ރައީސް ނަޝީދުގެ ކަންބޮޑުވުން: މިހާރު ސްކޫލްތަކުގައި ލަވަ މުބާރާތްތަކާއި އިތުރު ހަރަކާތްތަކެއް ނުބާއްވާ؛ މުޅި ޖީލު ހަލާކުވަނީ

ރާއްޖޭގެ ސްކޫލްތަކުގައި ކުރިއަށްގެންދާ އިތުރު ހަރަކާތްތަކާއި ލަވަ މުބާރާތްތައް ހުއްޓި، ތަޢުލީމީ މުޅި ޖީލެއް ހަލާކުވަމުންދާ ކަމަށް ވިދާޅުވެ ކުރީގެ ރައީސް މުޙައްމަދު ނަޝީދު ކަންބޮޑުވުން ފާޅުކުރައްވައިފިއެވެ.

ރޭ އެމްޑީޕީ ހަރުގޭގައި ބޭއްވި ޖަލްސާގައި ވާހަކަދައްކަވަމުން ރައީސް ނަޝީދު ވިދާޅުވީ، މަދަރުސާތަކުން ދަރިވަރުން ކިޔެވުން ފުރިހަމަނުކޮށް ވަކިވާ މިންވަރު ދުވަހެއް ދުވަހަކަށް އިތުރުވަމުންދާ ކަމަށެވެ. އަދި ތަޢުލީމީ މަންހަޖަކީ ކިތަންމެ ގިނަ މާހިރުންނާއި ތަޖުރިބާތަކަކާ އެކު އެތައް މަޝްވަރާއެއް ކޮށްގެން އެކުލަވާލަންޖެހޭ އެއްޗެއް ނަމަވެސް، މި ސަރުކާރުން އެކަން ކުރަމުންދަނީ އެފަދަ ހަމައަކުން ނޫން ކަމަށް ވިދާޅުވެ ފާޑުވިދާޅުވިއެވެ.

"ދަރިވަރެއް މިއުފައްދަނީ ޤައުމަކާ ހަވާލުވާން. އޭނާއަށް އަންގާދޭންވީ ކޯޗެއްތޯ ޓީޗަރު މީހާ މި ބުނެދޭންޖެހެނީ. އެ ބުނެދޭ އެ މުޤައްރަރު ފޯން ކޯލަކުން، ޓެކްސްޓަކުން މި ބަދަލުކުރަނީ. ދަރިވަރުންނަށް ވާނެ ގޮތް ދެން އަޅުގަނޑުމެން މާބޮޑަކަށް ވިސްނާކަށްވެސް ނުޖެހޭ. ދިވެހިރާއްޖޭގެ ޒުވާން ޖީލެއް މި ގެންދަނީ މި ނާގާބިލު ސަރުކާރުގެ ވިސްނުމުގެ ތެރެއަށް،" ނަޝީދު ވިދާޅުވިއެވެ.

މީގެއިތުރުން، ޤައުމީ ސަލާމް ކިޔުމާ ގުޅޭގޮތުން ވެސް ރައީސް ނަޝީދު ވަނީ ސަރުކާރަށް ވަރަށް ބޮޑަށް ފާޑުވިދާޅުވެފައެވެ. އެގޮތުން، ޤައުމީ ސަލާމް ކިޔުން ތަޢުލީމީ ދާއިރާއިން ގޯސްކަމެއްގެ ގޮތުގައި ސިފަކުރަމުންދާ ކަމަށާއި، ނަމަވެސް ވެރިން އެކަމުގައި ދައްކަވަނީ ދެފުށްދެގޮތް ސިޔާސަތެއް ކަމަށް ވިދާޅުވިއެވެ.

"މިހާރު ޤައުމީ ސަލާމް ކިޔުއްވާ ކޮންމެ އިރެއްގަ މިބޭފުޅުން ތިއްބަވަނީ ވަރަށް ބޮޑަށް މޭގަ އަތްއަޅުއްވައިގެން. ހާޓް އެޓޭކެއް ޖެހެނީކަމަށްވެސް ބައެއްފަހަރަށް ހީތައް ވެދޭ. މި ޤައުމީ ސަލާމް ވިއްކަވައިގެން ވަޑައިގަތީ. ވަޑައިގެން މަދަރުސާތަކުގަ ޤައުމީ ސަލާމް ކިޔުން މަނާކުރުން ވަރިހަމަ ކުރައްވައިގެން،" ނަޝީދު ވިދާޅުވިއެވެ.

ނަޝީދު އިތުރަށް ވިދާޅުވީ، ސްކޫލްތަކުގައި ލަވަ މުބާރާތްތަކާއި އިތުރު ކުޅިވަރުތައް ނުބާއްވާ ކަމަށާއި މަދަރުސާތަކުގެ އިތުރު ހަރަކާތްތައް މުޅިން ހުއްޓިފައިވާ ކަމަށެވެ.

ލަވަމުބާރާތެއް ނުބާއްވާނެ. އިތުރު ކުޅިވަރުތަކެއް މަދަރުސާގައި ނުބާއްވާނެ. މަދަރުސާތަކުގެ އިތުރު ހަރަކާތްތައް މުޅިން ގެއްލިގެންދަނީ ހުއްޓިގެންދަނީ. އަޅުގަނޑު ޔަގީން މިތަނުގަ ތިބި ކޮންމެ ބޭފުޅެއްގެވެސް ހަނދާނުގައި ހުންނާނެ އެމީހުން މަދަރުސާގައި އުޅުނު ދުވަސް. އިންޓަހައުސް މުބާރާތްވެގެންދަނީ މުޅި އުމުރަށް ހިތުގަ ބިންވަޅު ނެގިފަ ހުންނަ މުބާރާތަކަށް. މިއަދުގެ ދަރިވަރަކު ކީކޭތޯ ބުނާނީ ކޮބާތޯ މަދަރުސީ ދައުރުގެ ހަނދާނަކީ؟ ނޭނގެ… ޖީލެއް މި ހަލާކުކޮށްލަނީ. ދިވެހިރާއްޖޭގެ އިޤްތިޞާދު ހަލާކުކޮށްލުމަކީ އެއްކަމެއް. ދިވެހި މާލިއްޔަތު ރޫޅާލުމަކީ އެއްކަމެއް. އެހެންނަމަވެސް ދިވެހި ޒުވާނުން ދިވެހި ދަރިން އެމީހުންގެ މުސްތަޤްބަލް ހަލާކުކޮށްލާކަށް އަޅުގަނޑުމެންނަކަށް ދޫކޮށް ނުލެވޭނެ.

ކުދިން މަދަރުސާ ދޫކޮށް ދިއުމުގެ ނަތީޖާއަށް އަލިއަޅުއްވާލައްވަމުން އެމަނިކުފާނު ވިދާޅުވީ، ތުއްތުއިރުން ފެށިގެން ދުޅަހެޔޮކަން ދަށްވެ، ސްކޫލް މާޙައުލުގައި ބާކީވާ ކުދިން އެންމެ ފަހުން ގޭންގުތަކުގެ ލީޑަރުންނަށް ވެގެންދާ ކަމަށެވެ. އަދި އެފަދަ ކުދިން މަގުމައްޗަށް ގިނަވެ، އެކުދިން ހަމަމަގަށް އެޅުވުމަށް ދައުލަތުން ބޮޑެތި ޚަރަދުތަކެއް ކުރަންޖެހޭ ކަމަށް ވިދާޅުވިއެވެ.

ރައީސް ޑރ. މުޙައްމަދު މުޢިއްޒުގެ ސަރުކާރުގެ މަޤްބޫލުކަން ގެއްލިފައިވާ ކަމަށާއި، މި ސަރުކާރަށް ރައްޔިތުން އެދޭ ތަނަވަސްކަމާއި ޙައްޤު މިންވަރު ހޯދައިނުދެވޭނެ ކަމަށް ވިދާޅުވެ ނަޝީދު ވަނީ، ދިވެހި ދަރިވަރުންނާއި ބެލެނިވެރިންގެ ޙައްޤުގައި އެމްޑީޕީން ކުރަންޖެހޭ މަސައްކަތްތައް ދޫކޮށްނުލާނެ ކަމަށާއި އަލުން އެމްޑީޕީގެ ވެރިކަމެއް ރައްޔިތުންނަށް ހޯދައިދޭނެ ކަމަށް ވިދާޅުވެފައެވެ.