ރައީސް ނަޝީދު އަށް "މުގާބެ" އޭ ގޮވައި އެމްޑީޕީ މެންބަރުން އިހްތިޖާޖު ކުރަނީ

ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަކީ ރޮބާޓް މުގާބެ ކަމަށް ބުނެ މަޖިލީހުގެ އެމްޑީޕީގެ މެންބަރުން ރިޔާސަތުގެ ކުރިމާތީގައި އިހްތިޖާޖު ކުރަން ފަށައިފިއެވެ.

މިއަދުގެ ރައްޔިތުންގެ މަޖިލީހުގެ ޖަލްސާގައި ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް (ސެމްބެ) ވަނީ ބަންޑާރަ ނާއިބު އިބްރާޙީމް ރިފްޢަތު މަޖިލީހުގެ އިމްތިޔާޒަށް އަރައިގެންފައިވާ ކަމަށް ބުނެ މައްސަލައެއް ހުށަހަޅާފައެވެ. އެ މައްސަލަ ހުށަހެޅުމަށް ނަޝީދު ފުރުސަތު ދެއްވާތީވެސް އެމްޑީޕީގެ މެންބަރުން ވަނީ ނުރުހުން ފާޅުކުރައްވާފައެވެ.

އެގޮތުން، މަރަދޫ ދާއިރާގެ މެންބަރު އިބްރާހީމް ޝަރީފް ވަނީ އެއީ މަޖިލީހުގެ ގަވާއިދާ ޚިލާފަށް ހުށަހެޅޭ މައްސަލައެއް ކަމަށާ، އެކަމަށް ފުރުސަތު ދެވިގެން ނުވާނެ ކަމަށް ވިދާޅުވެފައެވެ.

އެހެން ނަމަވެސް، ރައީސް ނަޝީދު ވަނީ އެއީ ގަވާއިދާއި އެއްގޮތަށް ހުށަހެޅޭ މައްސަލައެއް ކަމަށްބުނެ މައްސަލަ ހުށަހަޅަން ފުރުސަތު ދެއްވައި ވޯޓަށް އައްސަވާފައެވެ. އަދި އެމްޑީޕީގެ މެޖޯރިޓީ އޮންނަ މަޖިލީހުން އެ މައްސަލަ ވަނީ ބޭރުކޮށްލާފައެވެ. އެއާއެކު ނަޝީދު ވިދާޅުވީ، އިމްތިޔާޒްގެ ދެ މައްސަލަ ހުށަހެޅުނުއިރު އެއިން އެއްމައްސަލަ އަކީ ކޮމިޓީއަށް ހުށަހެޅުނު މައްސަލަ ކަމަށާ، އަދި ކޮމިޓީއަށް އެ މައްސަލަ ފޮނުވުމަށް އެއްވެސް މެމްބަރަކަށް އެމަނިކުފާނަށް ހުރަސް ނޭޅޭނެ ކަމަށެވެ.

އެކަމާއި ގުޅިގެން އެމްޑީޕީ މެންބަރުން ނުރުހުން ފާޅުކުރައްވައި ނިޒާމީ ނުކުތާ ނަންގަވާފައި ވާއިރު, ނައިފަރު ދާއިރާގެ މެންބަރު އަހުމަދު ޝިޔާމް ވަނީ ކޮމިޓީގެ އެ މައްސަލަ ކުރިއަށް ނުގެންދެވެނިސް ބަންޑާރަ ނައިބު ގެ އިތުބާރު ނެތްކަމުގެ މައްސަލައިގެ ބަހުސް މަޖިލީހުގައިވެސް ކުރިއަށް ނުގެންދެވޭނެ ކަމަށް ވިދާޅުވެފައެވެ. އަދި އިދިކޮޅު ފަރާތްތަކުންނާއި އެމްޑީޕީގެ މެންބަރުންވެސް މަޖިލީހުގައި އަޑުގަދަ ކުރައްވައ މަޖިލީހުގެ ނިޒާމު ގެއްލުވާލުމަށް މަސައްކަތްކުރުމުން ރައީސް ނަޝީދު ރިޔާސަތުގައި އިންނަވާ ނިންމެވީ މައްސަލަ ކުރިއަށް ނުގެންދިއުމަށެވެ. އަދި މަޖިލިސް އެވަގުތައް މެދުކަނޑާލުމަށެވެ.

އެއާއެކު މަޖިލީހުގެ އެމްޑީޕީ މެންބަރުން ވަނީ ރިޔާސަތު ކުރިމައްޗަށް އެއްވެ ރައީސް ނަޝީދަކީ، ޒިންބާބުވޭގައި ވެރިކަން ކުރެއްވި ޚުދުމުހުތާރު ވެރިއެއް ކަމަށްވާ މުގާބެ ކަމަށް ބުނެ ހުރިހާ މެންބަރުން އެއް އަޑަކުން މުގާބެއޭ ގޮވައި އިހްތިޖާޖު ކޮށް އަޑުގަދަ ކުރައްވާފައެވެ.

މަޖިލީހުގެ ރިޔާސަތާއި އިދިކޮޅު ފަރާތްތައް ގުޅިގެން ސަރުކާރުގެ ސިޔާސަތުތައް ތަންފީޒުކުރުމަށް ފުރުސަތު ނުދީ، މަޖިލީހަށް ސަރުކާރުން ހުށަހަޅާފައިވާ މުހިންމު ބިލުތަކުގެ މަސައްކަތް ކުރިއަށް ނުގެންދާ ކަމަށް ބުނެ، އެމްޑީޕީގެ މެންބަރުންގެ ނުރުހުން ވަނީ ރައީސް ނަޝީދަށް އަމާޒުވެފައެވެ.

އަދި މަޖިލީހުގެ ތަޅުމުގައި އިދިކޮޅު ފަރާތްތަކަށް ތަނަވަސް ފުރުސަތެއް ދެއްވައި އެމްޑީޕީއަށް ފުރުސަތު ހަނިކުރުމަށް ނަޝީދު މަސައްކަތް ކުރައްވާ ކަމަށްވެސް އެމްޑީޕީގެ މެމްބަރުން ތުހުމަތު ކުރައްވައެވެ.

މީގެ އިތުރުންވެސް، އިދިކޮޅު ފަރާތްތަކުން ހުށަހަޅާ "ބޭކާރު" ގަރާރު ތަކާއި ކުއްލި މައްސަލަތައް ހުށަހެޅުމަށް ރިޔާސަތުން ފުރުސަތު ދެއްވައި މަޖިލީހުގެ މުހިންމު ވަގުތުތައް "ބޭކާރު" ކަންކަމުގައި ހޭދަކުރާ ކަމަށްބުނެވެސް އެމްޑީޕީގެ މެންބަރުންގެ ނުރުހުން ނަޝީދަށް ވަނީ އަމާޒުވެފައެވެ.

އެފަދަ އެތައް ޝަކުވާއެއް ހުރި އިރުވެސް މަޖިލިސް ރައީސްކަމުން ނަޝީދު ވަކިކުރުމަށް އެމްޑީޕީއިން މިހާތަނަށް ނިންމާފައި ނުވާކަމަށް ޕާލަމެންޓްރީ ގުރޫޕުން ބުނެއެވެ.