ހުޅުމާލެ ސަރަހައްދުގެ ޓޯ ކެޕޭސިޓީ އިތުރުކުރަން ފުލުހުން ފޯކް ލިފްޓެއް ހޯދަނީ
ހުޅުމާލޭ ސަރަހައްދުގައި ނުގަވައިދުން ޕާކްކޮށްފައި ހުންނަ އުޅަނދުތައް ނެގުމަށް ފުލުހުން ފަށާފައިވާ އޮޕަރޭޝަނުގެ ގާބިލިއްޔަތުކަން އިތުރުކުރުމަށް ފޯކް ލިފްޓެއް ހޯދުމަށް އަނެއްކާވެސް ފުލުހުން އިއުލާނުކޮށްފައެވެ.
ފުލުހުްނގެ ހިދުމަތުން ވަނީ މީގެ ކުރިންވެސް ޓޯ ކެޕޭސިޓީ އިތުރުކުރުމަށް ފޯކްލިފްޓެއް ހޯދުމަށް އިއުލާނުކޮށްފައެވެ. ނަމަވެސް ހުށަހެޅި މައުލޫމާތުތައް ފުރިހަމަ ނުވާތީވެ ފުލުހުން ވަނީ އަލުން ފޯކް ލިފްޓު ހޯދުމަށް އިއުލާނުކޮށްފައެވެ. ފުލުހުން ކުރި އިއުލާނުގައިވާގޮތުން ފޯކްލިފްޓު ފޯރުކޮށްދޭން ބޭނުންވާ ފަރާތްތަކުން މިމަހުގެ 29 ވާ އާދިއްތަ ދުވަހުގެ 12 ގެ ކުރިން ބިޑް ރަޖިސްޓްރީކުރަންޖެހެއެވެ.
ހުޅުމާލޭގައި ފުލުހުން ޓޯ ކެޕޭސިޓީ އިތުރުކުރުމުގެ މަސައްކަތް ފަށާފައިމިވަނީ މަގުތައްމަތީގައި ނުގަވައިދުން ޕާކްކުރުމުގެ މައްސަލަ އިންތިހާއަށް ބޮޑުވެ، ރައްޔިތުންގެ ޝަކުވާވެސް ބޮޑުވެފައި ވަނިކޮށެވެ. މީގެ ކުރިން މާލޭގެ އެކި ސަރަހައްދުތަކުގައި ކާރާ ޕިކަޕްފަދަ އުޅަނދުތައް ޕާކްކުރާ މައްސަލަ ބޮޑުވިނަމަވެސް، މިހާރު މިމައްސަލަ އެންމެބޮޑީ ހުޅުމާލެ ފޭސްދޭއް ސަރަހައްދުގައެވެ. ފޭސް ދޭއްގެ ހުރިހާ މަގުތަކެއްގައި ކަހަލަ ގޮތަކަށް ކާރާއި ޕިކަޕްފަދަ އުޅަނދުތައް މަގުގެ ދެފަޅީގައި ޕާކްކުރުމުގެ މައްސަލަ ބޮޑުވެފައިވާއިރު، ފުލުހުން ދޭތެރެއަކުން އެފަދަ އުޅަނދުތައް ޓޯކުރަމުންދާކަން ފާހަގަކޮށްލެވެއެވެ.
ހުޅުމާލޭ ފޭސް ދޭއްގައި އުސްކޮށް އިމާރާތްތައް ހަދަމުންދައިރު، ކުރިއަށްއޮތްތަނުގައި މަގުތައް މަތީގައި އުޅަނދުތައް ޕާކްކުރުމުގެ މި މައްސަލަ އިތުރަށް ބޮޑުވެގެންދާނޭކަމަށް ގިނަ ބަޔަކު ބުނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް