ހައްޖުގެ ތައްޔާރީތަކާއި ގުޅޭގޮތުން ހައްޖު ކޯޕަރޭޝަނާއި މިނިސްޓްރީއާއި ދެމެދު މަޝްވަރާކޮށްފި
1445 ވަނަ އަހަރުގެ ހައްޖު މޫސުމަށް ވާންޖެހޭ ތައްޔާރީތަކާއި ގުޅޭ ގޮތުން ހައްޖު ކޯޕަރޭޝަނުން އިސްލާމީ ކަންތައްތަކާ ބެހޭ ވުޒާރާއާއި ބައްދަލުކޮށް ދެފަރާތުގެ ދެމެދުގައި މަޝްވަރާތަކެއް ކުރިއަށް ގެންގޮއްސިއެވެ.
އިސްލާމީ ކަންތައްތަކާއި ބެހޭ ވަޒީރު، ޑރ މުހައްމަދު ޝަހީމް އަލީ ސައީދުގެ އިތުރުން ހައްޖު ކޯޕަރޭޝަންގެ މެނޭޖިން ޑިރެކްޓަރ މުހައްމަދު ޝަކީލާއި އެ އިދާރާގެ އިސްވެރިން ހިމެނިވަޑައިގަންނަވާހެން ކުރިއަށް ގެންދިޔަ މި ބައްދަލުވުމުގައި ވަނީ، ކުރިއަށް އޮތް ހައްޖު މޫސުމަށް ވާންޖެހޭ ތައްޔާރީތަކާއި ގުޅޭ ގޮތުން މަޝޤވަރާ ކުރެވިފައެވެ.
މީގެ އިތުރުން ހައްޖު ފަންޑު ތަރައްގީކޮށް ކުރިއަރުގައި އެކަސީގެންވާ ހަރުދަނާ އުސޫލެއްގެ ތެރެއިން އެކަން ކުރިއަށް ގެންދިއުމަށް ކުރެވިދާނެ ކަންކަމާއި ގުޅޭގޮތުން ދެފަރާތުގެ ދެމެދުގައި ވަނީ މަޝްވަރާތައް ބަދަލުކުރެވިފައެވެ.
ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ސަރުކާރުގެ އިސްލާމިކް މިނިސްޓަރުކަމާއި ހަވާލުވެވަޑައިގަތުމަށް ފަހު ދެއްކެވި ވާހަކަފުޅެއްގައި ވަޒީރު ޝަހީމް ވަނީ، ދިވެހިރާއްޖެއިން ހައްޖަށް މީހުން ގެންދިއުމަށް ހުރިހާ ކޯޓާއެއް ހައްޖު ކޯޕަރޭޝަނަށް ދިނުމުގެ ވިސްނުންފުޅެއް ގެންގުޅުއްވާކަމަށެވެ.
އެހެންނަމަވެސް މި ސަރުކާރަކުންވެސް އަދި އެ ވުޒާރާއަކުންވެސް އެއްވެސް އަމިއްލަ ކުންފުންޏަކަށް ދެރަވާނެ ކަމެއް ނުކުރާނެކަމުގައި ޑރ ޝަހީމް ވޮއިސްއަށް ދެއްވި އިންޓަރވިއުއެއްގައި ވަނީ ވިދާޅުވެފައެވެ.
ވުމާއެކު ރާއްޖެއަށް ހައްޖަށް މިހުން ގެންދިއުމަށް ލިބޭ ކޯޓާތައް ހައްޖު ކޯޕަރޭޝަނަށް ދިނުމާމެދު އާންމުންގެ ޚިޔާލު ހޯދުމަކުން ގެއްލުމެއް ނެތްކަމަށާއި އެ މަސައްކަތް ކުރުމާމެދު އާންމުންގެ ޚިޔާލަކަށް ހުށަހެޅުމުގެ ވިސްނުންފުޅު ގެންގުޅުއްވާކަމުގައި ވަޒީރު ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
