”ޒަޔަނިސްޓުން ގައުމު ހިފަނީ“ ކަމަށްބުނެ އަސާސެއްނެތް ވާހަކަދެއްކުމަކީ އެމްޑީޕީގެ އިތުބާރުގެއްލޭނެ ކަމެއް: ރައީސް ނަޝީދު

އެމްޑީޕީގެ ފިކުރާއި އަސާސްތަކާ ޚިލާފަށް، އެ ޕާޓީގެ މިހާރުގެ މިސްރާބު ހުރި ގޮތާމެދު ޕާޓީގެ ޗެއާޕާސަން އަދި ކުރީގެ ރައީސް މުޙައްމަދު ނަޝީދު ކަންބޮޑުވުންފާޅުކުރައްވައިފިއެވެ.

އެކްސްގައި ކުރެއްވި ޕޯސްޓެއްގައި ރައީސް ނަޝީދު ވިދާޅުވީ، އެމްޑީޕީއަކީ އަބަދުވެސް ހުޅުވާލެވިފައިވާ ވިސްނުންތަކަށާއި، ޑިމޮކްރެޓިކް އިސްލާހީ ބަދަލުތަކަށް ވަކާލާތުކުރި ޕާޓީއެއް ކަމަށެވެ. ނަމަވެސް، މިހާރަކަށް އައިސް ބޭރު މީހުންނާ މެދު ނަފުރަތު އުފެއްދުމާއި، ”ހައްދުފަހަނައެޅި ގައުމިއްޔަތު“ ފަތުރާ ޕާޓީއެއްގެ ސިފަ އެމްޑީޕީން ފެންނަމުންދާ ކަމަށާއި، މިއީ ޕާޓީ އުފެދިގެން އައި އަސާސްތަކާއި، ސިޔާސީ އައިޑެންޓިޓީއާ މުޅިން ޚިލާފު ކަމެއް ކަމަށް އެމަނިކުފާނު ފާހަގަކުރެއްވިއެވެ.

މި މޭރުމުން ވާހަކަދައްކަވަމުން، އެމަނިކުފާނު ވަނީ މާޒީގައި އެމްޑީޕީން ކުރިއަށްގެންދިޔަ "ބިރަކާ ނުލައި މަޖާކުރުން" ކެމްޕޭނުގެ ހަނދާންތައް އައުކުރައްވާފައެވެ. އެ ކެމްޕޭނުގެ ސަބަބުން ޕާޓީގެ މަގުބޫލުކަން އިތުރުވެ، އެހެން މީހުން ބާކީނުވެ، ގާތްގަނޑަކަށް ވިހި ހާހެއްހާ އިތުރު ވޯޓު ޕާޓީއަށް ލިބިގެންދިޔަކަން އެމަނިކުފާނު ފާހަގަކުރެއްވިއެވެ.

އެމްޑީޕީ މިހާރު އޮތީ ވަރަށް ނާޒުކު ހިސާބެއްގައިކަން ފާހަގަކުރައްވައި، ޕާޓީ އަމިއްލައަށް ހަލާކުގެ ތެރެއަށް ވެއްޓުނަނުދީ ސަލާމަތްކުރުމަށް ޕާޓީގެ އިޚްލާސްތެރި މެންބަރުން ކުރިއަށް ނުކުތުމަށް ރައީސް ނަޝީދު ގޮވާލެއްވިއެވެ. އަދި ސިޔާސީ ކަންކަމުގައި ނަޒާހަތްތެރިކަން އިސްކުރުމުގެ ހިކުމަތާއި ހިތްވަރު މިންވަރުކޮށްދެއްވުން އެދި ދުޢާކުރެއްވިއެވެ.

ރައީސް ނަޝީދު މިފަދައިން ވިދާޅުވެފައި މިވަނީ، ރަސްމާލެ ތަރައްޤީކުރަން އީގަލްސް ހިލްސް އާ ހަވާލުކުރުމާ ގުޅިގެން އެކަމަށް އެމްޑީޕީގެ ބައެއް ފަރާތްތަކުން ވަރަށް ބޮޑަށް ފާޑުކިޔައި، އެ މަޝްރޫޢު ހުއްޓާލުމަށް ގޮވާލަމުންދާ ދަނޑިވަޅެއްގައެވެ.