މަޖްލިސް ރައީސްކަމުން ނަޝީދު ވަކިކުރަން އެމްޑީޕީން 'ފުންކޮށް ވިސްނަނީ'
ރައްޔިތުންގެ މަޖްލީހުގެ ރައީސްކަމުން އެޕާޓީގެ ރައީސް މުހައްމަދު ނަޝީދު ވަކިކުރަން އެމްޑީޕީން 'ފުންކޮށް ވިސްނާ' ކަމަށް އެޕާޓީން ބުނެފިއެވެ.
އެމްޑީޕީ ޕީޖީ ގްރޫޕުން މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ވެލިދޫ ދާއިރާގެ މެންބަރު މުހައްމަދު އަބްދުالله ޝަފީގު (މޯޑު) ވިދާޅުވީ މިއަދު މަޖިލީހުގައި ހިނގާދިޔަ ކަންކަަށް ބަލާއިރު، ރިޔާސަތާއި އިދިކޮޅު ފަރާތްތައް ގުޅިގެން ކަންކަން ކުރިއަށް ގެންދިޔަކަން ފާހަގަ ކުރެވޭ ކަމަށެވެ.
އެ މެމްބަރަކު ބޭނުންފުޅުވާ ހިޔާލެއް ފާޅުކުރެއްވުމަށް ރިޔާސަތުން ފުރުސަތު ދެއްވިއިރު އިދިކޮޅު ފަރާތްތަކަށް ތަނަވަސް ފުރުސަތެއް ދެއްވައި އެމްޑީޕީއަށް ފުރުސަތު ހަނިކުރިކަމަށް މޯޑު ވިދާޅުވިއެވެ.
ނަމަވެސް މަޖިލިސް ރައީސްކަމުން ނަޝީދު ވަކިކުރުމަށް އެމްޑީޕީއިން މިހާތަނަށް ނިންމާފައި ނުވާކަމަށް މޯޑު ވިދާޅުވިއެވެ.
"އެނގިވަޑައިގަންނަވާނެ ރިޔާސަތުގަ އެ އިންނެވީ އަޅުގަނޑުމެން ޕާޓީގެވެސް ރައީސް. އެހެންވީމަ އަދި ދިމާވާ މައްސަލަތަކެއް ތަކުރާރު ވަމުންދާއިރު ޓަސްލާފަ ރައީސްގެ އިތުބާރު ނެތްކަމުގެ މައްސަލަ ކުރިއަށް ނުގެންގޮސްދާނެ، ނޫންނަމަ ނުވައްދަފާނެ. އެހެން ނަމަވެސް މިގޮތަށް މިކަން ތަކުރާރުވަމުން ދާތީވެ ޕާލިމެންޓްރީ ގްރޫޕްގެ ލީޑަރުގެ ފަރާތުން އަޅުގަނޑަށް އެނގިފައޮތީ އެކަމާމެދު ފުންކޮށް ވިސްނަމުން ގެންދަވާކަމަށް. އެހެން ނަމަވެސް އަދި އަޅުގަނޑުމެން އެކަން ކުރަންވާ ވަގުތު ނުޖެހޭތީވެ އެ މަސައްކަތް ކުރެވެމުން ނުދަނީ" މުހައްމަދު އަބްދުالله ޝަފީޤް ވިދާޅުވިއެވެ.
އޭނާ ވިދާޅުވީ މަޖިލިސް ރައީސްކަމުން ނަޝީދު ވަކިކުރުމަށް އަދި ގޮތެއް ނުނިންމާ ސަބަބަކީ ނަޝީދަކީ އެމްޑީޕީގެ ރައީސްއަށް ވުން ކަމަށެވެ. ނަމަވެސް އެކަމާ އެމްޑީޕީގެ ޕީޖީ ގްރޫޕުން ވިސްނަމުންދާކަމަށް މޯޑު ވިދާޅުވިއެވެ.
ރައީސް ނަޝީދު އިސްވެ ހުންނަވައިގެން "ދަ ޑިމޮކްރެޓްސް" ގެ ނަމުގައި އާ ސިޔާސީ ޕާޓީއެއް ވަނީ އުފައްދަވާފައެވެ. ނަމަވެސް އަދިވެސް ނަޝީދު ހުންނެވީ އެމްޑީޕީ މެމްބަރެއްގެ ގޮތުގައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
