މުދަލާއި ޚިދުމަތުގެ އަގު ބޮޑުވަނީ ސަރުކާރާއި ސަރުކާރުގެ ކުންފުނިތަކުން ވައްކަން ކުރާތީ: ހަސަން

މުދަލާއި ޚިދުމަތުގެ އަގުތައް ބޮޑުވަމުން އަންނަނީ ސަރުކާރާއި ސަރުކާރު ހިއްސާވާ ކުންފުނިތަކުގެ ތެރޭގައި ވައްކަން ގިނަ ވުމުން ކަމަށް ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާއަށް ހުށައަޅާފައިވާ ރާއްޖޭގައި މުދަލާއި ޚިދުމަތުގެ އަގުބޮޑުވުން ކޮންޓްރޯލުކުރުމަށް ސަރުކާރަށް ގޮވާލާ ގަރާރަށް ބަހުސްކުރައްވަމުން ހަސަން ވިދާޅުވީ، މުދަލާއި ޚިދުމަތުގެ އަގު ބޮޑުވާ މައްސަލަ އަކީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށްވެސް އޮޅިވާލެވޭނެ މައްސަލައެއް ނޫން ކަމަށެވެ.

އަދި މުދަލާއި ޚިދުމަތުގެ އަގު ބޮޑުވާ ސަބަބަށް އަލިއަޅުވާލައްވައި ވާހަކަ ދައްކަވަމުން ހަސަން ވިދާޅުވީ، އެކަން އެގޮތަށް ދިމާވަނީ ސަރުކާރާއި ސަރުކާރު ހިއްސާވާ ކުންފުނިތަކުގެ ތެރޭގައި ވައްކަން ގިނަ ވުމުން ކަމަށެވެ.

ސަރުކާރު ހިއްސާވާ ކުންފުނިތައް އެއީ ރައީސުލްޖުމްހޫރިއްޔާގެ ކެންޕެއިނަށް، ވޯޓު ހޯދަންވެގެން، ކުރަން މަސައްކަތެއް ނެތް ކަމުގައި ވިޔަސް، ތަންތަނުން މީހުން ހޯދައިގެން، ވަޒީފާ ދީގެން، އެމީހުންނަށް މުސާރަދޭން ހަދައިގެން ވެގެން އުޅޭ ކަމެއް.

ހެންވޭރު ހުޅަނގު ދާއިރާގެ މެންބަރު ހަސަން ލަތީފް

ހަސަން ވިދާޅުވީ، ޑިމޮކްރެޓުންގެ ސިޔާސަތަކީ ގޭބިސީ ތަކުގެ މުސާރަ އިތުރު ކުރުން ކަމަށެވެ. އެހެން ނަމަވެސް، އެއާއި ޚިލާފަށް ރާއްޖޭގައި މިހާރު އޮތް ސަރުކާރުގެ ސިޔާސަތަކީ ސަރުކާރު ހިއްސާވާ ކުންފުނިތައް ބޮޑުކޮށް، އެ ކުންފުނިތަކުގެ މުވައްޒަފުންގެ އަދަދު އިތުރުކޮށް އެ މީހުންނަށް މުސާރަ ދީދީ ތިބުން ކަމަށެވެ.

ބައްލަވާލައްވާ މަސްވެރިކަމުގެ ސިނާއަތަށް ރައީސުލްޖުމްހޫރިއްޔާ ހަދާފައި އޮތް ގޮތް. މުޅި މަސްވެރިކަމުގެ ސިނާއަތް އެ އޮތީ ފުނޑުފުނޑު ކޮށްލާފައި. ބޮޑެތި އޮޑިފަހަރުތައް އެހުރީ އެހެލާފައި. ކޮބައިތޯ އެ މަސްވެރިން. އެ މަސްވެރިން އެ ތިބީ ފެނަކައިގެ ވަޒީފާއަށް ވައްދާފައި. ވިހި ހާސް، ފަންސަވީސް ހާސް މަހަކު ލިބެމުންދިޔަ މަސްވެރިން، އެ ސިނާއަތު ފުނޑު ފުނޑު ކޮށްލީމާ، ދެން އެމީހުންނަށް ހަދާނެ ގޮތެއް ނެތުނީމާ، ސަރުކާރުން މި ހަދާ ގޮތަކީ، އޭގެ ނަޖައިޒް ފައިދާ ނަގައިގެން، ފެނަކައިގެ މުވައްޒަފުން ގޮތަށް ވައްދަނީ އެތަނަށް. ލިބެނީ 12,000 ރުފިޔާ. ކިރުދަޅުގެ އަގު ހަމަ އެހެރަދަނީ ބޮޑުވަމުން.

ހެންވޭރު ހުޅަނގު ދާއިރާގެ މެންބަރު ހަސަން ލަތީފް

ހަސަން ވިދާޅުވީ، ޑިމޮކްރެޓުންގެ ސިޔާސަތާއި ޚިލާފަށް ސަރުކާރުން އަމަލު ކުރަމުންދާ ކަން ރައްޔިތުންނަށް އެނގޭ ކަަމަށެވެ. އަދި ޑިމޮކްރެޓުންގެ ސިޔާސަތަކީ ގޭބީސީ ތަކުގެ އާމްދަނީ އިތުރުން ކުރުންކަން ރައްޔިތުންނަށް އެނގޭތީ ރައްޔިތުންވެސް ޑިމޮކްރެޓުންނަށް ވަމުން އަންނަ ކަމަށެވެ. އަދި ޑިމޮކްރެޓުންގެ ސިޔާސަތުތައް ތަންފީޒުކުރާނީ އަލަށް އުފައްދާ ޑިމޮކްރެޓްސް އިން ކަމަށްވެސް ހަސަން ވިދާޅުވި އެވެ.