ރ. އަތޮޅަކީ އޮންނަ ތަނެއްކަންވެސް އެނގުނީ ރައީސް ސޯލިހު ވެރިކަން އައިފަހުން: އިސްމާއިލް
ރ. އަތޮޅަކީ އޮންނަ އަތޮޅެއްކަންވެސް ބަޔަކަށް އެނގުނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވެރިކަމަށް ވަޑައިގަތުމަށްފަހު ކަމަށް މަޖިލީހުގެ ދުވާފަރު ދާއިރާގެ މެމްބަރު އިސްމާއިލް އަހުމަދު ވިދާޅުވެއްޖެ އެވެ.
މެމްބަރު އިސްމާއިލް އެފަދައިން ވިދާޅުވެފައިވަނީ ރައީސް ސޯލިހު ރ އަތޮޅަށް ކުރައްވާ ދަތުރުފުޅުގައި އެ އަތޮޅު މީދޫގައި ބޭއްވި އެމަނިކުފާނުގެ ކެމްޕޭނު ޖަލްސާއެއްގައި ވާހަކަދައްކަވަމުން ނެވެ.
އެގޮތުން މެމްބަރު އިސްމާއިލް ވިދާޅުވީ ވޭތުވެ ދިޔަ ވެރިކަންތަކުގައި ރ އަތޮޅަކީ ވަރަށް ބޮޑަށް އެކަހެރިކޮށް ބާކީކޮށްފައި އޮންނަ އަތޮޅެއްކަމަށެވެ.
އެހެން ނަމަވެސް ރައީސް ސޯލިހު ވެރިކަމަށް ވަޑައިގެން، ފާއިތުވި 4 އަހަރު ތެރޭގައި ރ އަތޮޅަށް ބޭނުންވާ ވަރަށް ގިނަ ކަންކަން ފުއްދަވާދެއްވާފައި ވާކަމަށް އޭނާ ވިދާޅުވިއެވެ.
"އަޅުގަނޑުމެން ގަބޫލުކުރަންވީ ހަގީގަތަކީ މި ފާއިތުވެދިޔަ ހުރިހާ ދައުރެއްގައި މި ރ އަތޮޅު އޮތީ ބިކަވެ، ބާކީވެފައި. މި 4 އަހަރު ފިޔަވައި ރާއްޖޭގައި މަޝްހޫރު ގޮތެއްގައި ނޫނީ ރަނގަޅު އިންގިލާބީ ބަދަލެއް މި ރ އަތޮޅަށް ގެނެސްދެއްވި ރައީސެއް އަޅުގަނޑުމެންނެއް ހަމަގައިމުވެސް ދެކެފައެއް ނުވޭ"
ދުވާފަރު ދާއިރާގެ މެމްބަރު އިސްމާއިލް މުހައްމަދު
މެމްބަރު އިސްމާއިލް ވިދާޅުވީ ރައީސް ސޯލިހަކީ ތަފާތު ލީޑަރެއްކަމަށެވެ. އަދި ތަފާތު ދައްކަވަމުން އަންނަ ލީޑަރެއް ކަމަށެވެ.
ރ އަތޮޅާއި މުޅި ރާއްޖެއަށް އެމަނިކުފާނު ގެނެސްދެއްވަމުން އަންނަ ކުރިއެރުންތައް އެގޮތުގައި ދެމެހެއްޓުމަށް މި ޕްރައިމަރީ އެމަނިކުފާނަށް ކާމިޔާބުކޮށްދީ، ދެވަނަ ދައުރެއް އެމަނިކުފާނަށް ހޯއްދަވާދެއްވުމަކީ ލާޒިމު ކަމެއްކަމަށް އޭނާ ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
