ދިވެހި ކަނޑުން ގެއްލުނުބައި ހޯދުން އަވަސްކުރުމަށް ޤާސިމް ގޮވާލައްވައިފި
ދިވެހިރާއްޖޭގެ ކަނޑުގެ ސަރަހައްދުން ގެއްލިފައިވާ ބައި ހޯދުމުގެ މަސައްކަތް ވީ އެންމެ އަވަހަކަށް ފެއްޓެވުމަށް ޖުމްހޫރީ ޕާޓީގެ ލީޑަރު ޤާސިމް އިބްރާހިމް ރައީސުލްޖުމްހޫރިއްޔާ ޑރ މުހައްމަދު މުއިއްޒަށް ގޮވާލައްވައިފި އެވެ.
ޤާސިމް މިފަދައިން ގޮވާލައްވާފައި ވަނީ އެކްސްގައި ކުރެއްވި ޕޯސްޓެއްގަ އެވެ.
ޤާސިމް ވިދާޅުވީ އިނގިރޭސިވިލާތުން ޗާގޯސް އާކިޕެލަގޯ، މޮރިޝަސްއާއި ހަވާލުކުރުމަށް ކުރިން ނިންމި ނިންމުން މިހާރު ބަދަލުކޮށްފައިވާ ކަމަށް އެ ގައުމުގެ ބައެއް ނޫސްތަކުން ރިޕޯޓުކޮށްފައިވާއިރު، މި ދަނޑިވަޅަކީ އިޓްލޮސް ގެ ނިންމުމާއި އެކު ރާއްޖެއާއި ޗާގޮސްގެ މައްސަލައިގައި ދިވެހީންނަށް ގެއްލިފައިވާ ސަރަހައްދު ހޯދުމަށް ސަރުކާރުން ވިސްނުންތެރިކަމާއެކު މަސައްކަތް ފަށަންވީ ވަގުތުކަމުގައި ގަބޫލުކުރައްވާ ކަމަށެވެ
ދިވެހިރާއްޖޭގެ މަސް ކަނޑުން ގެއްލިފައިވާ ސަރަހައްދު އަނބުރާ ހޯދުމަށް، އިޓްލޮސްގެ ނިންމުން އިސްތިއުނާފު ކުރުމަކީ ރައީސުލްޖުމްހޫރިއްޔާ ޑރ މުހައްމަދު މުއިއްޒު ރިޔާސީ ކެމްޕޭނުގެ ދުވަސްވަރުގައި ވެސް ވެވަޑައިގެންނެވި ވައުދެއްގެ އިތުރުން އެމަނިކުފާނުގެ 14 ހަފްތާ މަގުޗާޓުގައި ވެސް ހިމަނުއްވާފައިވާ މުހިންމު ކަމަކަށް ވާތީ، އެ މަސައްކަތް އަވަސްކުރުމަށް ރައީސުލްޖުމްހޫރިއްޔާ ޑރ މުއިއްޒު އަރިހުން ވަރަށް އަދަބުވެރިކަމާއެކު ދަންނަވާ ކަމަށް ޤާސިމް ވިދާޅުވި އެވެ.
އޭގެ އިތުރުން ޤާސިމް ވިދާޅުވީ ދިވެހިރާއްޖޭގެ މަސް ކަނޑުން ގެއްލުނު ސަރަހައްދު އަނބުރާ ހޯދުމަކީ ޚުދު އެމަނިކުފާނު ވެސް ރިޔާސީ އިންތިޚާބުގައި ވަކާލާތު ކުރެއްވި ޙައްލު ހޯއްދަވަން ބޭނުންފުޅުވާ ގައުމީ މައްސަލައެއް ކަމަށެވެ.
ޗާގޮސް މައްސަލައިގައި އިނގިރޭސި ވިލާތުގެ ނިންމުމާއެކު، ގެއްލުނު ކަނޑުގެ ސަރަހައްދު އަނބުރާ ދިވެހިންނަށް ލިބޭނެކަމުގެ އުންމީދު ބޮޑުވެފައިވާއިރު، އިނގިރޭސި ވިލާތާއެކު އަވަހަށް މަޝްވަރާތައް ފަށައި ޒަމާނުއްސުރެ ދިވެހީން ގެންގުޅެމުން އައި ސްޓޭންޑް ދަމަހައްޓަވާ މި ކަމުގައި ދިވެހީންނަށް ކާމިޔާބު ހޯއްދަވައިދެއްވުމަށް މަސައްކަތްޕުޅު ފެއްޓެވުމަށް ޤާސިމް ވަނީ ރައީސުލްޖުމްހޫރިއްޔާ ޑރ މުއިއްޒަށް ގޮވާލައްވާފަ އެވެ.
"މިމައްސަލަ އަކީ އަޅުގަނޑުވެސް ފާއިތުވި ރިޔާސީ އިންތިޚާބުގައި ހައްލުހޯދުމުގެ ޢަޒުމުގައި ނުހަނު ބޮޑަށް ވަކާލާތު ކުރި ޤައުމީ މައްސަލައެއްކަމުގައިވާތީއާއި، އިނގިރޭސި ދައުލަތުން ފަހުން ނިންމާފައިމިވާ ނިންމުމުގެ ސަބަބުން ދިވެހީން ޒަމާނުއްސުރެ މަސްވެރިކަންކުރަމުންއައި ކަނޑުގެ ސަރަޙައްދު އަލުން ދިވެހީންނަށް ފުރިހަމައަށް ލިބުމުގެ ފުރުޞަތު ބޮޑުވެފައިވާތީ، އިނގިރޭސި ދައުލަތާއިއެކު އަވަސް މަޝްވަރާތަކެއް ފައްޓަވާ ޒަމާނުއްސުރެ ދިވެހީން ގެންގުޅެމުން އައި ސްޓޭންޑް ދަމަހައްޓަވާ މި ކަމުގައި ދިވެހީންނަށް ކާމިޔާބު ހޯއްދަވައިދެއްވުމަށް މަނިކުފާނު މަސައްކަތްޕުޅު ކުރައްވާނޭކަމަށް އަޅުގަނޑު ޔަޤީންކުރަމެވެ"
ޖުމްހޫރީ ޕާޓީގެ ލީޑަރު ޤާސިމް އިބްރާހިމް
އެކަން ފާހަގަކުރައްވާ ޤާސިމް ވިދާޅުވީ އިޓްލޮސްގެ ނިންމުމާއި ގުޅިގެން ދިވެހީންގެ އަތުން ގެއްލިގެން ދިޔަ ދިވެހީންގެ މަސްކަނޑު އަނބުރާ ހޯދުމަށް ސަރުކާރާއި ރައީސުލްޖުމްހޫރިއްޔާ ޑރ މުއިއްޒަށް ފުރިހަމަ އެހީތެރިކަމާއި އެއްބާރުލުން ދިނުމަށް ޖުމްހޫރީ ޕާޓީ އޮތީ ފުރިހަމަޔަށް ތައްޔާރަށް ކަމަށެވެ.
މަސްކަނޑުން ގެއްލުނުބައި ހޯދުމުގެ މަސައްކަތް ލަސްނުކޮށް ސަރުކާރުން ފައްޓަވާނެކަމުގެ ފުރިހަމަ ޔަގީންކަން އޮތްކަމަށް ވެސް ޤާސިމް ވަނީ އޭނާ ކުރެއްވި ޕޯސްޓުގައި ވިދާޅުވެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
