ކޯރަމް ކަނޑައެޅުމުގައި ގަވާއިދާ ހިލާފުވާކަމަށްބުނެ އެމްޑީޕީ މެންބަރުންގެ ފާޑުކިޔުން އަސްލަމަށް!

ރައްޔިތުންގެ މަޖިލީހުގެ ކޯރަމް ކަނޑައެޅުމުގައި މަޖިލީހުގެ ރައީސް މުހައްމަދު އަސްލަމް، ގަވާއިދާ ހިލާފު ވެފައިވާކަމަށް ވިދާޅުވެ، އެމްޑީޕީގެ ބައެއް މެމްބަރުން ނުރުހުން ފާޅުކޮށްފިއެވެ.

ކޯރަމް ކަނޑައެޅުމުގައި މަޖިލީހުގެ ރައީސް، މަޖިލީހުގެ ގަވާއިދާ ހިލާފު ވެފައިވާކަމަށް ވިދާޅުވެ، އެމްޑީޕީގެ ބައެއް މެންބަރުން ވަނީ މިއަދު ކުރިއަށް ގެންދެވުނު މަޖިލީހުގެ ޖަލްސާގައި ނުރުހުން ފާޅުކުރައްވާފައެވެ.

މިޖަލްސާގައި ވާހަކަ ދައްކަވަމުން އިހަވަންދޫ ދާއިރާގެ މެންބަރު މުހަންމަދު ޝިފާއު ވިދާޅުވީ، ރައްޔިތުންގެ މަޖިލީހުގެ ގަވާއިދުގެ 49 ވަނަ މާއްދާގެ ހ ގައި ބުނާގޮތުން ރައްޔިތުންގެ މަޖިލީހުގެ ޖަލްސާއެއްގެ ގާނޫނުގެ އަދަދަކީ މަޖިލީހުގެ މެންބަރުންގެ 25 އިންސައްތަކަމަށެވެ. ޝިފާއު ވިދާޅުވީ، ކުރީގައި މަޖިލީހުގެ މެންބަރުންގެ ގޮތުގައި ތިއްބެވި ކަމުގައި ވީނަމަވެސް މަޖިލީހުން އިސްތިއުފާ ދެއްވައިފައި ތިބި ބޭފުޅުންނަކީ، މެންބަރުންގެ ގޮތުގައި ހިސާބު ހައްދަވާ މަޖިލީހުގެ ކޯރަމް ހަމަކުރުމަކީ ނިޒާމީ މައްސަލައެއް ކަމަށެވެ. އަދި އެއީ މަޖިލީހުގެ ގަވާއިދާ މުޅިން ހިލާފަށް ރިޔާސަތުން މިވަގުތު ކުރަމުންދާ ކަމެއްކަމަށްވެސް އޭވާ ވިދާޅުވިއެވެ.

ގަވާއިދާ އެއްގޮތްވާ ގޮތުގެ މަތިން މަޖިލީހުގެ ކޯރަމް ހަމަކުރުމަށްވެސް ޝިފާއު ވަނީ މަޖިލީހުގެ ރައީސްގެ އަރިހުން އެދިފައެވެ.

ޝިފާއުގެ މިވާހަކަ ތަކަށް ރައްދުވެއްވަމުން އަސްލަމް ވިދާޅުވީ، މަޖިލީހުގެ ގަވާއިދުގައި އެހާ ތަފްސީލުކޮށް މަޖިލީހުގެ މެންބަރުންގެ އަދަދު ކަނޑައަޅާނެގޮތެއް ބަޔާންކުރެވިފައި ނުވާކަމަށެވެ.

'މަޖިލީސް އެކުލެވިގެންވާ މެމްބަރުންގެ އަދަދަކީ އެއީ މަޖިލީހުގެ މެމްބަރުން ކަމުގަ. އެގޮތުން މިހާރު މަޖިލީހުގެ މެމްބަރުންގެ އަދަދަކީ 87 ކަމުގަ ބަލައިގެން، 87 ގެ މާއްދާގައި އެ ބުނާ 25 އިންސައްތަ ހިސާބުޖަހަނީ. އެހެންކަމުން ޖަލްސާއެއް ފަށަން އޮންނަ ކޯރަމަކީ ވެސް 22 ކަމުގައި ކަނޑައަޅަނީ،"

އަސްލަމް

އަސްލަމް ވަނީ ޝިފާއު އެނެންގެވި މައްސަލައަކީ ނިޒާމީ މައްސަލައެއްކަމުގައި ބަލައި ގަވެނެން ނެތްކަމަށް ކަނޑައަޅާފައެވެ. އަސްލަމްގެ މި ނިންމުމަށް ނުރުހުން ފާޅުކުރައްވާ މިލަންދޫ ދާއިރާގެ މެންބަރު އަލީ ރިޒާ ވެސް ވަނީ ނިޒާމީ ނުކުތާއެއް ނަންގަވާފައެވެ. އެގޮތުން އަލީ ރިޒާ ވިދާޅުވީ އެގޮތަށް ބެއްލެވިކަމުގައި ވީނަމަވެސް ގޮޑިތަށް ގުނޭގޮތެއް އޮންނަންވާނޭކަމަށެވެ.

'އެހެންކަމަށް ވާނަމަ ކޯރަމް އަކީވެސް އެ ގޮނޑިތައް ދިރުމެއްވާ އެއްޗެއް ގޮތުގަ ބަލައިގެން ހަމަކުރެވޭނެ ކަމެއްގޮތުގަ ފާހަގަކުރެވެނީ

އަލީ ރިޒާ

އިހަވަންދޫ ދާއިރާގެ މެންބަރު މުހަންމަދު ޝިފާއު ނެންގެވި ނިޒާމީ ނުކުތާއަށް ތާއީދުކުރައްވާ ވާހަކަ ދައްވަމަމުން އަލީ ރިޒާ ވިދާޅުވީ، ޝިފާއު ނެންގެވި މައްސަލައަކީ ހަގީގަތުގައިވެސް ނިޒާމީ މައްސަލައެއް ކަމަށާއި، މަޖިލީހުގެ މި ނިޒާމަށް އަވަސް ހައްލެއް ކޮންމެހެންވެސް އެބަ ބޭނުންވާކަމަށެވެ.

އަލީ ރިޒާގެ ވާހަކަ މެދުކަނޑާލެއްވުމަށްފަހު އަސްލަމް ވަނީ އެއީ އެއްވެސް ގޮތަކަށް ނިޒާމީ މައްސަލައެއް ކަމުގައި ބަލައިގަނެވޭ ކަމެއް ނޫންކަމަށާއި، އެކަމުގައި މިހާރު ގޮތް ނިމިފައިވާކަމަށް ވިދާޅުވެފައެވެ.

އިހަވަންދޫ ދާއިރާގެ މެންބަރު މުހަންމަދު ޝިފާއު އާއި، މިލަންދޫ ދާއިރާގެ މެންބަރު އަލީ ރިޒާގެ އިތުރުން ކުޑަހުވަދޫ ދާއިރާގެ މެންބަރު އަހުމަދު އާމިރުވެސް ވަނީ ނިޒާމީ ނުކުތާއެއް ނަންގަވާ ނުރުހުންފާޅުކުރައްވާފަ އެވެ.

އަސްލަމް ވިދާޅުވީ، ނިޒާމީ މައްސަލަތައް ނަގައި މަޖިލީހުގެ މަސައްކަތަށް ހުރަސް އެޅުމުގެ ފުރުސަތު ނުދެއްވާނެ ކަމަށާއި، އެއްވެސް މެންބަރެއްގެ ޝަކުވާއެއް ވާނަމަ ލިޔުމަކުން އެޝާކުވާއެއް ހުށަހެޅުމަށް އެދުވަޑައިގަންނާކަމަށެވެ.