މަހިބަދޫ ފުޓުބޯޅައިގެ ރަސްގެފާނު، ޖިބިއްލީން، ޒުވާނުންގެ ފުޓުބޯޅަ މުބާރާތުގެ ތަށި 11 ވަނަ ފަހަރަށް އުފުލާލައިފި!

މަހިބަދޫ ޒުވާނުންގެ 20 ވަނަ ފުޓުބޯޅަ މުބާރާތުގެ ޗެމްޕިއަންކަން ކޮށް، އެރަށު ފުޓުބޯޅައިގެ ރަސްގެފާނު، ޖިބިއްލީ ސްޕޯޓްސް ކްލަބުން މުބާރާތުގެ ތަށި 11 ވަނަ ފަހަރަށް އުފުލާލައިފިއެވެ.

މަހިބަދޫ ޕެލޭ ސްޓޭޑިއަމްގައި މިއަދު ހަވީރު ކުޅެވުނު ޒުވާނުންގެ ފުޓުބޯޅަ މުބާރާތުގެ ފައިނަލް މެޗުގައި ވާދަ ކޮށްފައިވަނީ އެން ޓީ ޔުނައިޓެޑް އާއި ޖިބިއްލީ ސްޕޯޓްސް ކްލަބެވެ.

ވަރަށް ވާދަވެރި ކުޅުމެއް ފެނިގެންދިޔަ މި މެޗުގެ ފުރަތަމަ ލަނޑު ކާމިޔާބު ކޮށްފައިވަނީ އެން ޓީ ޔުނައިޓެޑުންނެވެ. ފުރަތަމަ ހާފު ނިމެން ކައިރިވެފައި ވަނިކޮށް މެޗުގެ 42 ވަނަ މިނެޓްގައި އެން ޓީއަށް މި ލަނޑު ކާމިޔާބު ކޮށްދީފައިވަނީ އެ ޓީމުގެ ޖާޒީ ނަންބަރު 9 އިބްރާހީމް މަހުދީއެވެ.

ނަމަވެސް، އެން ޓީން ލަނޑުޖެހިތާ ގާތް ގަނޑަކަށް 10 މިނެޓް ތެރޭގައި ޖިބިއްލީން ވަނީ އެން ޓީ ކޮޅަށް ލަނޑުޖަހައި ނަތީޖާ ހަމަހަމަ ކޮށްފައެވެ. މެޗުގެ 44 ވަނަ މިނެޓުގައި ޖިބިއްލީއަށް މި ލަނޑު ކާމިޔާބު ކޮށްދިނީ އެ ޓީމުގެ ޖާޒީ ނަންބަރު 17 އަހަދުالله އެވެ.

ފުރަތަމަ ހާފު ނިންމާލި އިރު 1-1 ގެ ނަތީޖާ އަކުން ދެ ޓީމު އެއްވަރުކޮށް އޮތް ނަމަވެސް، ދެވަނަ ހާފުގައި ޖިބިއްލީން ވަނީ ޓީމުގެ ކުޅުން އިތުރަށް ވަރުގަދަކޮށް ލީޑު ނަގާފައެވެ. އެގޮތުން މެޗުގެ 69 ވަނަ މިނެޓްގައި ޖިބިއްލީއަށް ދެވަނަ ލަނޑު ކާމިޔާބު ކޮށްދީފައިވަނީ ޖާޒީ ނަންބަރު 18 ރިޒުވާން (ރިޒޭ) އެވެ.

މި ނަތީޖާ އާއެކު މެޗު ނިމިގެން ގޮސްފައިވާއިރު، ޖިބިއްލީ މިވަނީ ތަށި ދިފާއުކޮށް މުބާރާތުގެ ޗެމްޕިއަންކަން ހޯދައި އެ ޓީމުގެ ކާމިޔާބީ އަށް އިތުރު ބޮޅެއް އަމުނާލާފައެވެ.

ޒުވާނުންގެ މުބާރާތުގެ މިހާތަނަށް ބޭއްވުނު މުބާރާތްތަކުން، 2010, 2012، 2013، 2014, 2016, 2017, 2018, 2019, 2021, 2022, ވަނަ އަހަރު ބޭއްވުނު މުބާރާތުގައި ވެސް ޗެންޕިއަންކަން ކޮށްފައިވަނީ ޖިބިއްލީންނެވެ.