ވ. ފޮއްތެޔޮއިން ފުރައިގެން މާލެއަށް ދަތުރުކުރަމުންދިޔަ ދޯންޏެއް ރަސްމާލެ ފަރަށް އަރައިފި

ވ. ފޮއްތެޔޮއިން ފުރައިގެން މާލެއަށް ދަތުރުކުރަމުންދިޔަ "ކީސާ" ދޯނި ރަސްމާލޭގެ އިރުމަތީ ފަރާތުގެ ފަރަށް އަރައިފިއެވެ.

އެމްއެންޑީއެފްއިން ބުނި ގޮތުގައި، އެ ދޯނި ރަސްމާލެ ފަރަށް އެރިކަމުގެ މައުލޫމާތު ރޭ 23:51 ހާއިރު އެ އިދާރާއަށް ލިބުމާއެކު، އެމްއެންޑީއެފް މާލެ އޭރިއާ ކޮމާންޑް ކޯސްޓްގާޑް ސޮކްޑްރަންއިން ވަނީ، އެހީތެރިކަން ފޯރުކޮށްދިނުމުގެ ގޮތުން އެ ސަރަހައްދަށް ދަތުރުކޮށްފައެވެ.

އެގޮތުން، ރޭ ދަންވަރު 02:37 ހާއިރު އެމްއެންޑީއެފްއިން ވަނީ، އެ ދޯނި އޮތް ސަރަހައްދަށް ގޮސް، އެ ދޯނިން ދަތުރުކުރަމުންދިޔަ ދިވެއްސަކާއި، ތިން ބިދޭސީއަކު ސަލާމަތްކޮށް، ހާބަރކްރާފްޓަށް ނަގާފައެވެ.

މި ހާދިސާގައި އެ ދޯނީގެ ބިދޭސީ ފަޅުވެރިއެއްގެ ވައަތު ފަޔަށް އަނިޔާއެއް ވެފައިވާތީ އެ މިހާ ވަނީ، އިތުރު ފަރުވާއަށް ހުޅުމާލެ ހޮސްޕިޓަލަށް ގެންގޮސްފައެވެ.

މިއީ ރާއްޖެއަށް މޫސުން ގޯސް ދުވަސްވަރެއް ކަމުން، ކަމާބެހޭ އިދާރާތަކުން ދަނީ، ކަނޑުދަތުރުފަތުރު ކުރާއިރު އިތުރަށް ސަމާލުވުމަށް އާންމުންނަށް އިލްތިމާސްކުރަމުންނެވެ.