ކޮންޓްރެކްޓު ހަމަނުވަނިސް ހޯރަފުށީ ދާއިރާއިން ކަނޑާލި 22 މީހުންގެ ހައްގުގައި ތެދުވާނަން: ސަލީމް

ނިމިދިޔަ ސަރުކާރުން އިންޑިއާ އާއި އެކު ފެށި ބޮޓްލިން ޕްލާންޓު މަޝްރޫއުގައި މަސައްކަތްކުރާ ހޯރަފުށީ ދާއިރާގެ 22 މީހަކު ވަޒީފާއިން ކަނޑާލާފައިވާ ކަމަށާއި، އެމީހުންގެ ހައްގުގައި ތެދުވާން ފަސް ނުޖެހޭނެކަމަށް އެ ދާއިރާގެ މެމްބަރު އަހުމަދު ސަލީމް ވިދާޅުވެއްޖެ އެވެ.

ސިޔާސީ ނޫން ވަޒީފާތަކުން އާންމު ވަކި ނުކުރައްވާނެ ކަމަށް ވިދާޅުވެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރިޔާސީ ކެމްޕޭނުގައި ވެވަޑައިގެންނެވި ވައުދާ ޚިލާފަށް ފެނަކަ ކޯޕަރޭޝަނުން މުވައްޒަފުން ވަކިކުރަމުން ގެންދާ ކަމަށް ބުނެ މަޖިލީހަށް ހުށައަޅާފައިވާ ކުއްލި މައްސަލައަށް ވާހަކަދައްކަވަމުން ސަލީމް ވިދާޅުވީ އޭނާގެ ދާއިރާއަށް ނިސްބަތްވާ 22 މުވައްޒަފުން ނޯޓިހެއް ވެސް ދިނުމަކާއި ނުލާ ކުއްލި ގޮތަކަށް ވަޒީފާއިން ކަނޑާލާފައިވާ ކަމަށެވެ.

"ހޯރަފުށީ ބޮޓްލިން ޕްލާންޓުގެ މަޝްރޫއުގައި މަސައްކަތްކުރާ 22 މުވައްޒަފަކު ކުއްލިގޮތަކަށް ރޭގަނޑުގެ ވަގުތެއްގައި ހޯލްސޭލްކޮށް ވަޒީފާއިން ވަކިކުރުމަކީ އަޅުގަނޑަށް ލިބިގެންދިޔަ ވަރަށް ބޮޑު ހައިރާން ކަމެއް"

ހޯރަފުށީ ދާއިރާގެ މެމްބަރު ސަލީމް

ސަލީމް ވިދާޅުވީ ވަޒީފާއިން ވަކިކުރެވިފައި ވަނީ އެ މަޝްރޫއުއަށް ކޮންޓްރެކްޓުގެ އުސޫލުން ނަގާފައިވާ މީހުން ކަމަށާއި، ވަޒީފާއިން ކަނޑާލީ ކޮންޓްރެކްޓު ހަމަވާން އެއްމަސް ދުވަސް އޮއްވާ އެއްވެސް ނޯޓިހެއް ވެސް ދިނުމަކާއި ނުލާ ކަމަށެވެ.

އެއާއެކު ސަލީމް ވިދާޅުވީ ދިވެހިރައްޔިތުންގެ ވަޒީފާތައް ގެއްލި، އެމީހުންގެ އާމްދަނީ ހުއްޓޭކަމަށް ވާނަމަ އެއީ ރައްޔިތުންގެ މަޖިލީހުގެ ކޮންމެ މެމްބަރަކުމެ އިންތިހާއަށް ކަންބޮޑުވާނެ ކަމެއް ކަމަށެވެ. ޔަގީނުން ވެސް އޭނާގެ ދާއިރާއިން ވަޒީފާއިން ކަނޑާލި މީހުންގެ ހައްގުގައި ތެދުވުމަށް ފަސް ނުޖެހޭނެ ކަމަށް ސަލީމު ވިދާޅުވި އެވެ.

"އަޅުގަނޑު ސަރުކާރަށް މި ގޮވާލަނީ މިހާރުން މިހާރަށް އެ ހުރިހާ މުވައްޒަފުން ވަޒީފާއަށް އަނބުރާ އިޔާދަކޮށްދެއްވުމަށް. ހަމައެކަނި އަނގަބަހަކުން ނޫން. ލިޔުމުން، ކޮންޓްރެކްޓު އާ ކުރުމުގެ ތެރެއިން އެކަން ނުކުރައްވައިފިކަމަށް ވާ ނަމަ އަޅުގަނޑުމެން ދެން ގާނޫނީ ގޮތުން އެ މުވައްޒަފުންގެ ހައްގުގައި ކުރަން ޖެހޭ ހުރިހާ މަސައްކަތެއް ކުރާނަން، އެކަމުގައި މި މަޖިލީސް ފަހަތަކަށް ނުޖެހޭނެ"

ހޯރަފުށީ ދާއިރާގެ މެމްބަރު އަހުމަދު ސަލީމް

ސަލީމް ވިދާޅުވީ ރިޔާސީ އިންތިޚާބުގައި ރައީސުލްޖުމްހޫރިއްޔާ ޑރ މުހައްމަދު މުއިއްޒު ރައްޔިތުންނަށް ދެއްކި ދިވެހީންގެ ރާއްޖެ އޮންނާނެ ގޮތުގެ ތަސައްވަރާއި އަދުގެ ހަގީގަތާއި ދިމާ ނުވާ ކަމަށެވެ.

ދިވެހީންގެ ރާއްޖޭގައި ފެނިގެންދާނެކަމަށް އޭރު ވިދާޅުވި ހިތްގައިމުކަން މިއަދު ހާސްކަމަކަށް ބަދަލުވެފައިވާއިރު، މީ އިންތިހާއަށް ހިތާމަކުރައްވާ ކަމެއްކަމަށް ސަލީމް ވަނީ ވިދާޅުވެފަ އެވެ.