އެމްޑީޕީއަށް ބަންޑެލިބަންޑެލިން މެމްބަރޝިޕް ފޯމު ހަވާލުކޮށްފި

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)އަށް ވަނުމަށް ބަންޑެލި ބަންޑެލިން މެމްބަރޝިފް ފޯމު ހަވާލުކޮށްފިއެވެ.

އެ ޕާޓީއަށް 12 ދާއިރާއަކުން ޖުމުލަ 2500 މީހުން އަލަށް ގުޅިފައި ވާކަމަށް އެ ޕާޓީން މައުލޫމާތު ދެއެވެ.

އެކަމަށްޓަކައި މިއަދު އެމްޑީޕީ އޮފީހުގައި ބޭއްވި ރަސްމިއްޔާތުގައި، މެމްބަރޝިޕް ފޯމުތަކާ ހަވާލުވެވަޑައިގަތީ އެ ޕާޓީގެ ޗެއާޕާސަން ފައްޔާރު އިސްމާއީލެވެ.

މި ރަސްމިއްޔާތުގައި ވާހަކަ ދައްކަވަމުން ފައްޔާޒު ވިދާޅުވީީ، އަލަށް އެ ޕާޓީއަށް ވަނުމަށް ފޯމު ހުށަހަލާފައިވާ މީހުންނަކީ، ރައީސް އިބްރާހިމް މުހައްމަދު ޞާލިހު ރަށްރަށަށް ކުރެއްވި ދަތުރުފުޅުތަކުގައި ޕާޓީއަށް ސޮއިކުރި މީހުންނާއި، އެ ޕާޓީން މުޅި ރާއްޖެއަށް އަމާޒުކޮށްގެން ހިންގި ހަރަކާތުގެ ތެރެއިން ސޮއިކުރި މީހުން ކަމަށެވެ.

ފައްޔާޒު ވިދާޅުވީ ވަކި ވަރަކަށް މެމްބަރުން ހަމަވެގެން، ޕާޓީއަށް މެމްބަރުން އިތުރު ކުރުމުގެ ހަރަކާތް ނުހުއްޓާނެ ކަމަށެވެ.

އިލެކްޝަންސް ކޮމިޝަންއިން އާއްމު ކޮށްފައިވާ މައުލޫމާތަށް ބަލާއިރު މިވަގުތު އެމްޑީޕީގައި ތިބީ 57،660 މެމްބަރުންނެވެ. އަލަށް ސޮއިކުރި މީހުންނާއެކު، ޕާޓީގެ ޖުމްލަ އަދަދު 60،160 އަށް އަރާނެއެވެ.