ވަރުގަދަ ޓީމެއް އެކުލަވާލުމަށްފަހު މިއަހަރުގެ ބައިބަލާ މުބާރާތަށް ވިއޭނާ ސްޕޯޓްސް އިން ތައްޔާރުވާންފަށައިފި!

ދެ އަހަރުގެ މެދުކެނޑުމަކަށް ފަހު މިއަހަރުގެ ބައިބަލާ މުބާރާތުގައި ބައިވެރިވާ ވިއޭނާ ސްޕޯޓްސް އިން ވަރުގަދަ ޓީމެއް އެކުލަވާލުމަށްފަހު އެޓީމުގެ ފަރިތަކުރުންތައް ފަށައިފި އެވެ.

2019 ވަނަ އަހަރުގެ ބައިބަލާ މުބާރާތުގައި ބައިވެރިވެ ގަދަ 8 ޓީމުތެރޭގައި ހިމެނުނު ވިއޭނާ އިން އެމުބާރާތުގައި ދެޓީމް ބައިވެރިކޮއްފައިވާއިރު، މި އަހަރުގެ މުބާރާތައް އެޓީމުން ވަނީ ވަރުގަދަ ޓީމެއް އެކުލަވާލާފައެވެ.

ވިއޭނާ ސްޕޯޓްސްގެ ފަރާތުން އެކުލަބުގެ މަސްއޫލުވެރިޔާ އަލީފް ވޮއިސް އެމްވީ އަށް މައުލޫމާތު ދެމުން ބުނީ މިއަހަރުގެ މުބާރާތުގައި ރަގަޅު ކާމިޔާބީއެއް ހޯދުމަށް އެޓީމުން ދުރާލާ ފަރިތަކުރުން ފަށާފައި ވަނީ އެކުލަބުގެ އަމިއްލަ ރިންގެއްގައި ކަމަށާއި، މި އަހަރުގެ މުބާރާތުގައި ފެނިގެންދާ ވިއޭނާގެ ޓީމަކީ އޯލް ސްޓާ ޓީމެއް ކަމަށެވެ.

މިފަހަރުގެ ޓީމުގައި ހިމެނޭނެ މިސްޓަރ ބައިބަލާގެ މަގާމު ހޯދާފައިވާ ޒަހީންޓޭގެ އިތުރުން ގަދަ ފަހެއްގައި ހިމެނިފައިވާ އިތުރު ހަތަރު ކުޅުންތެރިން. އޭގެތެރޭގައި އަތީގު، އިރުފާން، ފައިސަލްގެ އިތުރުން އަހުސަލް ހިމެނެއެވެ.

1444 ވަނަ އަހަރުގެ ބައިބަލާ މުބާރާތުގައި ބައިވެރިވާ ވިއޭނާ ސްޕޯޓްސްގެ މީޑިއާ ޕާޓްނަރަކީ ވޮއިސް އެމްވީ އެވެ.