ހުޅުމާލޭގެ 220 އެޕާޓްމަންޓެއްގެ ކުޑަދޮރުތަކުގައި ރެއިލިން ހަރުކޮށްފި
އެއްމެދު އިމާރާތްތަކުގެ ރައްކާތެރިކަން ކަށަވަރުކުރުމަށް ފެށި މަސައްކަތުގެ ތެރެއިން ހުޅުމާލޭގެ 220 އެޕާޓްމަންޓެއްގައި ރެއިލިން ހަރުކޮށް ނިމިއްޖެ ކަމަށް ހައުސިންގ ޑިވަލޮޕްމަންޓް ކޯޕަރޭޝަން (އެޗްޑީސީ) އިން ބުނެފިއެވެ.
އެޗްޑީސީން ބުނީ، މިހާތަނަށް ރެއިލިން ހަރުކޮށްދީފައިވަނީ 220 އެޕާޓްމަންޓެއްގެ ޖުމުލަ 273 ކުޑަދޮރުގައި ކަމަށެވެ. ބާކީ ހުރި އެޕާޓްމަންޓްތަކުގެ މަސައްކަތް ވެސް ކުރިއަށް ގެންދަމުންދާ ކަމަށް އެ ކޯޕަރޭޝަނުން ބުނެއެވެ.
މި މަސައްކަތުގެ މައިގަނޑު ބޭނުމަކީ އެޕާޓްމަންޓްތަކުގެ ކުޑަދޮރުތަކާއި ބެލްކަނީގައި ހަރުކޮށްފައިވާ ރެއިލިންތައް ގަވާއިދާ އެއްގޮތްތޯ ޗެކްކުރުމެވެ. ރެއިލިން ހަރުކުރުމަށް އެހީތެރިކަމަށް އެދޭ ފަރާތްތަކަށް އެ ކޯޕަރޭޝަނުން ފުރުސަތު ހުޅުވާލީ ސެޕްޓެމްބަރު 30 ވަނަ ދުވަހާ ހަމައަށެވެ. އެޗްޑީސީން ބުނީ، ރެއިލިން ހަރުކޮށްދިނުމަށް އެދިފައިވަނީ 1,011 އެޕާޓްމަންޓަކުންނެވެ.
އެއްމެދު އިމާރާތްތަކުގެ ސަލާމަތާއި ރައްކާތެރިކަން އިތުރަށް ހަރުދަނާކުރުމުގެ މި މަސައްކަތް ފެށީ ސެޕްޓެމްބަރު 3 ވަނަ ދުވަހުއެވެ. އެ މަސައްކަތް ފެށީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިރުޝާދާއި ލަފާފުޅުގެ މަތިންނެވެ. ރެއިލިން ހަރުކުރުމުގެ އިތުރުން، އެ ކޯޕަރޭޝަނުގެ ބެލުމުގެ ދަށުގައިވާ އިމާރާތްތަކާއި އެހެނިހެން ތަންތަނުގެ ސަލާމަތާއި ރައްކާތެރިކަން ކަށަވަރުކުރުމަށް ގިނަ މަސައްކަތްތަކެއް މިހާރު ކުރިއަށް ގެންދަމުންދާ ކަމަށް ވެސް އެ ކޯޕަރޭޝަނުން ބުނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
