ދަނގެތީ ރައްޔިތުންގެ ފަރާތުން ތުރުކިޔޭ-ސީރިޔާއަށް އެހީވުމަށް 71,000 ރުފިޔާ

ފެބްއަރީ 6 ވަނަ ދުވަހު ތުރްކިޔޭ އަދި ސީރިޔާއަށް އައި ބިންހެންތަކާއި ގުޅިގެން ހާލުގައި ޖެހުނު މީހުންނަށް އެހީވުމަށް އދ. ދަނގެތީގައި ބޭއްވި ފަންޑް ރެއިޒިން އިވެންޓަށް ޖުމުލަ 71,071 ރުފިޔާ ލިބިއްޖެއެވެ.

ދަނގެތީގައި ހަރަކާތްތެރިވާ ދީނީ ޖަމިއްޔާ އެއް ކަމަށްވާ ޖަމިއްޔަތުލް ޤަލަމުން އިސްނަގައިގެން، އެ ރަށުގެ ކައުންސިލާއި، ސަރުކާރު އަދި އަމިއްލަ މުވައްސަސާތަކާއި ބައެއް ޖަމިއްޔާތަކާއި ގުޅިގެން ކުރިއަށް ގެންދިޔަ މި ފަންޑް ރެއިޒިން އިވެންޓް ފަށާފައިވަނީ ފާއިތުވި ފެބްރުއަރީ މަހުގެ 20 ވަނަ ދުވަހުއެވެ. ފަންޑް ރެއިޒިން އިވެންޓް ފެށުމުގެ ގޮތުން އެދުވަހު ލުއިކާނާ ވިއްކުމުގެ ހަރަކާތެއް ކުރިއަށް ގެންގޮސްފައިވާއިރު އެ ހަރަކާތުގެ ތެރެއިން ވަނީ 5,149.10 ރުފިޔާ ލިބިފައެވެ.

13 ދުވަހުގެ މުއްދަތަށް ކުރިއަށް ގެންދިޔަ މި ފަންޑު ރެއިޒިން އިވެންޓް ނިންމާލާފައިވަނީ އިއްޔެ ހަވީރު ބޭއްވި ސަޔަކުންނެވެ. މި ސައިގެ ތެރެއިން ހެދިކާ ޕެކޭޖް ތަކާއި ތަފާތު ބުއިންތައް ވިއްކާފައިވާއިރު, ސައިގެ ތެރެއިން ވަނީ ޖުމުލަ 14,043.68 ރުފިޔާ ލިބިފައެވެ.

މީގެ އިތުރުން ވެސް ފަންޑު ފޮށި ބަހައްޓައިގެން ޖުމުލަ 36,857.22 ރުފިޔާ ލިބިފައިވާއިރު، އެރަށުގެ އެކި މުވައްސަސާ ތަކުން ވަނީ 15,021 ރުފިޔާ ތުރުކިޔޭ އަދި ސީރިޔާ އަށް އެހީވުމަށް ހަދިޔާ ކޮށްފައެވެ.

ދަނގެތީ ގައި ކުރިއަށް ގެންދިޔަ މި ފަންޑް ރެއިޒިން އިވެންޓް ގެ ތެރެއިން ލިބުނު 71,071 ރުފިޔާ ވަނީ، ރާއްޖޭގައި ތުރުކިޔޭ އަދި ސީރިޔާ އަށް އެހީވުމުގައި ހަރަކާތްތެރިވަމުންދާ އިންޓަނޭޝަނަލް އެއިޑް ކެންޕެއިން (އައިއޭސީ)ގެ ތުރުކިޔޭ-ސީރިޔާ އެމެންޖެންސީ ރިލީފް ފަންޑަށް ހަދިޔާ ކޮށްފައެވެ.

ތުރުކިޔޭ އާއި ސީރިޔާ އަށް ސިލްސިލާކޮށް އައި ބާރުގަދަ ބިންހެލުން ތަކުގެ ސަބަބުން 2 މިލިއަނެއްހާ މީހުން ވަގުތީ ބޯހިޔާވަހިކަމުގައި ދިރިއުޅެމުން ދާއިރު ބިންހެލުންތަކުގައި ތުރްކިޔޭ އާއި އަވައްޓެރި ސީރިޔާ އިން 50،000 މީހުން ވަނީ ނިޔާވެފައެވެ.

ބިންހެލުމުގައި ފުރާނަ ސަލާމަތްވި ނަމަވެސް، ބޯހިޔަލެއް، ފެނެއް، ކަރަންޓެއް، ތެލެއް، ކާނެ އެއްޗެއް ނުލިބި ހާލުގައިޖެހުމުގެ ސަބަބުން އެތައް ބަޔަކު މަރުވެދާނެ ކަމުގެ އިންޒާރު ޑަބްލިޔުއެޗްއޯ އިން ވަނީ ދީފަ އެވެ.