ރައީސް ނަޝީދުގެ އިތުބާރު ނެތްކަމުގެ މައްސަލަ ހުށަހަޅަން ބޭނުންވާ ވަރަށް ސޮއި ނުލިބޭނެ: ދަ ޑިމޮކްރެޓްސް

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ހުށަހަޅަން ބޭނުންވާ މިންވަރަށް މެންބަރުންގެ ސޮއި ނުލިބޭނެ ކަމަށް އެމަނިކުފާނަށް ވަފާތެރި މެންބަރުން އުފައްދަވާފައިވާ ދަ ޑިމޮކްރެޓްސް ޕާޓީން ބުނެފި އެވެ.

ދަ ޑިމޮކްރެޓްސްގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ރައީސް ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ހުށަހަޅަން އެމްޑީޕީ ޕާލަމެންޓްރީ ގުރޫޕުން ނިންމި ނިންމުމާއި ގުޅިގެން ނޫސްވެރިއެއް ކުރި ސުވާލަކަށް ޖަވާބު ދެއްވަމުން ދަ ޑިމޮކްރެޓްސް އުފެއްދުމުގައި އިސްކޮށް ހަރަކާތްތެރިވަމުންދާ މެދު ހެންވޭރު ދާއިރާގެ މެންބަރު ޢަލީ އާޘިމް ވަނީ، އެއީ އެމްޑީޕީ ޕީޖީން ނިންމާ ނިންމުން ނޫން ކަމަށެވެ. އަދި އެއީ ރައީސް އޮފީހުގެ ނިންމުން ކަމަށާ، އެމްޑީޕީ ޕާލަމެންޓްރީ ގްރޫޕްގެ ނިންމުންތަކަކީ ރައީސް އޮފީހުގެ ނުފޫޒް ވަރަށް ބޮޑަށް އޮންނަ ނިންމުންތަކެއް ކަމަށް ވިދާޅުވެފައެވެ.

އެހެންކަމުން ރައީސް ނަޝީދުގެ އިތުބާރު ނެތްކަމުގެ މައްސަލަ ހުށަހެޅުމާއިި މެދުވެސްގޮތެއް ނިންމަވާނީ ރައީސް އޮފީހުން ކަމަށް އާޒިމް ވިދާޅުވި. އަދި މީގެ ކުރިންވެސް އެ މައްސަލަ ހުށަހަޅަން އެމްޑީޕީ ޕީޖީން އުޅުނު ކަމަށާ، އެހެން ނަމަވެސް އެކަން ކުރެވިފައި ނުވާއިރު, މިފަހަރުވެސް އެކަން ނުވާނެ ކަމަށް އޭނާ ވިދާޅުވި އެވެ.

އަޅުގަނޑު ގަބޫލެއް ނުކުރަން. ހުށައެއްވެސް ނޭޅޭނެ. އަދަދެއްވެސް ހަމައެއް ނުވާނެ. އެކަން ކުރެވޭނެ ކަމަށް އަޅުގަނޑުމެން ނުދެކެން. މަޖިލިސް ތެރޭގައި ކިތަންމެ މަސައްކަތްތަކެއް ހުރި ކަމުގައި ވިޔަސް، މަޖިލިސް ތެރޭގައި، ގިނަ މެންބަރުން ތާއީދެއް ނުކުރާނެ ރައީސް ނަޝީދުގެ އިތުބާރު ނެތް ކަމަކަށް.

ޢަލީ ޢާޒިމް

މިއާއެކު އާޒިމް ވިދާޅުވީ މިހާރުވެސް އެމްޑީޕީ މެންބަރުންގެ ތެރޭގައި ރައީސް ނަޝީދަށް ތާއީދު ކުރައްވާ މެންބަރުން މިހާރު ވެސް ތިއްްބަވާ ކަމަށާ، އެހެންކަމުން، އެ މައްސަލަ ހުށަހަޅަން ބޭނުންވާ މިންވަރަށް މެންބަރުންގެ ސޮއިވެސް ނުލިބޭނެ ކަމަށެވެ. އަދި އެ މައްސަލަ މަޖިލީހަށް ހުށަނާޅާނެ ކަމަށްވެސް އާޒިމް ވަނީ ތަކުރާރުކޮށް ވިދާޅުވެފަ އެވެ.

އާޒިމް މިފަދައިން ވިދާޅުވެފައިވާއިރު، އެމްޑީޕީ ޕާލަމެންޓްރީ ގްރޫޕުން މިއަދު ބޭއްްވި ނޫސްވެރިންގެ ބައްދަލުވުމުގައި އެ ޕާޓީގެ ޕާލަމެންޓްރީ ގްރޫޕްގެ ލީޑަރު މުހައްމަދު އަސްލަމް ވަނީ، މަޖިލީހުގައި އެ ޕާޓީ ތަމްސީލުކުރާ 42 މެމްބަރުންގެ ތެރެއިން 36 މެމްބަރުން ނަޝީދުގެ އިތުބާރު ނެތްކަމުގެ މައްސަލަ ހުށައެޅުމަށް އެއްބަސްވެފައިވާ ކަމަށް ވިދާޅުވެފައެވެ.

އަދި އެކަމަށް އެއްބަސް ނުވާ މެންބަރުންވެސް، އެކަމަށް ދެކޮޅު ނުހައްދަވާ ކަމަށާ، އެ މެމްބަރުން ވެސް މައްސަލަ ހުށަހެޅުމަށް ސޮއި ކުރައްވާނެ ކަމަށް އަސްލަމް ވިދާޅުވި އެވެ.