ހުޅުމާލޭގައި ތަރައްޤީނުކުރެވި ދިގުލައިގެންދިޔަ ސިޓީހޮޓާ އެންމެފަހުން މިރޭ ހުޅުވަނީ

ހުޅުމާލޭ ފޭސް 1 ގައި ތަރައްޤީނުކުރެވި ދިގުލައިގެންދިޔަ ސިޓީހޮޓާ ތަރައްްޤީކުރުމަށްފަހު މެންހަޓަން ގްރޭންޑް ހޮޓާ ނަމުގައި މިރޭ ހުޅުވުމަށް ތައްޔާރުވެއްޖެއެވެ.

ފަސް ތަރީގެ މި ލަގްޒަރީ ހޮޓާ ތަރައްޤީކުރުމުގެ މަސައްކަތް އެންމެ ފުރަތަމަ ފެށީ މީގެ 19 އަހަރުކުރިން ސަރުކާރާއި ރައްޔިތުންގެ ކުންފުނި އެސްޓީއޯއިންނެވެ. މެންހަޓަން ގްރޭންޑް ހޮޓެލް ހުޅުވުމުގެ ގޮތުން، މިރޭ ހަވާއެރުވުމަށް ނިންމާފައިވާއިރު، މިރޭ ހާއްސަ ރަސްމިއްޔާތެއްވެސް ބޭއްވުމަށް ވަނީ ނިންމާފައެވެ. މި ހަރަކާތް ކުރިއަށްދާނީ މިރޭ 22:00 އިން ފެށިގެން 22:30 އާ ހަމައަށެވެ.

އެސްޓީއޯއިން ތަރައްޤިކުރަން އުޅުނު ސިޓީހޮޓާ، ފަސް ތަރީގެ ހޮޓަލަކަށް ބަދަލުކޮށް އެތަން ހުޅުވުމުގެ މަސައްކަތް ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީން ފަށާފައިވަނީ މިދިޔަ އަހަރެވެ. އެޗްޑީސީން އެތަން ތަރައްޤީކުރުމަށް ހަވާލުކޮށްފައިވަނީ، ދުބާއީގެ ޑީޕްސީފުޑް ކޮމްޕެނީން ހަދާފައިވާ ވޯލްޑް އޮފް ބިޒްނަސް ޕްރައިވެޓް ލިމިޓެޑްއާ އެވެ. އެކުންފުނިން އެތަން ހިންގާނީ "މަންހަޓަން ގްރޭންޑު" ނަމުގައެވެ.

މިތަނުގެ ހިދުމަތް ފަށާއިރު، 158 ކޮޓަރީގެ އިތުރުން ބެންކުއެޓް ހޯލަކާއި މަލްޓި ޕާރޕަސް ހޯލުގެ އިތުރުން ސްވިމިންގ ޕޫލާއި، އިންޓަރނޭޝަނަލް ފުޑް އެންޑް ބެވަރޭޖްގެ 4 ބްރޭންޑާއި ޖިމާއި ސްޕާގެ ޚިދުމަތުގެ އިތުރުން ސިޓީ ހޮޓަލަކުން ދޭ ހިދުމަތްތައް ލިބެން ހުންނާނެއެވެ.

އެސްޓީއޯއިން ހުޅުމާލޭގައި ސިޓީ ހޮޓަލެއް ގާއިމްކުރުމުގެ މަސައްކަތް އެންމެފުރަތަމަ ފެށީ 2007 ވަނަ އަހަރެވެ. އެސްޓީއޯއިން ހޮޓަލެއް ހަދަން ފެށީ އެކުންފުންޏަށް ދިމާވެފައިވާ ބޭރުފައިސާ ލިބުމުގެ މައްސަލައަށް ހައްލެއް ގެނައުމުގެ ގޮތުންކަމަށް އޭރު އެކުންފުނިން ވަނީ ބުނެފައެވެ. ތަފާތު އެކި އަހަރުތަކުގެ މަތިން ބަޔަކާ ހަވާލުކޮށްގެން އެތަނުގެ މަސައްކަތްތައް ފެށިނަމަވެސް ހޮޓަލުގެ މަސައްކަތް، އޮތީ ކުރިއަށް ނުގޮސް ހުއްޓިފައެވެ. އެގޮތަށް އޮއްވައި އެސްޓީއޯއިން ވަނީ 2024 ވަނަ އަހަރު އެ ހޮޓާ އެޗްޑީސީއާ ހަވާލުކޮށްފައެވެ.