ދަ ޑިމޮކްރެޓްސްއިން ގަލޮޅު ދެކުނު ދާއިރާގެ ކައުންސިލަރު ރީހާން އިސްތިއުފާދެއްވައިފި
މާލޭ ސިޓީގެ ގަލޮޅު ދެކުނު ދާއިރާގެ ކައުންސިލަރު މަރްޔަމް ރީހާން ނާޒިމް ދަ ޑިމޮކްރެޓްސް ޕާޓީން އިސްތިއުފާދެއްވައިފި އެވެ.
ރީހާން މިއަދު އެކްސްގައި ކުރެއްވި ޕޯސްޓެއްގައި ވަނީ އެޕާޓިން ވަކި ވުމަށް އޭނާ ހުށަހަޅުއްވާފައިވާ ކަމަށެވެ. މީގެ އިތުރުން މިކަމާއި ގުޅުން ހުރި ތަފްސީލެއް ދެއްވާފައެއް ނުވެއެވެ.
އެންމެފަހުން ބޭއްވި ލޯކަލް ކައުންސިލް އިންތިހާބުގައި މާލޭ ސިޓީގެ ކައުންސިލުގެ މެންބަރު ކަން ރީހާން ކާމިޔާބު ކުރައްވާފައި ވަނީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޓިކެޓުގައި ވާދަކުރައްވައިގެންނެވެ.
އެހެންނަމަވެސް އެމްޑީޕީގެ ތެރޭގައި އުފެދުނު ހިޔާލުތަފާތުވުންތަކާ އެކު ކުރީގެ ރައީސް މުހައްމަދު ނަޝީދު އިސްވެ ހުންނަވާ އުފެއްދެވި ދަ ޑިމޮކްރެޓްސްއަށް ރީހާން ވަނީ ސޮއިކުރައްވާފަ އެވެ .
މިދިޔަ ހޮނިހިރު ދުވަހު ޑިމޮކްރެޓްސްއިން ބޭއްވި އެ ޕާޓީގެ ފުރަތަމަ އެތެރޭގެ އިންތިހާބުގައި ރީހާން ވަނީ އަންހެން ނައިބު ރައީސްކަމުގެ މަގާމަށް ވާދަކުރައްވާފަ އެވެ. އެ އިންތިހާބުގައި އޭނާ ވަނީ 1,239 ވޯޓު ހޯއްދަވާފައެވެ. އެކަމަކު ރީހާންއަށް ވުރެ 807 ވޯޓު އިތުރަށް ހޯއްދަވައިގެން އަންހެން ނައިބު ރައީސްކަމުގެ މަގާމަށް ކުރިމަތިލެއްވި އާޝިއަތު އަލައިކާ އަދްނާން ވަނީ އެމަގާމަށް އިންތިހާބު ވެވަޑައިގެންފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
