ރަސްމާލެ މަޝްރޫޢާ ގުޅިގެން އެމްޑީޕީގެ ޤައުމީ މަޖިލީހުގެ ކުއްލި ބައްދަލުވުމެއް ބާއްވަނީ

ރަސްމާލޭގައި އީގަލް ހިލްސްއާ ހަވާލުކޮށްގެން ހިންގުމަށް ހަމަޖެހިފައިވާ ބިޔަ މަޝްރޫޢާ ގުޅޭގޮތުން އިދިކޮޅު މައި ޕާޓީ، އެމްޑީޕީން ޢަމަލުކުރާނެ ގޮތަކާމެދު ގޮތެއް ނިންމުމަށް އެ ޕާޓީގެ ޤައުމީ މަޖިލީހުގެ ކުއްލި ބައްދަލުވުމެއް ބާއްވަން ތާވަލުކޮށްފިއެވެ.

ޕާޓީގެ 60 އަށް ވުރެ ގިނަ މެންބަރުން އެދިވަޑައިގެންނެވި މި މުހިންމު ބައްދަލުވުން ބޭއްވުމަށް ހަމަޖެހިފައިވަނީ އަންނަ އާދިއްތަ ދުވަހުގެ ރޭ 20:30 ގައެވެ.

މި މަޝްރޫޢު ޔޫއޭއީގެ އީގަލް ހިލްސް ކުންފުންޏާ ހަވާލުކުރުމަށް ނިންމާފައިވާއިރު، މިކަމާ ގުޅިގެން އެމްޑީޕީގެ އެތެރޭގައި ވަނީ ބޮޑެތި ޚިޔާލުތަފާތުވުންތަކެއް އުފެދިފެވެ. މި މައްސަލާގައި ޕާޓީގެ ޗެއާޕާސަން އަދި ކުރީގެ ރައީސް މުޙައްމަދު ނަޝީދު ވިދާޅުވެފައިވަނީ އުސޫލީ ގޮތުން ރެޒިޑެންސީ ޕްރޮގްރާމަކަށް ރާއްޖެ ހުޅުވާލުމަކީ ރަނގަޅުކަމެއް ކަމަށެވެ. ނަމަވެސް، ކޮންޓްރެކްޓްގެ ތަފްޞީލުތައް ހާމަނުކުރާކަން ފާހަގަކުރައްވައި، ސަރުކާރުން އެކަން ވީ އެންމެ އަވަހަކަށް މަޖިލީހަށް ހުށަހެޅުއްވުމަށް އެމަނިކުފާނު ވަނީ ގޮވާލައްވާފައެވެ.

ހަމައެއާއެކު، ޕާޓީގެ އެހެން އިސް ވެރިންނާއި ގިނަ މެންބަރުން ވަނީ މި މަޝްރޫޢާ މެދު ވަރަށް ބޮޑަށް ކަންބޮޑުވުން ފާޅުކުރައްވާފައެވެ. ކުރީގެ ރައީސް އިބްރާހީމް މުޙައްމަދު ޞާލިޙް ވިދާޅުވީ، އެމްޑީޕީގެ ސަރުކާރެއްގައި މިފަދަ ކަންކަމަށް ފުރުސަތު ދީގެން ނުވާނެ ކަމަށެވެ. އަދި ޤައުމީ މަޖިލީހުގެ ވަޓްސްއެޕް ގްރޫޕުގައި ވެސް މެންބަރުން ވަނީ މިފަދަ މަޝްރޫޢުތަކާ ދެކޮޅަށް ޕާޓީން ތެދުވަންޖެހޭނެ ކަމަށް ބުނެފައެވެ.

މި މައްސަލައާ ގުޅިގެން އެމްޑީޕީން ކުރިން ނެރުނު ބަޔާނެއްގައި ވަނީ އިންވެސްޓަރުންނަށް އެޕާޓީން އަބަދުވެސް މަރުހަބާ ކިޔާ ކަމަށް ބުނެފައެވެ. ނަމަވެސް ރަސްމާލެ އެއްބަސްވުމުގައިވާ ކަންކަން ހާމަކުރަމަށް ވަނީ ސަރުކާރަށް ގޮވާލާފައެވެ.

މި މަޝްރޫޢާ ގުޅިގެން އުފެދިފައިވާ ސުވާލުތަކަށް ޖަވާބުދެއްވަމުން ހައުސިން މިނިސްޓަރު ޑރ. ޢަބްދުﷲ މުއްޠަލިބު ވިދާޅުވެފައިވަނީ، ރަސްމާލެއިން އިސްރާއީލާ ގުޅުންހުރި އެއްވެސް ފަރާތަކަށް ޕްރޮޕަޓީ ނުގަނެވޭނެ ގޮތް ހަދާނެ ކަމަށެވެ.

އަންނަ އާދިއްތަ ދުވަހުގެ ރޭ ބާއްވާ ޤައުމީ މަޖިލީހުގެ ބައްދަލުވުމުން މި މަޝްރޫޢާ މެދު އެމްޑީޕީގެ ރަސްމީ ސިޔާސަތު ކަނޑައެޅިގެންދާނެއެވެ.