ވެލާ ކަހަނބަށް މޫދުގައި ކާންދިނުމާ، އެއާއެކު ފީނާ އިރު ހަ ފޫޓަށް ވުރެ ކައިރިވުން މަނާކޮށް ގަވާއިދު އިސްލާހުކޮށްފި!

ވެލަޔާއި ކަހަނބާ އެކު ފަތައި ފީނާ އުޅޭ އިރު، ފީނާ ނުވަތަ ފަތާ މީހާ އާ އެ އެެެއްޗިއްސާ ދެމެދު ހަފޫޓުގެ ދުރުމިނެއް ބަހައްޓަން ޖެހޭ ގޮތަށް ގަވައިދު ބަދަލުކޮށްފި އެވެ.

"ގުދުރަތީ ގޮތުގައި ނުވަތަ ތަބައީ ގޮތުގައި ހިމާޔަތްކޮށް ރައްކާތެރިކުރާ ދިރޭތަކެއްޗާ ބެހޭ ގަވައިދު"އަށް ގެނެވުނު އިސްލާހު އިއްޔެ ގެޒެޓްކޮށްފައިވާއިރު، އޭގައި ވެލަޔާއި ކަހަނބާއި ، އެ ތަކެތީގެ މާޙައުލުތައް ރައްކައުތެރިކުރުމުގައި ޢަމަލުކުރާނެގޮތުގެ އުސޫލުތައް ވަނީ ކަނޑައަޅާފައެވެ.

އެގޮތުން، ހިމަނާފައިވާ ކަންކަމުގެ ތެރޭގައި؛

1) ވެލާ ނުވަތަ ކަހަނބަކީ ބާރު އަޑުތަކަށް ފަސޭހައިން ސިހޭ ދިރުމަކަށްވާތީ، ވެލަޔާއެކު ނުވަތަ ކަހަނބާއެކު ފީނާއިރު ނުވަތަ ފަތާއިރު އަޑުގަދަވާގޮތަށް ބަކަތަޅައި ހަދައިގެން ނުވާނެއެވެ.

2) ވެލަޔާއެކު ނުވަތަ ކަހަނބާއެކު ފީނައިފައި ނުވަތަ ފަތައިފައި ދާންވާނީ، ވެލާގެ ނުވަތަ ކަހަނބުގެ އަރިމަތިންނެވެ.

3) ވެލަޔާއެކު ނުވަތަ ކަހަނބާއެކު ފަތާއިރު ނުވަތަ ފީނާއިރު އަބަދުވެސް އެ އެއްޗެއްސާ 6 ފޫޓުގެ ދުރުމިން ބަހައްޓަންވާނެއެވެ. އަދި ފަތާމީހާގެ ނުވަތަ ފީނާމީހާގެ ގާތަށް އެސޮރުމެން އަތުވެއްޖެނަމ،ަ މަޑުމަޑުން ހަމަޖެހިލައިގެން އޮވެ، ވެލާ ނުވަތަ ކަހަނބު ބޭނުން ދިމާއަކަށް ދަންދެން މަޑުކުރަންވާނެއެވެ.

4) ވެލަޔާއެކު ނުވަތަ ކަހަނބާއެކު ފަތާއިރު ނުވަތަ ފީނާއިރު، ނޫނީ ވެލާ ނުވަތަ ކަހަނބު މޫދުއަޑީގައި އޮންނަ ވަގުތުތަކުގައި އޭގެ މަތިން ފަތައިގެން ނުވަތަ ފީނައިގެން ނުވާނެއެވެ.

5) ވެލަޔާއެކު ނުވަތަ ކަހަނބާއެކު ފަތާއިރު ނުވަތަ ފީނާއިރު، ވެލާގެ ނުވަތަ ކަހަނބު، ފަހަތުން ފައްސައިގެން ނުވާނެއެވ.ެ

6) ވެލަޔާއެކު ނުވަތަ ކަހަނބާއެކު މޫދުގައި ހަރަކާތްތެރިވާއިރު، ވެލާގެ ނުވަތަ ކަހަނބުގެ ޠަބީޢީ އުޅުމަށް ބުރޫއަރާފަދަ އެއްވެސް ކަމެއް ކޮށްގެން ނުވާނެއެވެ.

7) ވެލަޔާއެކު ނުވަތަ ކަހަނބާއެކު ފަތާއިރު ނުވަތަ ފީނާއިރު, އަދި އެއްވެސް ޤުދުރަތީ މާޙައުލެއްގައި ހަރަކާތްތެރިވަނިކޮށް ވެލަޔަށް ނުވަތަ ކަހަނބަށް ކާންދީގެން ނުވާނެއެވެ.