ބަރުމަރުކާ ނެތް އުޅަނދުތައް ޓީ-ޖެޓީއަށް ނުވަދެވޭގޮތް ހަދަނީ
ކަނޑުދަތުރުފަތުރުގެ ސަލާމަތާއި ރައްކާތެރިކަން އިތުރަށް ހަރުދަނާކުރުމުގެ ގޮތުން، މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބަލަހައްޓަމުންދާ ޓީ-ޖެޓީ ސަރަޙައްދަށް، އަންނަ ނޮވެމްބަރު މަހުގެ 1 ވަނަ ދުވަހުން ފެށިގެން ބަރުމަރުކާ ނެތް އުޅަނދުފަހަރު ވަނުން މަނާކުރުމަށް ނިންމައިފިއެވެ.
އެމްޕީއެލްއިން ބުނީ މި ފިޔަވަޅަކީ ހުއްދަކޮށްފައިވާ މިންވަރަށްވުރެ އިތުރަށް މުދާ ބަރުކޮށްގެން ދަތުރުކުރުން ހުއްޓުވުމަށްޓަކައި، ކަމާގުޅުންހުރި މުއައްސަސާތަކާ ގުޅިގެން އަޅަން ނިންމާފައިވާ މުހިންމު ފިޔަވަޅެއް ކަމަށެވެ. އަދި މި ބަދަލާއެކު، ޓީ-ޖެޓީ ސަރަޙައްދު ބޭނުންކުރާ ހުރިހާ އުޅަނދަކީވެސް ކަނޑައެޅިފައިވާ މިންގަނޑުތަކަށް ފެތޭ އުޅަނދުފަހަރުކަން ކަށަވަރުކުރަމުން ގެންދާނެ ކަމަށް އެ ކުންފުނިން މަޢުލޫމާތު ދެއެވެ.
ޓީ ޖެޓީއަށް ވަންނަ އުޅަނދުތައް ހުންނަންޖެހޭ މިންގަނޑުތައް
އުޅަނދުގެ އަރިމަތީގައި ބަރުމަރުކާގެ ނިޝާން ސާފުކޮށް ފެންނަން ހުރުން.
މުއްދަތު ހަމަނުވާ ބަރުމަރުކާ ސެޓްފިކެޓެއް އޮތުން.
ދަތުރުފަތުރު ކުރުމަށް ބޭނުންވާ އެންމެހައި ޤާނޫނީ އަދި ރަސްމީ ލިޔެކިޔުންތައް ފުރިހަމަވެފައި ހުރުން.
އެމްޕީއެލުން ވަނީ އުޅަނދުތަކުގެ މުއްދަތު ހަމަވެފައިވާ ސެޓްފިކެޓްތައް އައުކުރުމަށާއި، ކަނޑައެޅިފައިވާ އުސޫލުތަކާ އެއްގޮތަށް އުޅަނދުގައި ނިޝާން ޖެހުމުގެ މަސައްކަތް ކުރިއަށްގެންދިއުމަށް، އުޅަނދުފަހަރުގެ ވެރިންނަށާއި ކެޕްޓަނުންނަށް އިލްތިމާސްކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
