮށް ޝަރުތު ހަމަ ނުވާ މީހުން ޝަރުތު ހަމަވެފައިވާ ކަމަށް ކަނޑައަޅާފައިވާ މައްސަލަތަކެއް ފާހަގަވެފައިވާ ކަމަށް ވިދާޅުވެފައެވެ.

"މި ޕޯޓަލް އަކީ ހުށަހަޅާ މައުލޫމާތާ އެއްކޮށް އޮޓޯއިން އެބަ ޖެނެރޭޓްވޭ މާކްސްތައް. އެހެން ނަމަވެސް، އެ މާކްސްތައް އޮޓޯއިން ޖެނެރޭޓް ވެފައި ހުންނައިރު، އެ މާކްސްތައް އެޕްރޫވް ކުރަން ހުންނަ ފަރާތައް، ނުވަތަ އެޕްރޫވަލްގެ މައްޗަށް ސުޕަވައިޒް ކުރަން ހުންނަ ފަރާތްތަކުން މާކްސް ބަދަލުކޮށްފައި ހުންނަ ކަން އަޅުގަނޑުމެންނަށް އެބަ ފާހަގަވޭ. މިސާލަކަށް ލިޔެކިޔުން ތަކުން ޝަރުތު ހަމަ ނުވޭ. އެހެންވީމާ ސިސްޓަމުން އެބަ ޖެނެރޭޓްވޭ ޝަރުތު ހަމަ ނުވާ ކަމަށް. އެހެންވެއްޖެއްޔާ، އެ އެޕްރޫވަލް ލެވެލް އިން ޝަރުތުހަމަވާ ކަމަށް ބަދަލު ކޮށްފައިވާ ކަމަަށް އަޅުގަނޑުމެންނަށް ފާހަގަ ވަނީ."

އޭސީސީގެ ނާއިބު ރައީސް އަބްދުއްސަލާމް

އެހެންކަމުން، އެ މައްސަލަތައް އޭސީސީން ބަލަމުން އަންނަ ކަމަށާ، ބަލަންޖެހޭ ކަންކަން ބަލައި ނިމުމުން ފުލެޓް ދިނުމުގެ ކަންކަން ކުރިއަށް ގެންދިޔުމަށް ގެދޮރުވެރިކަމާއި ބެހޭ މިނިސްޓްރީއަށް ދެއްވާނެ ކަމަށް އޭސީސީން ބުނެފައިވެއެވެ.