ރައީސުލްޖުމްހޫރިއްޔާ މަޢާފުކޮށްދެއްވާ އަދި އަދަބަށް ލުއިދެއްވި މީހުންގެ އަދަދު 600 އަށްވުރެ ގިނަ!
ވޭތުވެދިޔަ 4 އަހަރުގެ ތެރޭގައި ރައީސުލްޖުމްހޫރިއްޔާ މަޢާފުކޮށްދެއްވާފައިވާ އަދި އަދަބަށް ލުއިދެއްވާވައިފައިވާ މީހުންގެ ޖުމްލަ އަދަދު 600 އަށްވުރެ ގިނަ ކަމަށް ރައީސް އޮފީހުން ހާމަކުރައްވާފިއެވެ.
އެގޮތުން 'ދިޔަރެސް' ނޫހުން މައުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ދަށުން 2019 ވަނަ އަހަރުން ފެށިގެން މި އަހަރުގެ އޭޕްރީލު މަހުގެ ނިޔަލަށް އަދަބު ލުއިކޮށްދިނުމާއި މައާފުދިނުމުގެ ޤާނޫނުގެ ދަށުން ރައީސުލްޖުމްހޫރިއްޔާ އަދަބު ލުއިކޮށްދެއްވައި މައާފުދެއްވާފައިވާ ކުށްވެރިންގެ އަދަދާއި، އަދަބު ލުއިކޮށް މައާފުދީފައިވާ މީހުންގެ މައްޗަށް ސާބިތުވެފައިވާ ކުށްތަކުގެ ތަފުސީލަށް އެދި ފޯމް ވަނީ ހުށަހަޅާފައެވެ.
މިކަމަށް ޖަވާބު ދެއްވަމުން ރައީސް އޮފީހުން ވަނީ ކްލެމެންސީ ބޯޑުގެ ލަފާފުޅުގެމަތިން، ރައީސުލްޖުމްހޫރިއްޔާ މަޢާފުކޮށްދެއްވައިފައިވާ އަދި އަދަބަށް ލުއިދެއްވައިފައިވާ މީހުންގެ ޖުމުލަ އަދަދު، 2019 އިން 2022 އަށް ވަކި ވަކިން އެނގިވަޑައިގަންނަވާނޭ ތާވަލެއް ފޮނުއްވާފައެވެ.
އެގޮތުން ރައީސް އޮފީހުން ހާމަކޮށްފައިވާ ތާވަލުން 2019 އިން 2022 އަށް ޖުމްލަ 683 މީހުން ރައީސުލްޖުމްހޫރިއްޔާ މަޢާފުކޮށްދެއްވައިފައިވާ އަދި އަދަބަށް ލުއިދެއްވައިފައިވާކަމަށް ތާވަލުން ދައްކައެވެ.
އެގޮތުން 2019 ގައި ޖުމްލަ 94 މީހުން، 2020 ގައި ޖުމްލަ 130 މީހުން، 2021 ގައި ޖުމްލަ 310 މީހުން އަދި 2022 ގައި ޖުމްލަ 149 މީހުން މީގެ ތެރޭގައި ހިމެނެއެވެ.
އެހެންނަމަވެސް މި ތާވަލުގައި ހިމެނޭ ފަރާތްތަކުގެ މައްޗަށް ސާބިތުވެފައިވާ ކުށްތަކުގެ ތަފްސީލެއް ރައީސް އޮފީހުން ހާމައެއް ނުކުރައްވައެވެ.
އެގޮތުން އެ އިދާރާއިން ދިން ޖަވާބުގައި ވިދާޅުވެފައިވަނީ އެކިއެކި މައްސަލަތަކުގައި މަޢާފުދެއްވައިފައިވާ ނުވަތަ އަދަބަށް ލުއިދެއްވައިފައިވާ ފަރާތްތަކުގެ މައްޗަށް ސާބިތުވެފައިވާ ކުށްތަކަކ،ީ ވަކިވަކިން ރެކޯޑުކޮށް ބަލަހައްޓަމުން ގެންދާ މަޢުލޫމާތެއް ނޫންކަމުގައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
