އާރަށުގެ މައްސަލައިގެ އިސްތިއުނާފީ އަޑުއެހުން މާދަމާ 2 ޖަހާއިރަށް ތާވަލްކޮށްފި

ކުރީގެ ރައީސް އަބްދުﷲ ޔާމިން އަބްދުލްޤައްޔޫމުގެ ފަރާތްޕުޅުން އިސްތިއުނާފު ކުރައްވާފައިވާ މައްސަލަ މާދަމާ މެންދުރު ފަހު ދޭއް ޖަހާއިރު ހައިކޯޓުގައި އޮންނާނެ ކަމަށާއި މި މައްސަލަ ޔޫޓިއުބުން ލައިވްކޮށް ފޮނުވާނެ ކަމަށް ކޯޓުން ބުނެފިއެވެ.

ވ އާރަށް ކުއްޔަށް ދޫކުރުމުގެ މުއާމަލާތާއި ގުޅުވާ ޔާމީންގެ މައްޗަށް ކްރިމިނަލް ކޯޓުން މިދިޔަ ޑިސެމްބަރު މަހުގެ 25 ގައި ކުރި 11 އަހަރުގެ ޖަލުހުކުމުގެ އިސްތިއުނާފު މައްސަލައިގެ ފުރަތަމަ އަޑުއެހުން ތާވަލް ކޮށްފައި ވަނީ މާދަމާއަށެވެ.

އާރަށު މުއާމަލާތާއި ގުޅުވާ ރައީސް ޔާމިނުގެ މައްޗަށް ކުރި ހުކުމާއި ގުޅިގެން އެމަނިކުފާނުގެ ފަރާތްޕުޅުން ހުށައެޅި އިސްތިއުނާފު ހައި ކޯޓުން ބަލައިގެންފައިވަނީ އޭޕްރިލް މަހުގެ 4 ގައެވެ.

އެ މައްސަލަ ބަލައިގަތުމަށްފަހު އަޑުއެހުންތައް ނުބާއްވާ ދިގުލައިގެން ދާތީ އިދިކޮޅު ކޯލިޝަނުން ގެންދަނީ ކަންބޮޑުވުން ފާޅުކުރަމުން ނެވެ. އަދި އެ މައްސަލަ އޮތް ހިސާބެއް ބެލުމަށް، އެ ކޯލިޝަނުންގެ ލީޑަރުން އެކި ފަހަރުމަތިން ވަނީ ހައި ކޯޓަށް ވަޑައިގެން ވަޑައިގަންނަވާފަ އެވެ.

މިއަދުވެސް އިދިކޮޅު ކޯލިޝަންގެ ލީޑަރުން ކޯޓަށް ވަޑައިގަންނަވާފައިވާއިރު، އެފަހުން މީޑިއާތަކަށް މައުލޫމާތު ދެއްވަމުން އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވީ އާރަށުގެ މައްސަލައިގެ އިސްތިއުނާފު އަންނަ ބުދަ ދުވަހު ފެށުމަށް ހަމަޖެހިފައިވާކަމަށް ހައިކޯޓުން މައުލޫމާތު ދީފައިވާ ކަމަށެވެ.

އެފަހުން ހައިކޯޓުން ވެސް ވަނީ އެކަން ކަށަވަރުކޮށްދީފައެވެ. އެ ކޯޓުން ބުނީ ރައީސް ޔާމީންގެ ފަރާތްޕުޅުން އިސްތިއުނާފުކޮށްފައިވާ އާރަށު މައްސަލައިގެ އަޑުއެހުންތައް އަންނަ ބުދަ ދުވަހުގެ މެންދުރު ފަހު 2:00 އަށް ތާވަލުކުރެވިފައިވާ ކަމަށެވެ.

އާރަށު މައްސަލައިގެ އިސްތިއުނާފު ބުދަ ދުވަހަށް ތާވަލުކުރެވިފައިވާއިރު، މިހާރު އެމަނިކުފާނު ގެންދަވަނީ އެ މައްސަލައާއި ގުޅިގެން އެމަނިކުފާނުގެ މައްޗަށް ކޮށްފައިވާ ޖަލު ހުކުމް ތަންފީޒު ކުރައްވަމުން ނެވެ.

މި މައްސަލަ އެމަނިކުފާނާއި އެއްކޮޅަށް ނިމިއްޖެކަމަށް ވާނަމަ، ޖަލުން މިނިވަންވެ ވަޑައިގެން ސިޔާސީ މަސައްކަތާއި ގުޅިވަޑައިގެންނެވޭނެ އެވެ. އަދި އެއީ ރިޔާސީ އިންތިޚާބަށް ތައްޔާރުވެ، ކެމްޕޭނު ހަރަކާތްތައް ކުރިއަށް ގެންދިއުމަށް އެމަނިކުފާނަށް ލިބިގެންދާނެ ވަރަށް ފަހި ފުރުސަތަކަށް ވެގެންދާނެ އެވެ.

އާރަށު މައްސަލައިގައި ރައީސް ޔާމިނުގެ މައްޗަށް ކޮށްފައިވަނީ ނުހައްގު ހުކުމެއް ކަމަށާއި، ހައި ކޯޓު މަރުހަލާއިން ރައީސް ޔާމިން މިނިވަންވެ ވަޑައިގަންނަވާނެ ކަމުގެ ފުރިހަމަ ޔަގީންކަން އޮތްކަމަށް އެމަނިކުފާނުގެ އިސް ޤާނޫނީ ވަކީލު ޑރ މުޙައްމަދު ޖަމީލު އަހުމަދު ވަނީ ވިދާޅުވެފަ އެވެ.