ޑަބްލިޔުއެޗްއޯއިން މަނާ ކުރި ކޮފް ސިރަޕް ރާއްޖެ އެތެރެ ނުކުރޭ: މިނިސްޓްރީ

ގެމްބިއާގެ ތުއްތު ކުދިންތަކެއް ކިޑްނީ މައްސަލަ ތަކެއް ކުރިމަތި ވުމަށްފަހު ނިޔާވީ އިންޑިޔާގެ ކުންފުންޏަކުން އުފައްދާފައިވާ ކޮފް ސިރަޕް އެއް ނުވަތަ ރޯގާ އަށާއި ކެއްސާތީ ދޭ ބޭހެއް ބޮއިގެން ކަމަށް ބެލެވޭ ކަމަަށް ބުނެ، ޑަބްލިޔުއެޗްއޯ އިން އެލާޓް ނެރެފައިވާ ކޮފް ސިރަޕް، ރާއްޖެއަށް އެތެރެ ކޮށްފައި ނުވާކަމަށް ހެލްތު މިނިސްޓްރީން ބުނެފިއެވެ.

އިންޑިއާގެ ނިއު ދިއްލީގެ "މެއިޑެން ފާމަކިއުޓިކަލްސް" އިން އުފައްދާފައިވާ ކޮފް ސިރަޕް އެއް ބުއިމުގެ ސަބަބުން ކިޑްނީ މައްސަލަ ތަކެއް ދިމާވެ، ގެމްބިއާގެ 66 ކުޑަ ކުދިން ވަނީ ނިޔާވެފައެވެ.

އެކަމާއި ގުޅިގެން ޑަބްލިޔުއެޗްއޯ އިން ކުރި ދިރާސާއަށް ފަހު އެ އިދާރާއިން ވަނީ އިންޑިއާގެ މެއިޑެން ފާމަސީއިން އުފައްދާފައިވާ އެންމެހައި އުފެއްދުންތަކެއް އެ ތަކެތި ހުރި ތަން ތަނުން ނަގައި، އެ ފާމަސީ ގެ އުފެއްދުންތަކާއި މެދު ސަމާކު ވުމަށްވެސް އިއްޔެ އަންގާފައެވެ.

މެއިޑެން ފާމަސީގެ އުފެއްދުންތައް އަދި މިހާތަނަށް ފެނިފައިވާނީ ގެމްބިއާ އިން އެކަނި ކަމުގައި ވީނަމަވެސް، ނުރަސްމީ އެކި ގޮތްގޮތުން އެތަކެތި އެހެން ސަރަހައްދު ތަކަށްވެސް ފޯރާފައި ވުމީ ވެދާނެ ކަމެއް ކަމަށްވެސް ޑަބްލިއުއެޗްއޯ އިން ބުނެއެވެ.

މި މައްސަލަ އާއި ގުޅިގެން ޑަބްލިއުއެޗްއޯ އިން ސަމާލު ނެރެފައިވާ ބޭސް ތަކަކީ:
• ޕްރޮމެތައިޒިން އޯރަލް ސޮލިއުޝަން Promethazine Oral Solution
• ކޮފެކްސްމަލިން ބޭބީ ކޮފް ސިރަޕް Kofexmalin Baby Cough Syrup
• މެކޮފް ބޭބީ ކޮފް ސިރަޕް Makoff Baby Cough Syrup
• މެގްރިޕް އެން ކޯލްޑް ސިރަޕް Magrip N Cold Syrup.

މި ކޮފް ސިރަޕް ތަކުގައި "ޑައިތިލީން ގްލައިކޯލް" އާއި "އެތިލީން ގްލައިކޯލް" އެކަށޭނެ މިންވަރަށް ވުރެ ގިނައިން ހުރި ކަމަށް ލެބޯޓަރީ ޓެސްޓް ތަކުން ކަށަވަރުވެފައިވާއިރު، އެ މިންވަރަށް މި މާއްދާތައް ހުރުމަކީ ނުރައްކާތެރި ކަމެއް ކަމަށާ، އަދި އޭގެ ސަބަބުން ކިޑްނީ މައްސަލަ ތައް ކުރިމަތިވުމަކީ ވެދާނެ ކަމެއް ކަމަށް ޑަބްލިޔުއެޗްއޯ އިން ބުނެފައިވެއެވެ.

މިއަހަރުގެ ޖުލައި މަހުގައި ގެމްބިއާގެ ފަސް އަހަރުން ދަށުގެ ތުއްތު ކުދިންތަކަކަަށް ކިޑްނީ މައްސަލަ ތަކެއް ކުރިމަތިވެ ނިޔާވުމާއި ގުޅިގެން އެ ސަރަހައްދުގެ ސިއްހަތާބެހޭ އިދާރާތަކުން ވަނީ އެކަން ސަމާލުކަމަށް ގެނެސްފައެވެ. އަދި އެގޮތުން ކިޑްނީ މައްސަލަ ދިމާވި ކުދިންތައް ނިޔާވެފައިވާއިރު، އެކުދިންނަށް އެ މައްސަލަ ތައް ކުރިމަތިވީ, އެ ސަރަހައްދުގައި ވިއްކަން ހުރި ރޯގާ ބޭހެއް ބޭނުންކުރިތާ 4 ނުވަތަ 5 ދުވަސް ފަހުންކަން އޭރުވަނީ ފާހަގަކުރެވިފައެވެ.

މިކަމާއި ގުޅިގެން އެފަދަ އެފަދަ އެއްވެސް ބޭހެއް ރާއްޖެ އެތެރެ ކޮށްފައިވޭތޯ "ވޮއިސް" އިން ކުރި ސުވާލަށް ޖަވާބު ދެއްވަމުން ހެލްތު މިނިސްޓްރީން ވަނީ، އެފަދަ ބޭހެއް ރާއްޖެ އެތެރެ ކޮށްފައި ނުވާކަމުގެ ޔަގީންކަން ދެއްވާފައެވެ.