ނަޝީދުގެ މައްސަލަ: މަޖިލީހުން ބުނީ ޙައްލަކީ ގަވައިދު އިސްލާހުކުރުން ކަމަށް

ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމަށް ހުށަހަޅާފައިވާ މައްސަލަ ކުރިޔަށް ގެންދެވޭނެ ގޮތެއް ހޯދަން އެމް.ޑީ.ޕީއިން ސުޕްރީމް ކޯޓަށް ހުށަހަޅާފައިވާ ދުސްތޫރީ މައްސަލަގެ އަޑުއެހުމުގައި މަޖިލީހުގެ ސްޓޭންޑު ހުށައަޅައިފި އެވެ.

މި މައްސަލައިގައި ކުރިއަށްދާ ސުޕްރިމް ކޯޓުގެ އަޑުއެހުމުގައި ރައްޔިތުންގެ މަޖިލީހުގެ ކައުންސިލަރ ޖެނެރަލް ފާތިމަތު ފިލްޒާ ވިދާޅުވީ ރައްޔިތުންގެ މަޖިލީހުގެ ރައީސްގެ އިތުބާރު ނެތް ކަމުގެ ގަރާރު ހުށަހަޅާ ޖަލްސާއެއްގެ ރިޔާސަތު މަޖިލީހުގެ ނައިބު ރައީސް ބަލަހައްޓަންޖެހޭ ކަމަށް ގަވައިދުގައި ބަޔާންކޮށްފައި އޮއްވާ އެ ނޫން ގޮތަކަށް އެކަން ކުރެވޭނީ ގަވައިދު ބަދަލުކޮށްގެން ކަމަށެވެ.

ފިޒްލާ މިފަދައިން ވިދާޅުވެފައިވަނީ އެމްޑީޕީެ ފަރާތުން ސުޕްރިމް ކޯޓަށް ހުށައަޅާފައިވާ ދުސްތޫރީ މައްސަލަ ބައްލަވާ ބެންޗުގައި ހިމެނިވަޑައިގަންނަވާ ހުސްނުއްދުއޫދު ކުރެއްވި ސުވާލަކަށް ޖަވާބުދެއްވަމުން ނެވެ.

ފަނޑިޔާރު ހުސްނުއްސުއޫދު ވަނީ މަޖިލީހުގެ ނައިބު ރައީސަށް ވެސް ރިޔާސަތު ނުބެލެހެއްޓޭ ނުވަތަ އުޒުރުވެރިވާ ހާލަތެއްގައި މަޖިލީހުގެ ގަވާއިދުގެ 44 ވަނަ މާއްދާގެ ދަށުން، މަޖިލީހުގައި އެންމެ ގިނަ ދުވަސްވީ މެމްބަރުންނަށް ރިޔާސަތާ ހަވާލުވޭ ގޮތަށް އޮންނަ އިރު، ދުނިޔޭގެ އެހެން ގައުމުތަކުގެ ގާނޫނު ހަދާ މަޖިލީހުގައި އަމަލުކުރަނީ ކޮން ގޮތަކަށްތޯ ސުވާލު ކުރައްވައިފަ އެވެ.

އެ ސުވާލަށް ޖަވާބުދެއްވަމުން ފިޒްލާ ވިދާޅުވީ މަޖިލީހުގެ ރައީސްގެ އިތުބާރު ނެތް ކަމުގެ ގަރާރެއްގެ ޖަލްސާގެ ރިޔާސަތު ވަކި ބޭފުޅަކު ބަލަހައްޓަވާ ގޮތަށް ރާއްޖޭގެ ގާނޫނު އަސާސީގައި ވެސް އަދި އެހެން ގައުމުތަކުން އަމަލުކުރާ އުސޫލުތަކުގައިވެސް ކަނޑއެޅިގެން ނޯންނަ ކަމަށެވެ.

އެހެން ނަމަވެސް މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ކުރިއަށްދާއިރު ރިޔާސަތުގައި އިންނަވަންވާނީ މަޖިލީހުގެ ނައިބުރައީސްކަމަށް ގަވައިދުގައި ބަޔާންކޮށްފައި ވާއިރު، އެކަމުން ހާމަވެގެންދަނީ އެފަދަ މައްސަލައެއްގެ މުހިންމުކަން ކަމަށާއި، އެކަމަށްދޭ އަހަންމިއްޔަތުގެ ބޮޑުކަންކަން ހާމަވެގެންދާއިރު އެ ނޫންގޮތަކަށް އެކަން ކުރެވޭނީ ގަވައިދު އެ ނޫންގޮތަކަށް އިސްލާހުކޮށްގެން ކަމަށް ގަބޫލުކުރައްވާކަމަށް މަޖިލީހުގެ ފަރާތުން ވަނީ ބުނެފައެވެ.

އޭގެ އިތުރުން ފިޒްލާ ވަނީ މަޖިލީހުގެ ޤަވާއިދުގެ 44 ވަނަ މާއްދާގެ (ބ) ގެ ދަށުން 5 މެންބަރުންނަށް ބެލެނީވެސް ވަކި ބާވަތްތަކެއްގެ މައްސަލަތަކެއް ކަމަށާއި، އެގޮތަށްވެސް މެންބަރަކަށް ރިޔާސަތު ބެލެހެއްޓޭނީ ވިދިވިދިގެން 3 ޖަލްސާގެ މުއްދަަތަކަށްކަން ފާހަގަކުރައްވާއެވެ.

މިއަދުގެ އަޑުއެހުމުގައި ފަނޑިޔާރު ހުސްނުއްސުއޫދު ވަނީ މަޖިލީހުގެ ރައީސް އަދި ނައިބު ރައީސް ގަސްދުގައި މަޖިލީހަށް ހާޒިރުވެވަޑައިނުގަންނަވާ ހާލަތުގައި "މަޖިލީސް ޑެޑްލޮލަކަށް" ހިގައިދާނެ ފަދަ ހާލަތުގައި އަމަލުކުރައްވާނެ ގޮތަކީ ކޮބައިތޯ އައްސަވާ ސުވާލު ކުރައްވާފަ އެވެ.

އެ ސުވާލަށް ޖަވާބުދެއްވަމުން ކައުންސިލާ ޖެނެރަލް ފިޒްލާ ވިދާޅުވީ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ހުށައަޅާފައި އޮތަސް، އެމްޑީޕީން އެ ދެކޭގޮތަށް މަޖިލީސް ހުއްޓިފައި އޮންނަން، ނުވަތަ މަސައްކަތްތައް މަޑުޖައްސާލާފައި އޮންނަން ޖެހޭނެކަމަށް ގަބޫލުނުކުރައްވާ ކަމަށެވެ.

އެގޮތުން މަޖިލީހަށް ގަރާރެއް ލިބުމަކީ މައްސަލަ ހުށައެޅުން ނޫން ކަމަށާއި، ގަރާރު ހުށައެޅުންކަމަށް ބެލެވޭނީ މަޖިލީހުގެ ޤާނޫނީ ޖަލްސާއެއްގައި ޤަރާރު ހުށަހެޅިގެންކަމަށް ވާތީ މަޖިލީހުގެ މަސައްކަތްތައް މިހާލަތުގައި ކުރިއަށް ގެންދެވޭނެކަމަށް ފިޒްލާ ވިދާޅުވި އެވެ. އަދި ވިދާޅުވީ މަޖިލީހުން އެފަދައިން ކަންކަން ކުރިއަށް ގެންދިއުމަށް ލާފާވެސް ދީފައިވާނެ ކަމަށެވެ.