ހުރިހާ ވައްކަމެއް ކޮށް "ޗޯރު" ލަގަބު ހޯދީ އަމިއްލައަށް؛ އެނޫން އެއްޗެއް ދެން ނުކިޔާނެ: ޒާހިރު

ދިވެހި ރައްޔިތުންގެ ވެންޓިލޭޓަރު ތަކުން ވައްކަން ކޮށް ކަނޑު ވިއްކާލުމުން މިހާރު ދެން "ޗޯރު" ނޫން އެއްޗެއް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ނުކިޔާނެ ކަމަށާއި އެ ލަގަބު ހޯދީ އަމިއްލައަށް ކަމަށް ރައްޔިތުން މަޖިލީހުގެ ގައްދޫ ދާއިރާގެ މެންބަރު އަހްމަދު ޒާހިރު ވިދާޅުވެއްޖެއެވެ.

ޒާހިރު މިފަދައިން ރައީސް ޞާލިހަށް ފާޑު ވިދާޅުވެފައިވަނީ މިއަދުގެ ރައްޔިތުންގެ މަޖިލީހުގައި ވާހަކަ ދައްކަވަމުންނެވެ.

އެގޮތުން ޒާހިރު ވިދާޅުވީ ދިވެހިރާއްޖޭގެ އެންމެ ގިނަ ރައްޔިތުންގެ ތާއީދު ލިބިފައިވާ ވެރިޔަކު ތަބަކަކަށް ލާފައި ޓިކެޓް ދީގެން ވެރިކަމަށް ގެނައުމުން ފުރަތަމަ ވެސް ކުރަން ފެއްޓި ކަމަކީ ވެރި ކަމަށް ގެނައި ފަރާތަށް ފުރައްސާރަ ކަމަށެވެ.

އަދި ރިޔާސަތުގައި އިންނެވި ރައީސް ނަޝީދަށް ނިސްބަތްކޮށް ޒާހިރު ވިދާޅުވީ އެމަނިކުފާނަށް އެކި ގޮތް ގޮތުން އުނދަގޫކޮށް، ޖެއްސުންކޮށް، އަގު ވައްޓައިލަން މަސައްކަތް ކޮށްފައި އެންމެ ފަހުން ނިންމީ އެމަނިކުފާނުގެ ފުރާނަ ދުއްވައިލަން ކަމަށެވެ.

އަދި މިކަމުން ފެއިލް ވުމުން ހިތަށް ކެތް ނުވެގެން، ލޮލަށް ނިދި ނައިސްގެން، މިހާރު އުޅެނީ ރައީސް ނަޝީދު މަޖިލީހުގެ ރައީސްގެ މަގާމުން ވަކި ކުރަން ކަމަށެވެ.

"މި މަންޒަރު ދިވެހި ރައްޔިތުންނަށް ފެނުނީމަ ރައްޔިތުންނަށް އިނގޭނެ ވަރަށް ބޮޑު ހަގީގަތެއް. މި ވާހަކައިން އެ ދޭހަވަނީ މިހާރު ވެރިކަމުގަ މިހިރަ މީހާއެއްގެ ކެރެކްޓަރ. ވަރަށް ސާފުކޮށް ދޭހަވޭ އޭނަގެ ކެރެކްޓަރ. އޭނަގެ ބުއްދި މަސައްކަތް ކުރާ ގޮތް. ކިހާ ހިޔަޅު މީހެއްކަން ރައްޔިތުންނަށް ފެނިގެން އެބަދޭ." ޒާހިރު ރައީސް ޞާލިހު ސިފަކުރައްވަމުން ވިދާޅުވިއެވެ.

މިހުރިހާކަމެއް ކުރުމަށްފަހު އަދި ދިވެހި ރައްޔިތުންގެ ވެންޓިލޭޓަރު ތަކުން ވައްކަން ކޮށް، ދިވެހި ދައުލަތުގެ ރައްޔިތުންގެ ކަނޑު ވިއްކާލުމުން، މިހާރު ރައީސް ޞާލިހު ބަދަލުވެފައިވަނީ ރާއްޖޭގެ އެންމެ ބޮޑު ޗޯރަށް ކަމަށް ޒާހިރު ވިދާޅުވިއެވެ.

"ދެން އެނޫން އެއްޗެއް ނުކިޔާނެ. މިހުރިހާ ކަމެއް ކޮށްފައި ޗޯރު ނޫން އެއްޗެއް ދިވެހި ރައްޔިތުންނެއް ދެން ނުކިޔާނެ. މި ލަގަބު ހޯދީ އަމިއްލައަށް." ޒާހިރު ވިދާޅުވިއެވެ.

ޒާހިރު އިތުރަށް ވިދާޅުވީ މިހާރު މި ލަގަބުން ނެއްޓެން ކިތަންމެ ވަރަކަށް އުޅުނަސް ދެން ނުނެއްޓޭނެ ކަމަށާއި ރައްޔިތުންނަށް ވަރަށް ސާފުކޮށް ރައީސް ޞާލިހުގެ ކަންތައް ހުރި ގޮތް އެނގޭނެ ކަމަށެވެ.