ހުޅުމާލޭގައި ތަރައްޤީކުރި މަންހަޓަން ގްރޭންޑް ހޮޓާ ރަސްމީކޮށް ހުޅުވައިފި
މާލެ ސަރަހައްދުގައި މިހާތަނަށް ހުޅުވި އެންމެ ބޮޑު ސިޓީ ހޮޓާ، މަންހަޓަން ގްރޭންޑް ހޮޓާ ރަސްމީކޮށް މިރޭ ހުޅުވައިފިއެވެ.
މަންހަޓަން ގްރޭންޑް ހޮޓާ ހުޅުވާފައިވަނީ މިކަމަށްޓަކައި މިރޭ އެ ހޮޓަލުގައި ބޭއްވި ހަފްލާއެއްގައެވެ. ހޮޓާ ހުޅުވައިދެއްވީ މާލީ ވަޒީރު ހަސަން ޒަރީރެވެ. ކުރިން އެސްޓީއޯ ސިޓީހޮޓާ ހަދަން ނިންމި އިމާރާތުގައި މަންހަޓަންގެ މި ހޮޓާ ހުޅުވާފައިމިވަނީ އަހަރުދުވަހުގެ މަސައްކަތްތަކަށް ފަހުގައެވެ. ފަސް ތަރީގެ މި ހޮޓަލުގައި 162 ކޮޓަރި ހުންނައިރު. ހޮޓާ ފަރުމާކޮށްފައިވަނީ ޒަމާނީ ވަސީލަތްތައް ހިމަނައިގެންނެވެ.
އެގޮތުން މި ހޮޓަލުގައި ރެސްޓޯރެންޓް ތަކާއި، ޖިމް، ސްވިމިންޕޫލް އަދި ޖަލްސާކުރާ މާލަންތައް ހިމެނެއެވެ. މަންހަޓަން ގްރޭންޑް ހޮޓާ އާންމުކޮށް ހުޅުވާލާފައިވާއިރު، ވެބްސައިޓް މެދުވެރިކޮށް ބުކިންސްތައް މިހާރު ހެއްދޭނޭކަމަށް ހޮޓަލުން ބުނެއެވެ.
މަންހަޓަން ހޮޓާ ތަރައްޤީކުރި އިމާރާތަކީ މީގެ 20 އަހަރުކުރިން އެސްޓީއޯއިން ސިޓީ ހޮޓަލެއް ހިންގުމަށް އިމާރާތްކުރި ތަނެކެވެ. އެސްޓީއޯއިން ހުޅުމާލޭގައި ސިޓީ ހޮޓަލެއް ގާއިމްކުރުމުގެ މަސައްކަތް އެންމެފުރަތަމަ ފެށީ 2007 ވަނަ އަހަރެވެ. އެސްޓީއޯއިން ހޮޓަލެއް ހަދަން ފެށީ އެކުންފުންޏަށް ދިމާވެފައިވާ ބޭރުފައިސާ ލިބުމުގެ މައްސަލައަށް ހައްލެއް ގެނައުމުގެ ގޮތުންކަމަށް އޭރު އެކުންފުނިން ވަނީ ބުނެފައެވެ. ތަފާތު އެކި އަހަރުތަކުގެ މަތިން ބަޔަކާ ހަވާލުކޮށްގެން އެތަނުގެ މަސައްކަތްތައް ފެށިނަމަވެސް ހޮޓަލުގެ މަސައްކަތް، އޮތީ ކުރިއަށް ނުގޮސް ހުއްޓިފައެވެ. އެގޮތަށް އޮއްވައި އެސްޓީއޯއިން ވަނީ 2024 ވަނަ އަހަރު އެ ހޮޓާ އެޗްޑީސީއާ ހަވާލުކޮށްފައެވެ
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
