ޑެންމާކު އަތުން މޮޅުވެ އޮސްޓްރޭލިޔާ ކުއާޓާ ފައިނަލަށް!

އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ދެވަަނަ ބުރުގައި މިއަދު ހަވީރު އޮސްޓްރޭލިޔާ އާއި ޑެންމާކް ވަދަކުރި މެޗު 2-0 ގެ ނަތީޖާއަކުން ކާމިޔާބުކޮށް މުބާރާތުގެ ކުއާޓާ ފައިނަލުން އޮސްޓްރޭލިޔާ ޖާގަ ހޯދައިފި އެވެ.

ގްރޫޕް ބީގެ އެއްވަނަ ޓީމުގެ ގޮތުގައި އޮސްޓްރޭލިޔާ ދެވަނަ ބުރުން ޖަގަ ހޯދިއިރު، ޑެންމާކް މުބާރާތުގެ ދެވަނަ ބުރުން ޖަގަ ހޯދީ ގުރޫޕް ޑީގައި ވަރުގަދަ ޗައިނާ ފަހަތަށް ޖައްސާލުމަށްފަހު ގުރޫޕްގެ ދެވަނަ ޓީމުގެ ގޮތުގައި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި އޮސްޓްރޭލިޔާގެ ފުރަތަމަ ލަނޑު ފުރަތަމަ ހާފުގެ 29 ވަނަ މިނެޓުގައި ކާމިޔާބުކޮށްދިނީ އެޓީމުގެ އާސެނަލް ފޯވާޑް ކެއިޓްލިން ފޫރޑް އެވެ. މިއީ އެޓީމުގެ މެންޗެސްޓާ ސިޓީ ފޯވާޑް މެރީ ފައުލަރ ތަނަވަސްކޮށްދިން ފުރުސަތެއްގައި ބޯޅައާއެކު ޕެނަލްޓީ އޭރިއާ ތެރެއަށް ވަދެ ތިރިތިރިން ފޮނުވާލި ބާރު ހަމަލާ ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އޮސްޓްރޭލިޔާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، މި މެޗުގައި އޮސްޓްރޭލިއާ އިން ކާމިޔާބުކުރި ދެވަނަ ލަނޑު ފަހުހާފުގެ 70 ވަނަ މިނެޓުގައި ކާމިޔާބުކޮށްދިނީ އެޓީމުގެ ރެއާލް މެޑްރިޑް ފޯވާޑް ހޭލީ ރަސޯ އެވެ. މިއީ ޑެންމާކްގެ ޕެނަލްޓީ އޭރިއާ ތެެރެއިން އެޓީމުގެ މިޑްފިލްޑަރު އެމިލީ ވެން އެގްމެންޑް ފަހަތަށް ޖައްސާލި ބޯޅައެއް ތިރިތިރިން ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން އޮސްޓްރޭލިޔާ ކުރީގައި އޮވެގެންނެވެ. މުބާރާތުގެ ކުއާޓާ ފައިނަލުގައި އޮސްޓްރޭލިއާ އިން ވާދަކުރަންޖެހެނީ، ދެވަނަ ބުރުގައި މާދަމާ މޮރޮކޯ އާއި ފްރާންސް ވާދަކުރާ މެޗުން މޮޅުވާ ޓީމަކާއި ދެކޮޅަށެވެ.